Iompar scoile do ghasúir le riachtanais speisialta

Rialacha

Siad na gasúir atá ar an rolla i scoileanna speisialta nó i ranganna speisialta i mbunscoil, atá i dteideal iompair speisialta.

D’fhéadfadh sé nach mbeadh an tseirbhís iompair ar fáil i ngach ceantar. Áit ar bith nach féidir iompar speisialta a chur ar fáil, d’fhéadfadh sé go mbeifeá i dteideal deontas iompair le cuidiú le hiompar príobháideach a eagrú.

Íoctar an deontas iompair:

• Más gá an gasúr a thabhairt ag stad bordála áirithe leis an iompar speisialta a úsáid
• Má theastaíonn seirbhís iompair le tionlacan nach féidir a chur ar fáil
• Mura bhfuil aon tseirbhís iompair speisialta ar fáil do ghasúr le riachtanais speisialta agus é ag taisteal abhaile ó scoil chónaitheach ag an deireadh seachtaine

Má dhiúltaítear do iarratas ar dheontas iompair, tá tú i dteideal achomharc a dhéanamh. Ní mór duit achomharc scríofa a dhéanamh chuig an Rannóg um Oideachas Speisialta sa Roinn Oideachais agus Scileanna. Is féidir achomhairc a dhéanamh sna cásanna seo leanas:

• Mara bhfuil an Roinn i ndán seirbhís iompair a chur ar fáil mar gheall ar chostas ró-ard
• Más lú an t-uasdheontas a tháirgtear ná costas measta an turais atá i gceist.

Tar éis staidéar a dhéanamh ar an achomharc, má bhíonn an Roinn sásta nach bhfuil na tuismitheoirí/caomhnóir in acmhainn an gasúr a iompar, nó go mbeadh sé crua go maith orthu iompar príobháideach a íoc, d’fhéadfaí seirbhísí speisialta a eagrú ar chostas nach mó ná 63 ceint an míle.

Soláthar úmacha agus tionlacain

Tá cúnamh ar fáil freisin le úmacha a sholáthar do ghasúir le riachtanais speisialta ag taisteal ar sheirbhísí iompair speisialta. D’fhéadfadh tuismitheoir/caomhnóir nó bord bainistíochta scoile iarratas a dhéanamh ar a leithéid.

Is féidir tionlacan a chur ar fáil do ghasúir i scoileanna speisialta le míchumas coirp agus do ghasúir le deacrachtaí éisteachta nó radhairc. Is féidir le bord bainistíochta iarratais a dhéanamh.

Socruithe do ranganna speisialta

Ní chuirtear seirbhísí iompair ar fáil do ghasúir le riachtanais speisialta ach le linn dóibh bheith ar an rolla i rang speisialta. Má chuirtear an gasúr ar ais i ngnáthrang, ní chuirfear iompar speisialta ar fáil a thuilleadh.

Socruithe speisialta iompair do ghasúir an Lucht Siúil

Cuireann an Roinn Oideachais agus Scileanna deontas cúnta 98% ar fáil le costas iompair speisialta ceadaithe do ghasúir an Lucht Siúil amháin a íoc. Ní mór an Roinn a bheith sásta go bhfuil an tseirbhís riachtanach, gur féidir í a chur ar fáil ar chostas réasúnta agus gur scrúdaíodh aon rogha eile a d’fheilfeadh an cás. Siad na cúinsí a chuirtear san áireamh maidir le haon iarratas, líon na ngasúr a bhainfidh úsáid as an tseirbhís, líon na dturas agus an míleáiste laethúil.