Saoire bhliantúil

Rialacha

Tá 3 bhealach ann le saoire bhliantúil a ríomh:

• Bunaithe ar uaireanta oibre an fhostaí le linn na tréimhse ar a dtugtar an bhliain saoire, a ritheann ón Aibreán go Márta. Tá uasmhéid 4 seachtainí saoire ar fáil d'aon fhostaí a bhfuil ar a laghad 1,365 uair oibrithe aige/aici sa bhliain saoire mura gcríochnaíonn an fhostaíocht i rith na bliana saoire. Baineann go leor fostóirí úsáid as an mbliain féilire (Eanáir-Nollaig) seachas an bhliain oifigiúil saoire a úsáid le cearta saoire a ríomh.
• 1/3 de sheachtain oibre a cheadú i leith gach mí ina bhfuil ar a laghad 117 uair déanta ag an bhfostaí
• 8% de na huaireanta a d'oibrigh an fostaí sa bhliain saoire, suas le huasmhéid de cheithre seachtainí.

Is féidir le fostaí leas a bhaint as pé bealach a thugann an ceart is mó dó/di. Go ginearálta, tá an saoire bhliantúil d'fhostaithe páirtaimseartha ríofa tríd an 3ú bhealach, sin é, 8% de na huaireanta a d'oibrigh an fostaí.

Tá fostaí a bhfuil ar a laghad 8 mí oibrithe aige/aici i dteideal tréimhse saoire coicíse a fháil in aon aonad amháin.

Saoire bhliantúil agus saoire bhreoiteachta

Má tá tú breoite le linn saoire bliantúla, ba chóir duit teastas leighis a fháil ón dochtúir (LG) chomh luath agus is féidir chun na laethanta breoiteachta a chlúdach. Ba cheart an teastas seo a thabhairt don bhfostóir ar fhilleadh ar obair duit. Ní bheidh na laethanta breoiteachta curtha san áireamh mar sin mar shaoire bhliantúil agus beidh siad ar fáil mar shaoire duit níos déanaí.

Ní féidir le d'fhostóir iallach a chur ort saoire bhliantúil a thógáil i gcomhair tréimhse tinnis. Laghdóidh tinneas i rith na bliana saoire an méid uaireanta oibre ina n-iomlán atá déanta ag fostaí agus mar sin is féidir leis tionchar a bheith aige ar do chearta saoire bhliantúla. Má tá tú ar saoire breoiteachta ní charnóidh tú teidlíocht maidir le saoire bhliantúil.

Saoire bhliantúil agus saoire eile

Ní chuireann saoire reachtúil isteach ar shaoire bhliantúil. Cuirtear san áireamh aon am caite ar shaoire mháithreachais, saoire uchtaíoch, saoire thuismitheora, saoire force majeure agus an chéad 13 seachtainí de shaoire cúramóra mar am caite i bhfostaíocht agus is féidir an t-am sin a chomhaireamh le cearta saoire bliantúla a ríomh.

Saoire bhliantúil agus fostaíocht a fhágáil

Faoin Acht um Eagrú Ama 1997, tá sé mídhleathach má íocann fostóir liúntas in áit cheart íosmhéid saoire reachtúil an fhostaithe a íoc ach amháin nuair a chuirtear deireadh leis an bhfostaíocht. Go ginearálta, ríomhtar do shaoire bhliantúil de réir na n-uaireanta atá oibrithe agat.

Má tá tú ag fágáil fostaíochta, tá tú i dteideal íocaíochta i dtaobh saoire bliantúla agus laethanta saoire poiblí nár tógadh roimh dheireadh na fostaíochta.