Polasaithe árachais saoil nár héilíodh

Rialacha

Cén uair a dheirtear go bhfuil polasaí árachais saoil díomhaoin?

Deirtear go bhfuil polasaí árachais saoil "díomhaoin" nuair nach raibh aon ghnóthaí ag baint leis le cúig bliain déag. Tugtar an "tréimhse dhíomhaoin" ar an tréimhse ama seo. Braitheann fad na tréimhse díomhaoin ar téarma a bheith luaite leis an bpolasaí árachais saoil. Má tá téarma faoi leith luaite leis an bpolasaí deirtear go bhfuil sé díomhaoin muna raibh an custaiméir i dteagmháil leis an gcomhlacht árachais le cúig bliain ón dáta gur tháinig an polasaí in aois nó ón dáta deireanach a raibh cumarsáid ag an gcomhlacht leis an gcustaiméir, cibé acu is deireanaí. Muna bhfuil téarma faoi leith luaite leis an bpolasaí deirtear go bhfuil sé díomhaoin muna raibh aon chumarsáid idir an comhlacht agus an custaiméir le cúig bliain déag.

Ní mór polasaithe árachais saoil a aistriú chuig Ciste na gCuntas Díomhaoin i mí an Aibreáin gach bliain.

Tá sé de cheart agat an t-airgead atá i do pholasaí díomhaoin árachais saoil a éileamh ag am ar bith.

Níl aon teorainn ama do shealbhóirí cuntais ná a ngarghaolta cistí díomhaoine a éileamh, mar tá a gcuid cearta cosanta. Mar sin fiú má bhíonn an t-airgead nó maoin aistrithe isteach i gCiste na gCuntas Díomhaoin is féidir leatsa nó le do gharghaolta éileamh a dhéanamh ar an airgead nó ar an maoin.

Cé na polasaithe árachais saoil atá clúdaithe?

Baineann an tAcht um Pholasaithe Árachais Saoil nár hÉilíodh le gach gealltanas árachais in Éirinn agus le gach polasaí árachais saoil a thóg saoránaigh Éireannacha, ach amháin polasaithe gur cuid de mhaoin scéimeanna pinsin saothair iad, árachas sláinte grúpaí nó scéimeanna um shochar míchumais agus scéimeanna pinsin le tacaíocht.

Céard atá le déanamh ag comhlachtaí árachais faoi théarmaí an Achta um Pholasaithe Árachais Saoil nár hÉilíodh?

Ní mór do chomhlachtaí árachais dul i dteagmháil go pearsanta le custaiméirí gur fiú 500 euro nó níos mó a bpolasaithe árachais agus insint dóibh conas fáltas na bpolasaithe a éileamh. Ní mór do chomhlachtaí freisin fógraí a chur i nuachtáin náisiúnta faoi dhó sa bhliain le custaiméirí gur fiú níos lú ná 500 euro a bpolasaithe a chur ar an eolas.

Ní mór do chomhlachtaí árachais clár a choinneáil de na polasaithe nár héilíodh.