Ag pósadh thar lear

Eolas

Más saoránach/saoránaigh Éireannach(a) tú féin nó do pháirtí agus go bhfuil sibh ag smaoineamh pósadh lasmuigh d'Éirinn, ba chóir go mbeadh a fhios agat go bhfuil bailíocht dhlíthiúil an phósta rialaithe i bpáirt ag dlíthe na tíre ina bpósann tú. Tá na foirmiúlachtaí dlíthiúla thar lear an-difriúil ó na cinn in Éirinn ar an mórchuid, mura bhfuil agus i ngach cás. Mar shampla, is iondúil gur searmanas reiligiúnach amháin gan aon éifeacht dhlíthiúil é pósadh eaglaise thar lear. Toisc nach bhfuil sé aitheanta de réir an dlí sa tír inar tharla sé, ní féidir breathnú air mar phósadh dlíthiúil in Éirinn. Tá an cás amhlaidh cé gur féidir le pósadh san eaglais nó sainchreideamh chéanna in Éirinn a bheith ceangailtech de réir an dlí.

Dá réir sin, tá sé fíor-thábhachtach duit a chinntiú go sásaíonn tú riachtanais dlíthiúla na tíre ina bhfuil tú ag pósadh. Ba chóir duit teagmháil a dhéanamh leis an ambasáid nó na húdaráis reiligiúnacha ábhartha sa tír sin chun fáil amach cad atá riachtanach. Féach ar liosta na n-ambasáidí agus na gconsalachtaí Éireannach thar lear anseo.

Clárú na bpóstaí thar lear

Cláraítear póstaí saoránach Éireannach thar lear sa tír ina dtarlaíonn siad. Níl feidhm ar bith ag Oifig an Ard-Chláraitheora (taisclann sibhialta lárnach do thaifid maidir le breitheanna, básanna agus póstaí i bPoblacht na hÉireann) chun comhairle a thabhairt ar phóstaí, nó póstaí saoránach Éireannach a tharlaíonn thar lear a chlárú. Ní chláraítear póstaí a tharlaíonn lasmuigh den stát in Éirinn de ghnáth, seachas i gcúinsí fíor-shonracha mar atá leagtha síos in Alt 2 de Acht na bPóstaí, 1972. Ciallaíonn sé seo gurb iad na póstaí ar bhain díreach searmanas reiligiúnach aonair leo, a tharla i département Hautes Pyrénées na Fraince roimh 1973, idir lánúin áit a raibh an bheirt pháirtithe nó ceachtar páirtí mar shaoránach Éireannach ar lá an phósta, an t-aon phósadh ba ghá a chlárú in Éirinn. Gach pósadh eile a tharlaíonn thar lear - ní gá go ndéanfaí iad a chlárú in Éirinn.

Is iondúil go nglacfar le do theastas pósta eachtrannach maidir le cuspóirí oifigiúla in Éirinn, nuair is gá duit fianaise a léiriú go bhfuil tú pósta. Má tá an teastas i dteanga eachtrannach, ní mór duit aistriúchán oifigiúil a chur ar fáil, nó aistriúchán ó ghníomhaireacht aistriúcháin aitheanta.