Seirbhísí fostaíochta do chuardaitheoirí poist

Is féidir le cuardaitheoirí poist tacaíocht fostaíochta a fháil ón Roinn Coimirce Sóisialaí (an RCS). Is féidir leat comhairle faoi obair a chuardach, eolas ar fholúntais phoist agus tacaíocht ioncaim a fháil. Chun teacht ar an tacaíocht seo, déan teagmháil le d’Ionad Intreo áitiúil.

Is cuardaitheoir poist thú sna cásanna seo a leanas:

• Tá Liúntas Cuardaitheora Poist nó Sochar Cuardaitheora Poist á fháil agat
• Tá síniú á dhéanamh agat do chreidmheasanna dífhostaíochta
• Tá tú dífhostaithe, ach níl tú incháilithe íocaíocht leasa shóisialaigh a fháil
• Tá tú dífhostaithe, tá obair á cuardach agat agus tá íocaíocht leasa shóisialaigh á fáil agat

Is gnách go dtugtar tús áite do dhaoine a bhfuil Sochar Cuardaitheora Poist nó Liúntas Cuardaitheora Poist á fháil acu chun tacaíochtaí fostaíochta a fháil.

Má tá íocaíocht cuardaitheora poist á fáil agat, b’fhéidir go mbeidh ort teacht ar na tacaíochtaí seo trí phróiseas gníomhachtaithe an RCS – féach ‘Íocaíochtaí cuardaitheora poist agus gníomhachtú’ thíos.

Áirítear leis na seirbhísí agus tacaíochtaí:

• Tá Deontas Tacaíochta Oiliúna (DTO) ar fáil do chuardaitheoirí poist agus daoine a bhfuil íocaíochtaí áirithe eile á bhfáil acu. Níl sé ar fáil do dhaoine atá rannpháirteach in JobPath. Cuireann an DTO rochtain thapa ar fáil ar oiliúint ghearrthéarmach nach bhfuil ar fáil láithreach ó sholáthraí Stáit nó a chabhróidh leat post a fháil go tapa. Is féidir le do chásoifigeach deontas a fhaomhadh faoin scéim seo má shásaíonn sé do riachtanais shainaitheanta (mar shampla, faoi mar a leagtar amach i do Phlean um Dhul chun Cinn Pearsanta).
• Seisiún rannpháirtíochta grúpa le cuardaitheoirí poist eile le léargas ginearálta a thabhairt duit ar na tacaíochtaí atá ar fáil. Sanntar thú do sheisiún rannpháirtíochta grúpa nuair a shíníonn tú i dtosach chun íocaíocht cuardaitheora poist a fháil.
• Ag brath ar do phróifíl chuardaitheora poist, seisiúin aghaidh ar aghaidh le cásoifigeach an RCS chun plé a dhéanamh ar dheiseanna fostaíochta, cúrsaí oiliúna, tacaíochtaí airgeadais agus roghanna eile a bhféadfadh fostaíocht eascairt astu. Má tá íocaíocht cuardaitheora poist á fáil agat, socrófar coinní leanúnacha chun monatóireacht a dhéanamh ar do dhul chun cinn i dtreo fostaíochta, oiliúna nó oideachais.
• Leabhrán Eolais do Chuardaitheoirí Poist in dtugtar comhairle ar CVanna, litreacha iarratais ar phost, agallaimh, cainéil earcaíochta agus na tacaíochtaí fostaíochta agus oiliúna a d’fhéadfadh cabhrú leat agus post á chuardach agat.
• Láithreán gréasáin JobsIreland, ar a liostaítear poist atá ar fáil in Éirinn agus thar lear. Liostaítear ann, chomh maith, intéirneachtaí agus folúntais ar chláir fostaíochta. Is féidir leat do CV a chur in airde ar bhunachar sonraí JobsIreland trí úsáid a bhaint as an láithreán gréasáin. Is féidir le fostóirí teacht ar na CVanna seo tríd an mbunachar sonraí seo agus teagmháil a dhéanamh leat go díreach. Is féidir leat teacht chomh maith ar láithreán gréasáin JobsIreland trí aip ghutháin chliste, trí ghlaoch ar 1800 611 116 agus trí na bothanna féinseirbhíse atá lonnaithe in Ionad Intreo nó in Oifig Brainse Leasa Shóisialaigh áitiúil.
• Clubanna Post, a sholáthraíonn tacaíochtaí do chuardaitheoirí poist, seirbhís ‘buail isteach’ agus ceardlanna foirmiúla san áireamh.
• An meastóir sochar oibre ar líne, ar féidir leis cabhrú leat an toradh airgeadais a dheimhniú a bhainfear trí ghlacadh le hobair lánaimseartha. Deimhníonn sé an méid iomlán a gheofá tar éis glacadh le hobair lánaimseartha (aon Íocaíocht Teaghlaigh Oibre san áireamh) agus cuirtear seo i gcomparáid leis an méid atá á fháil agat ó íocaíochtaí cuardaitheora poist (Forlíonadh Cíosa san áireamh).
• Teacht ar eolas ar dheiseanna poist ar fud na hEorpa trí EURES – an Líonra Seirbhísí Eorpacha Fostaíochta.
• Is féidir leat léamh freisin faoi scéimeanna tacaíochta fostaíochta, ag filleadh ar oideachas agus oiliúint, agus tacaíochtaí do dhaoine ar mian leo tabhairt faoin bhféinfhostaíocht .

