An Cárta Eorpach um Árachas Sláinte

Rialacha

Is féidir leat iarratas a dhéanamh ar Chárta Eorpach um Árachas Sláinte ó húdaráis sláinte na hÉireann má bhaineann an méid seo a leanas leat:

• Tá tú i do chónaí de ghnáth in Éirinn agus níl íocaíocht Árachais Shóisialta á fáil agat ó Stát AE eile ná níl tú ag íoc as Árachas Sóisialta Stát AE eile, ná níl tú cleithiúnach ar dhuine dá leithéid.
• Tá tú i do chónaí i Stát AE eile agus níl íocaíocht Árachais Shóisialta Éireannach á fáil agat ná níl tú ag íoc as Árachas Sóisialta na hÉireann, ná níl tú cleithiúnach ar dhuine dá leithéid.

Dála an sean-E111, ní thugann an Cárta Eorpach um Árachas Sláinte teidlíocht duit ach amháin i leith na scéime cúraim sláinte stát-mhaoinithe sa tír ina bhfuil tú ag fanacht. Ní chlúdóidh sé aon cheann de na costais a ghabhann le d’iompar ar ais go hÉirinn.

Beidh a c(h)árta féin ag teastáil ó gach ball aonair de theaghlach nó de ghrúpa.

Beidh gach Cárta Eorpach um Árachas Sláinte bailí ar fud an LEE agus na hEilvéise ar feadh tréimhse nach mó ná 2 bhliain.

Is féidir leat Cárta Eorpach um Árachas Sláinte a fháil in Éirinn má tá tú i do chónaí anseo de ghnáth.

Ní thabharfaidh an Cárta Eorpach um Árachas Sláinte clúdach duit maidir le cúram sláinte i dtír ar bith lasmuigh den LEE, ach amháin i gcás na hEilvéise agus Oileáin Chairibeacha Ghuadalúip, a ghlacfaidh leis an gcárta fosta, ós spleáchríoch na Fraince iad.

Ní gá duit Cárta Eorpach um Árachas Sláinte a bheith agat d’fhonn cúram sláinte riachtanach a fháil fad is atá tú ar chuairt shealadach sa RA más cónaitheoir Éireannach tú. Is leor é cruthúnas a thabhairt go mbíonn tú i do chónaí in Éirinn de ghnáth. (Is éard atá i gcruthúnas go mbíonn tú i do chónaí in Éirinn de ghnáth ná ceadúnas tiomána, pas Éireannach nó doiciméad comhchosúil.)

Cad is ‘cúram sláinte riachtanach’ ann ó thaobh úsáid a bhaint as mo Chárta Eorpach um Árachas Sláinte?

Sainmhíníodh an téarma ‘cúram riachtanach’ faoi chinneadh 194 na bliana 2003 ón gCoimisiún Riaracháin maidir le Slándáil Shóisialach d’Oibrithe Imirceacha (pdf). Rinneadh sainmhíniú leis an gcinneadh sin ar chúram riachtanach mar tairbhí a thugtar ionas nach mbeadh ar dhuine a bhfuil árachas aige/aici dul abhaile chuig an mballstát as a dtáinig sé/sí agus cuireann sé ar a c(h)umas leanúint ar aghaidh lena f(h)anacht sealadach i mballstát eile faoi dhálaí míochaine sábháilte. Sonraíonn an cinneadh nach gclúdaíonn sé daoine a dhéanann taisteal san Eoraip d’fhonn cóir leighis a fháil i dtír seachas sin ina bhfuil siad faoi árachas.

Tá tuilleadh faisnéise maidir le cearta agus oibleagáidí na ndaoine a bhfuil Cárta Eorpach um Árachas Sláinte acu agus a mbaineann úsáid as anseo.

Conas is féidir liom mo Chárta Eorpach um Árachas Sláinte a athnuachan?

Ní dhéanfar do Chárta a athnuachan go huathoibríoch - beidh ort iarratas a dhéanamh chun do Chárta a athnuachan. Féach 'Conas iarratas a dhéanamh' thíos le haghaidh treoracha.

Cuimhnigh, más rud é go bhfuil athrú tagtha ar aon cheann de do chuid sonraí (m.sh. seoladh, srl) ón am a eisíodh do chárta deireanach tá ort teagmháil a dhéanamh le d’Oifig Sláinte Áitiúil d’fhonn an fhaisnéis sin a nuashonrú roimh an athnuachan.

Cad é an scéal mura bhfuil mo Chárta faighte agam sula ndéanaim taisteal?

Mura bhfuil do Chárta Eorpach um Árachas Sláinte faighte agat, is cuma an chúis, is féidir leat Teastas Ionadach Sealadach a fháil. Tá an teidlíocht chéanna agat leis an Teastas is atá leis an gCárta, ach ar feadh tréimhse níos giorra. Is féidir leat iarratas a chur isteach ar an Teastas ar líne, tríd an bpost nó go pearsanta ag an Oifig Sláinte Áitiúil. (Féach ‘'Cá háit a ndéanfaidh mé iarratas' thíos). Eisítear aon Teastas Ionadach Sealadach amháin in aghaidh an duine.

Cárta Eorpach um Árachas Sláinte a úsáid in Éirinn

Tá breis is 2,000 dochtúirí teaghlaigh (DG) in Éirinn a bhfuil conradh acu le haghaidh scéim an Chárta Eorpaigh um Árachas Sláinte. Más náisiúnach AE/LEE tú a bhfuil Cárta Eorpach um Árachas Sláinte (nó a chomhionann) agat agus tú ar chuairt in Éirinn is féidir leat leas a bhaint as seirbhísí riachtanacha dochtúirí teaghlaigh agus as cóireáil fiaclóireachta éigeandála chun faoiseamh a fháil ó phian (agus cíor fiacla a dheisiú) faoi rialacháin AE. Is féidir teagmháil a dhéanamh le seirbhísí in Éirinn trí ghlao a chur ar 999 nó ar 112, saor in aisce. Tá tuilleadh faisnéise maidir le conas cóireáil ó dhochtúir teaghlaigh nó ó fhiaclóir, leigheasanna oidis agus cóireáil ó ospidéil a fháil agus tú ar cuairt in Éirinn ar fáil anseo.