Víosaí do mhic léinn

Eolas

Taisteal go hÉirinn le staidéar a dhéanamh

Ní mór do shaoránaigh ó thíortha áirithe atá ag iarraidh leo cúrsa léinn a dhéanamh in Éirinn iarratas a dhéanamh ar víosa le teacht go hÉirinn sula dtagann siad anseo. Tá an fhaisnéis ar iad siúd nach bhfuil gá le víosa iontrála ar fáil sa doiciméad: Riachtanais víosa le teacht isteach in Éirinn.

Ó Eanáir 2011 tá athruithe ar an gcóras inimirce do mhic léinn lánaimseartha neamh-LEE lena náirítear: teorainn leis an méid ama a fhéadann siad fanacht in Éirinn mar mhic léinn; agus socruithe idirthréimhseacha do mhic léinn neamh-LEE in Éirinn a dhéanfaidh na hathruithe difear dóibh.

Ní mór d’iarratasóirí i dtíortha áirithe a n-iarratais ar víosaí a dhéanamh ar líne ón 30 Meitheamh 2008 i leith. (Féach 'Conas iarratas a dhéanamh’.)

Ba chóir duit cur isteach ar ‘Víosa Staidéar C’ má tá sé ar intinn agat staidéar a dhéanamh in Éirinn ar feadh tréimhse níos lú ná trí mhí. Ba chóir duit cur isteach ar ‘Víosa Staidéar D’ má leanfaidh do chúrsa ar aghaidh níos faide ná trí mhí. Ní chuirfear síneadh ama le ‘Víosa Staidéir C’ de ghnáth tar éis duit teacht go hÉirinn. Is i gcásanna eisceachtúla amháin a chuirtear síneadh ama leis. Tá sé ríthábhachtach mar sin deimhin a dhéanamh go bhfuil a fhios agat cén fhad a mhairfidh do chúrsa sula gcuireann tú isteach ar víosa. Is féidir tuilleadh eolais a fháil faoi iarratas a dhéanamh chun síneadh ama a chur le víosa mic léinn sa chuid ‘Conas iarratas a dhéanamh’ thíos.

Beidh ort na nithe seo a leanas a sholáthar mar aon le d’iarratas ar víosa. (Ná déan dearmad le do thoil go bhfuil cáipéisí bunaidh ag teastáil agus go gcaithfidh siad a bheith as Béarla nó aistriúchán deimhnithe ag nótaire a bheith leo):

• Litir ó scoil/coláiste/ollscoil aitheanta in Éirinn ag dearbhú gur glacadh leat le haghaidh cúrsa staidéir. Caithfidh an cúrsa staidéir a bheith lánaimseartha (a mhairfidh ar feadh na bliana acadúla) agus ní mór 15 uaire staidéir ar a laghad a bheith i gceist in aghaidh na seachtaine.
• Cruthúnas go bhfuil sé d’acmhainn acadúil ionat an cúrsa a roghnaigh tú a dhéanamh trí mheán an Bhéarla (ach amháin más cúrsa Béarla atá ann).
• Fianaise gur íocadh na táillí i leith an chúrsa ina n-iomláine.
• Fianaise go bhfuil go leor airgid agat (€7,000) chun tú féin a chothú i rith chéad chuid na thréimhse a chaithfidh tú anseo.
• Fianaise go bhfuil sé ar do chumas nó ar chumas urra €7,000 ar a laghad a rochtain gach bliain ina dhiaidh sin mar aon le costas táillí na gcúrsaí gach aon bhliain.
• Fianaise go bhfuil árachas míochaine príobháideach agat
• Míniú faoi aon bhearna a bhí i do chuid cúrsaí staidéir
• Dearbhú go bhfuil sé ar intinn agat filleadh ar do thír bhuanchónaí nuair a fhágann tú Éire.

Ná déan dearmad, má thugtar víosa mic léinn duit le staidéar a dhéanamh in Éirinn nach dtugann sé seo aon cheart as féin d’aon duine eile teacht leat nó cuairt a thabhairt ort in Éirinn (bíodh an té sin gaolmhar leat nó ná bíodh).

Is féidir teacht ar faisnéis mhionsonraithe faoin a bhfuil ag teastáil chun víosa mic léinn a fháil ar láithreán gréasáin Seirbhís Eadóirseachta agus Inimirce na hÉireann de chuid na Roinne Dlí agus Cirt agus Comhionannais.

Murar gá dom víosa le dul go hÉirinn an gá dom víosa mic léinn le staidéar sa tír?

