Torthaí ar Scaradh nó Colscaradh

Eolas

Nuair a theipeann ar phósadh ar dtús, is iondúil go scarann lanúin agus go gcónaíonn siad ó chéile. Bíonn tionchar ar bhriseadh an phósta ar chuile ghné de shaol an duine agus téann an chuid is mó daoine ar aghaidh le rudaí a shocrú eatarthu go dleathúil. Tá trí bhealach ann len é seo a dhéanamh in Éirinn:

• Comhaontú scartha
• Scaradh dleathúil
• Colscaradh

Tagann an lanúin iad féin chuig na socruithe a bhaineann le socrú scartha, ach bíonn socrú cúirte i gceist le scaradh dleathúil agus colscaradh. Colscaradh amháin a chuireann deireadh leis an bpósadh agus a fhágann an bheirt saor le hathphósadh.

I gcúinsí faoi leith, is féidir le cúirt ordú neamhní a cheadú. Sa chás seo tá an chúirt ag rá nach raibh aon phósadh ann ariamh. Tá an dlí a bhaineann le pósadh a chur ar neamhní fíorchasta, agus ní mór comhairle dlí a fháil i gcónaí le cinneadh a dhéanamh an bhfuil cás ann iarratas ar an bpósadh a chur ar neamhní a dhéanamh. Níl aon stádas dleathúil ag ordú ón Eaglais Chaitliceach pósadh a chur ar neamhní.