Scéim Cúraim agus Oideachais Luath-Óige

Rialacha

Raon aoise incháilithe

De ghnáth tá leanaí incháilithe i gcomhair na scéime COLÓ má tá siad idir 3 bliana is 2 mhí agus 4 bliana is 7 mí d’aois ar 1 Meán Fómhair na bliana in a mbeidh siad ag tosú. Ciallaíonn sé sin go bhfuil leanaí a rugadh idir 2 Feabhra 2007 agus 30 Bealtaine 2008 (agus an dá dháta sin san áireamh) incháilithe le páirt a ghlacadh sa scéim sa bhliain scoile 2011/2012.

Don scoilbhliain a thosóidh i Meán Fómhair 2012, beidh leanaí a rugadh idir 2 Feabhra 2008 agus 30 Bealtaine 2009 (agus an dá dháta sin san áireamh) incháilithe le páirt a ghlacadh sa scéim.

Díolúintí ón riail aoise

Más rud é go bhfuil do leanbh os cionn na haoise incháilitheachta de bharr riachtanais speisialta d’fhéadfadh sé nó sí a bheith i dteideal díolúine a fháil ó uasteorainn aoise na Scéime COLÓ. Ba chóir duit scríobh chuig an Roinn Gnóthaí Leanaí agus Óige agus díolúine a iarraidh ón teorainn aoise (féach ar ‘Conas iarratas a dhéanamh’ thíos)

Más rud é gurb é beartas iontrála do bhunscoile áitiúla go gcaithfidh leanaí a bheith os cionn 5 bliana is 7 mí sula dtosaíonn siad ar scoil, féadfaidh tú iarratas a dhéanamh chuig an Roinn Gnóthaí Leanaí agus Óige chun díolúine a fháil ón uasteorainn aoise.

Ba chóir duit d’iarratas ar dhíolúine a chur isteach a luaithe agus is féidir.

Conas a chuirtear an scéim COLÓ ar fáil

Braitheann leagan amach na n-uaireanta oideachais réamhscolaíochta saor in aisce ar an gcineál seirbhíse a bhfuil do leanbh ag freastal uirthi agus ar leagan amach seachtainiúil na seirbhíse sin. Tá cur síos le fáil ar na cineálacha seirbhíse éagsúla inár ndoiciméad faoi roghanna maidir le cúram leanaí.

Seirbhísí in aghaidh an tseisiúin

Má tá do leanbh ag freastal ar feadh leathlae nó 'seirbhís in aghaidh an tseisiúin' ar naíonra, ar scoil Montessori nó le grúpa tuismitheoirí agus lapadán, mar shampla, is é an gnáthleagan amach atá ar an mbliain réamhscolaíochta saor in aisce ná 3 uaire in aghaidh an lae, 5 lá na seachtaine ar feadh tréimhse 38 seachtaine. Más rud é go bhfuil do leanbh ag freastal ar feadh breis agus 3 uaire gearrfar táille ort as an am breise.

Más rud é nach féidir leis an tseirbhís in aghaidh an tseisiúin a bhfuil do leanbh ag freastal uirthi a bheith oscailte 5 lá sa tseachtain, is é an gnáthleagan amach atá ann i gcomhair na bliana réamhscolaíochta saor in aisce ná 3 uaire is 30 nóiméad sa lá, 4 lá na seachtaine ar feadh tréimhse 41 seachtaine.

Seirbhísí cúram lae

Má tá do leanbh ag freastal go lánaimseartha nó go páirtaimseartha ar sheirbhís cúram lae is é an gnáthleagan amach i gcomhair na bliana réamhscolaíochta saor in aisce ná 2 uair is 15 nóiméad in aghaidh an lae ar feadh tréimhse 50 seachtaine. Gearrfar táille ort as an am breise má tá do leanbh ag freastal ar feadh tréimhse níos faide ná sin gach lá.

I gcás tuismitheoirí nach bhfuil a leanaí ag freastal go páirtaimseartha nó go lánaimseartha ar sheirbhís ach ar feadh 3 lá sa tseachtain, féadfaidh a leithéid de sheirbhís rogha a dhéanamh trí sheisiún réamhscolaíochta saor in aisce a mhairfidh 3 uaire is 45 nóiméad a chur ar fáil ar feadh tréimhse 50 seachtaine.

Ábhar agus cáilíocht na seirbhíse

Ní mór do na seirbhísí cúram leanaí atá ag glacadh páirte sa scéim COLÓ clár oideachais réamhscolaíochta iomchuí a chur ar fáil a chloíonn le prionsabail Síolta, an chreatlach náisiúnta d’oideachas agus cúram na luath-óige. Tabharfaidh comhordaitheoirí agus foireann an Choiste Cúram Leanaí áitiúil Cathrach/Contae tacaíocht do sheirbhísí rannpháirteacha trí chuairteanna cuiditheacha a thabhairt orthu agus comhairle a sholáthar.

Is féidir téarmaí agus coinníollacha ginearálta na scéime COLÓ agus bileog le haghaidh tuismitheoirí a fháil ar láithreán gréasáin Oifig an Aire Gnóthaí Leanaí agus Óige. Lena chois sin tá Nóta Faisnéise faoi na sonraí éagsúla a bhaineann leis na haoisteorainneacha.

Leanaí faoi riachtanais speisialta

Nuair a bunaíodh an scéim ar dtús, bhí áis ann chun bliain bhreise oideachais luath-óige a cheadú do leanaí a raibh míchumas suntasach acu agus a d'fhéadfadh tairbhe shuntasach a bhaint as bliain bhreise a chaitheamh ag freastal ar chúram nó oideachais luath-óige saor in aisce. Níl an áis seo le fáil tar éis mí Lúnasa 2011.

Seachas sin, má tá measúnú déanta go bhfuil míchumas suntasach ag an leanbh agus go mbainfeadh an leanbh tairbhe as freastal ar chúram nó oideachais luath-óige ar feadh 2/3 lá sa tseachtain seachas 5 lá, is féidir an bhliain oideachais luath-óige saor in aisce a leathnú thar trémhse dhá bhliain. Mar shampla, is féidir le do leanbh freastal ar feadh 2 lá sa tseachtain sa chéad bhliain agus ar feadh 3 lá sa tseachtain sa dara bliain.

Caithfidh tú cáipéisíocht iomchuí a sholáthar chun tacú le d'iarratas - féach 'Conas iarratas a dhéanamh' thíos.