Ní gá. Mura bhfuil víosa iontrála riachtanach duit le teacht go hÉirinn ní gá víosa mic léinn le staidéar a dhéanamh anseo. Ní mór do gach duine nach náisiúnach de chuid LEE é nó í, lena n-áirítear daoine le víosaí, cead a fháil teacht isteach sa stát agus é sin a dhéanamh trí dhul i dteagmháil le hOifigeach Inimirce ag an bport iontrála. (Is iad 27 tír an Aontais Eorpaigh (AE) mar aon leis an Íoslainn, an Iorua, agus Lichtinstéin na tíortha LEE)

Ba chóir gach cáipéis a bhaineann le do chuid staidéir a bheith agat nuair a thagann tú tríd inimirce. Is é sin le rá gur chóir duit do litir, nó an tairiscint a fuair tú faoi áit a bheith agat i scoil nó in institiúid oideachais, a bheith ullamh agat chun go ndéanfaidh na hoifigigh inimirce í a iniúchadh. Féadfaidh tú tuilleadh a léamh inár ndoiciméad faoi cead tuirlingthe in Éirinn.

Cead fanachta

Maidir le mic léinn ó thíortha nach tíortha LEE iad, agus ar mian leo staidéar a dhéanamh in Éirinn ar feadh tréimhse níos faide ná trí mhí, ní mór dóibh clárú le hoifigeach inimirce an cheantair sin ina bhfuil siad ina gcónaí. (Is é sin Biúró Náisiúnta an Gharda Síochána um Inimirce má tá cónaí orthu i mBaile Átha Cliath). Formhuineofar a bpasanna leis na coinníollacha faoina bhfuil cead acu fanacht agus an tréimhse ama atá i gceist. Ó 1 Aibreán 2011 nuair atá siad ag clárú, ní mór dóibh €3000 a bheith acu. Is féidir eolas faoi na doiciméid atá riachtanach do mhic léinn nuair atá cead á iarraidh acu a fháil ar láithreán gréasáin Sheirbhís na hÉireann um Eadóirseacht agus Inimirce.

Féadfaidh tú a fháil amach conas clárú inár ndoiciméad faoi Clárú náisiúnach nach náisiúnaigh de chuid LEE iad in Éirinn.

Fostaíocht a fháil nuair atá tú in Éirinn ar víosa mic léinn

Tá cead ag mic léinn ó thíortha nach tíortha LEE iad, agus atá cláraithe lena n-oifigeach inimirce áitiúil, obair pháirtaimseartha a dhéanamh in Éirinn (ar feadh tréimhse 20 uair an chloig i rith na seachtaine agus go lánaimseartha le linn saoirí) chun iad féin a chothú. Ní mór duit a bheith ag freastal ar chúrsa lánaimseartha a mhairfidh ar feadh bliana ar a laghad agus a mbeidh cáilíocht aitheanta le fáil ag a deireadh. I measc na gcáilíochtaí sin tá na cinn a eisíonn Institiúid Teicneolaíochta Bhaile Átha Cliath, na hOllscoileanna, Comhairle na nDámhachtainí Breisoideachais agus Oiliúna agus Comhairle na nDámhachtainí Ard-oideachais agus Oiliúna. Tá ‘Clár na gClár Aitheanta ag an Aire Oideachais agus Scileanna chun críche rochtain mac léinn ar fhostaíocht’ tiomsaithe ag an Roinn Oideachais agus Scileanna. Tá Clár na gClár roinnte in dhá chuid:

1. Cláir a bhaineann le réimse disciplíní a chuirtear ar fáil do mhic léinn i gcoláistí tríú leibhéal agus breisoideachais a bhfuil cáilíochtaí bailíochtaithe faoi Chreatoibre Náisiúnta na gCáilíochtaí acu nó bailíochtaithe ag a choibhéis d’eagraíocht dámhachtana i ndlínse eile nó ag eagraíocht ghairmiúil a bhfuil bunús aici i ndlí na hÉireann
2. Déanann an Roinn Oideachais agus Scileanna cláir Bhéarla a fhaomhadh ar bhonn scéim cigireachta An Chomhairle um Scoileanna Béarla (ACELS).

Meastar gur 25 seachtaine agus ní 52 seachtaine fad na bliana acadúla agus ar an ábhar sin is féidir cúrsaí den fhad seo a liostáil ar an gclár.

Féadfaidh tú tuilleadh faisnéise a léamh faoi cearta fostaíochta oibrithe páirtaimseartha in Éirinn anseo.