Má tá íocaíocht cuardaitheora poist á fáil agat, b’fhéidir go mbeidh ort páirt a ghlacadh i gclár gníomhachtaithe.

Déanann an RCS cur síos ar ghníomhachtú amhail oibriú le cuardaitheoirí poist chun tacú leo filleadh ar an bhfostaíocht. Bíonn súil leis go nglacann cuardaitheoirí poist páirt iomlán agus na tacaíochtaí a úsáid a chuirtear ar fáil i rith an phróisis ghníomhachtaithe. Is féidir a áireamh leis seo scéimeanna oideachais nó oiliúna nó scéimeanna tacaíochta fostaíochta chun cabhrú leat filleadh ar an ionad oibre nó ar thacaíochtaí eile.

Is féidir a n-íocaíocht cuardaitheora poist a laghdú mura nglacann daoine páirt sa phróiseas gníomhachtaithe agus is féidir iad a dhícháiliú ina dhiaidh sin óna n-íocaíocht ar feadh a fhaide le 9 seachtaine.

B’fhéidir nach mbeidh ar chuardaitheoirí poist atá níos sine ná 62 bliain d’aois páirt a ghlacadh sa phróiseas gníomhachtaithe.

Is féidir níos mó a léamh faoi na choinníollacha a bhaineann le d’íocaíocht cuardaitheora poist.

Clár gníomhachtaithe fostaíochta é JobPath atá in ainm is cabhrú le cuardaitheoirí poist fostaíocht lánaimseartha a aimsiú agus a choimeád. Roghnaíonn an RCS cliaint do JobPath ar bhonn randamach. Ní féidir leat iarratas a dhéanamh chun páirt a ghlacadh in JobPath.

Tá tacaíochtaí ó JobPath dírithe ar dhaoine atá dífhostaithe go fadtéarmach agus ar dhaoine atá dífhostaithe le tamall anuas, ach a bhféadfadh go dteastaíonn tacaíocht uathu obair a aimsiú.

Má roghnaítear do JobPath, atreorófar thú chuig cuideachta JobPath. Tá dhá chuideachta ann - Seetec agus Turas Nua. Sannfar comhairleoir pearsanta duit a dhéanfaidh measúnú ar do scileanna, taithí oibre agus spriocanna oibre. Cuirfidh an comhairleoir Plean um Dhul chun Cinn Pearsanta le chéile leat. Beidh sraith gníomhaíochtaí agus gníomhartha sa Phlean atá ceaptha cabhrú leat post a fháil. D’fhéadfaí a áireamh leo seo taithí oibre, oiliúint agus tacaíochtaí ábhartha eile. Cuirfear comhairle gairm bheatha ort agus cabhrófar leat le scileanna CV agus agallaimh. Is féidir leat tacaíocht agus comhairle a fháil freisin faoi do ghnólacht féin a thosú.

Coimeádann tú d’íocaíocht chuardaitheora fad a bhíonn páirt á glacadh agat in JobPath. Is féidir leis an gclár maireachtáil ar feadh a fhaide le bliain (52 seachtain). Má aimsíonn tú post, leanfaidh cuideachta JobPath le hoibriú leat fad a bhíonn tú fostaithe ar feadh a fhaide le bliain. Cuirfidh sé tacaíocht ar leith ar fáil duit i rith na chéad chúpla seachtain de d’fhostaíocht.

Má tá tú cláraithe le JobPath, is féidir leat iarratas a dhéanamh ar scéimeanna tacaíochta fostaíochta an RCS, cosúil le Tús nó Fostaíocht Pobail.

Ag brath ar d’Ionad Intreo, ní gá duit síniú chomh minic céanna chun d’íocaíocht chuardaitheora poist a fháil fad a bhíonn tú rannpháirteach in JobPath agus, i roinnt cásanna, b’fhéidir nach mbeidh ort síniú in aon chor.