Na háiseanna páirceála do dhaoine le míchumas

Eolas

Tá réimse leathan áiseanna páirceála ar fáil do dhaoine le míchumas i mbailte agus cathracha ar fud na hÉireann. Tá spásanna páirceála do dhaoine le míchumas níos leithne ná na gnáth spásanna páirceála sa chaoi agus go mbeidh siad níos insroichte. Tá siad i gcónaí le fáil in áiteanna príomhiúla in aice an tslí isteach chuig foirgnimh i gcathracha agus bailte srl. Tá na spásanna páirceála le haghaidh daoine le míchumas máirceáilte go soiléir le comharthaí agus marcanna bóithre. (Go hiondúil is í an tsiombal "insroichteacht" a bhíonn ann mar mharcanna bóithre).

Cé nach bhfuil aon dualgas dlíthiúil ar na húdaráis áitiúla spásanna páirceála do dhaoine le míchumas a sholáthar, cuirtear ar fáil méid áirithe spásanna le páirceáil ar an tsráid agus i gcarrclóis de chuid an údaráis áitiúil agus i gcarrclóis na bhfoirgneamh poiblí. Beidh na háiteanna ina bhfuil na spásanna seo leagtha síos i bhfó-dlíthe an údaráis áitiúil. Mura féidir eolas a fháil ar an idirlíon cá bhfuil spásanna do dhaoine le míchumas, ba cheart duit teagmháil a dhéanamh leis an údarás áitiúil.

Níl aon dualgas dlíthiúil ar ionaid tráchtála mar shampla ollmhargaí agus ionaid siopadóireachta áiseanna páirceála do dhaoine le míchumas a sholáthar dona gcuid custaiméirí. Tá riachtanais áirithe leagtha amach i rialacháin fhoirgnimh maidir le háiseanna taobh istigh agus maidir leis an slí isteach chuig foirgneamh (mar shampla, ardán sa chaoi is go mbeidh sé insroichte ag cathaoir rothaí) ach níl an timpeallacht taobh amuigh de fhoirgneamh clúdaithe ag aon reachtaíocht (mar shampla, áiseanna páirceála ). Ní dhiúltófar cead pleanála, muna mbeidh áiseanna páirceála do dhaoine le míchumas san áireamh san iarratas pleanála. Ach mar sin féin seans go ndéanfaidh lucht pleanála an údaráis áitiúil moladh gur cheart spásanna páirceála do dhaoine le míchumas a sholáthar agus is féidir coinníoll a chur leis an gcead a chuireann iachall ar an tógálaí agus ar an ailtire na háiseanna seo a chur san áireamh.

Pionóis le mí-úsáid spásanna páirceála do dhaoine le míchumas

Tá polasaí láidir i bhfeidhm ag na hÚdaráis Áitiúla ar fud na tíre maidir le spásanna atá in áirithe do dhaoine le míchumas. Gearrfar fíneáil 19 euro "ar an spota" ar thiománaithe a fhágann a gcuid carrana i spásanna atá coinnithe do dhaoine le míchumas agus nach bhfuil an Cárta Eorpach Páirceála bailí acu. Sna ceantair ina bhfuil clampáil i bhfeidhm (Baile Átha Cliath, Corcaigh agus Gaillimh) déanfar clampáil ar charranna atá páirceáilte go mí-dhleathúil sna spásanna seo agus beidh táille 80 euro le n-íoc leis an gcarr a shaorú.

Tá an dualgas ar oibritheoirí na gcarrchlós príobháideach, monatóireacht a dhéanamh sna carrclóis ar úsáid spásanna páirceála do dhaoine le míchumas agus is féidir clampáil a dhéanamh ar charranna atá páirceáilte go mí-dhleathúil i gcarrclóis phríobháideacha. Braitheann an táille a bheidh le n-íoc leis an gcarr a shaorú ar an oibritheoir. Ní éiseoidh Gardaí ná Maoir Tráchta ticéid do dhaoine atá páirceáilte go mí-dhleathúil i spásanna do dhaoine le míchumas i gcarrclós príobháideach.

Cuirtear in iúl go bhfuil an spás páirceála in áirithe le comhartha ina cholgsheasamh nó crochta ar a bhfuil an tsiombal "Insroichteachta".

Forálann an tAcht um Thrácht ar Bhóithre 2002 do chóras táillí seasta nua a chur in áit na bhfíneálacha ‘ar an spota’. Tá uasleibhéil na bhfíneálacha seasta sin fíor-ard i gcomórtas leis an bhfíneáil reatha de 19 euro ‘ar an spota’. Níl fíneálacha seasta le haghaidh mí-úsáid spásanna páirceála do dhaoine faoi mhíchumas i bhfeidhm i láthair na huaire agus tá gá le riachtanais dlíthiúla faoi leith chun na fíneálacha nua a chur i bhfeidhm. Tá súil ag An Roinn Iompair, Turasóireachta agus Spóirt go dtabharfar isteach na rialacháin seo níos déanaí sa bhliain 2005. Go n-uige sin, fanann an fhíneáil má pháirceálann tú i spás do dhuine faoi mhíchumas ná 19 euro, sin mura bhfuil Cárta Páirceála Eorpach bailí agat.