Rialú tacsaithe agus feithiclí beaga seirbhíse poiblí

Rialacha

Cad a dhéanann an Rialtóir Tacsaithe?

Is iad na dualgais atá ar an Rialtóir ná:

• Maoirsiú a dhéanamh ar cheadúnais gach tacsaí, hacnaí agus limisín. Déanann siad próiseáil ar iarratais, eisíonn siad agus déanann siad athnuachan ar cheadúnais d’fheithiclí beaga seirbhíse poiblí agus a dtiománaithe. Déantar é seo tríd an gCóras Náisiúnta Tástála Carranna ar son an Choimisiúin. Go dtí Deireadh Fómhair 2005, bhí gach údarás áitiúil in Éirinn freagrach as ceadúnais d’fheithiclí beaga seirbhíse poiblí a eisiúint. Tar éis chur i bhfeidhm IR 651 de 2005 Na Rialacháin fán Acht um Rialáil Tacsaithe 2003 (Táillí agus Ceadúnú) 2005 aistríodh an fhreagracht don fheidhm sin go hoifigiúil ó na húdaráis áitiúla chuig an gCoimisiún.
• Clár na gCeadúnas a bhainistiú mar a leagtar síos faoi Alt 38 den Acht um Rialáil Tacsaithe 2003. Tá faisnéis thábhachtach faoi gach feithicil beag seirbhíse poiblí agus a dtiománaithe sa chlár seo, an fhaisnéis seo a leanas ina measc:
• (a) Ainm agus seoladh an tsealbhóra ceadúnais
• (b) Uimhir cheadúnais
• (c) Ceantar inar ceadaíodh an ceadúnas
• (d) Uimhir chláraithe na feithicle
• (e) Uimhir cheadúnas tiomána an tsealbhóra
• (f) Catagóir na feithicle bige seirbhíse poiblí
• (c) Dáta ar tugadh an ceadúnas
• (h) Aistriú sonraí úinéireachta
• (i) Sonraí maidir le haon fhionraí / cúlghairm ar cheadúnas an tiománaí
• Chun a chinntiú go gcloínn tiománaithe leis na dualgais éagsúla atá ar thiománaithe feithiclí beaga seirbhíse poiblí mar a leagadh síos iad in Alt 39 den Acht um Rialáil Tacsaithe 2003. Clúdaíonn na rialacha seo caitheamh i gceart le paisinéirí, táillí a ríomh agus úsáid an mhéadair, taispeáint ceadúnais, eisiúint admhálacha agus cloí leis an mbealach is giorra is féidir.
• Cinntiú go gcloínn paisinéirí leis na rialacha a bhaineann leis na dualgais atá ar phaisinéirí. Faoi Alt 40 den Acht um Rialáil Tacsaithe 2003, ní mór do phaisinéirí feithiclí beaga seirbhíse poiblí cloí le rialacháin áirithe nuair atá siad ag taisteal i dtacsaí, hacnaí nó limisín. Cuimsíonn na rialacha seo gan damáiste a dhéanamh don fheithicil, gan an tiománaí a chur i mbaol, agus an táille aontaithe a íoc.
• Uastáillí tacsaí a shocrú.
• A chinntiú go gcomhlíonann an fheithicil bheag seirbhíse poiblí caighdeáin feithicle mar a leagtar síos iad in IR 190/1963 Rialacháin um Thrácht ar Bhóithre (Tógáil, Trealamh agus Úsáid Feithiclí), 1963. Déantar é seo tríd an tSeirbhís Náisiúnta Tástála Carranna.
• Rialacháin an Achta um Rialáil Tacsaithe 2003 a chur i bhfeidhm. Faoi Alt 49 den Acht um Rialáil Tacsaithe 2003 tá an Coimisiún ag earcú oifigigh forfheidhmithe faoi láthair chun seiceáil randamach a dhéanamh agus imscrúdú a dhéanamh ar ghearáin.

Tá gach cumhacht a thugtar don Choimisiún faoin Acht um Rialáil Tacsaithe 2003 i bhfeidhm go hiomlán seachas Alt 36 den Acht um Rialáil Tacsaithe 2003. Déanann an tAlt sin foráil do dhícháiliú uathoibríoch tiománaí a bhfuil ceadúnas feithiclí beaga seirbhíse poiblí aige má chiontaítear é i gcionta tromchúiseacha coiriúla áirithe.

Caighdeáin feithicle

Foilsíodh na ceanglais nua maidir le Caighdeáin Feithiclí Náisiúnta d’fheithiclí beaga seirbhíse poiblí an 26 Samhain 2007. Tá béim ar leith sna Caighdeáin ar fheithiclí a bhfuil rochtain iontu do chathaoireacha rotha, ag tógáil dearcadh fadtéarmach maidir le cur i bhfeidhm Chineál Cheadú CE don tionscal athchóirithe agus tógála cóiste.

Tháinig na National Vehicle Standards (pdf) nua i bhfeidhm an 1 Eanáir 2009.