Táillí le haghaidh seirbhísí tacsaí, hacnaí agus limisín

Rialacha

Tacsaithe

Faoi Rialacháin reatha, is é an t-uastáille tacsaí an tsuim is airde is féidir le tiománaí tacsaí a ghearradh ort. Roimhe seo, limistéir shoiléire a bhí sna limistéir thacsaiméadair arna gcinneadh ag na húdaráis áitiúla le struchtúir táillí éagsúla áit ar ceadaíodh do thacsaithe feidhmiú. Le hAlt 45 den Acht um Rialáil Tacsaithe 2003, aistríodh an chumhacht le limistéir thacsaiméadair a chinneadh chuig an gCoimisinéir um Rialáil Tacsaithe agus d’fhógair an Coimisiún gurb aon limistéar náisiúnta tacsaiméadair amháin í an tír. Tá sé de chumhacht ag an gCoimisiún na huastáillí tacsaí a shocrú do limistéir thacsaiméadair freisin.

Píosa trealaimh a dtugtar tacsaiméadar air a ríomhann na táillí tacsaí agus bíonn sé le feiceáil amuigh chun tosaigh san fheithicil. Ríomhann an méadar an táille de réir ama agus achair. Caithfear gach tacsaiméadar a thástáil agus a shéalú sular n-úsáidtear i dtacsaithe iad. An tSeirbhís Mhéadreolaíochta Dlí a dhéanann é seo. Tá an tSeirbhís Mhéadreolaíochta Dlí ina cuid de Údarás Náisiúnta Caighdeán na hÉireann (ÚNCÉ) agus tá an tseirbhís freagrach as an dlí a fhorfheidhmiú maidir leis an mbealach a úsáidtear ionstraimí tomhais sa saol gnó.

Hacnaithe

Ní shuiteáiltear tacsaiméadair (is é sin, trealamh a shuiteáiltear chun táillí tacsaí a thaifeadadh) i hacnaithe agus mar gheall air sin, ní bhíonn uastáillí i gceist leo. Caithfidh an tiománaí agus an paisinéir gach táille a chomhaontú sula dtosaíonn an turas.

Limisíní

Mar aon le hacnaithe, ní shuiteáiltear tacsaiméadair i limisíní agus mar sin, arís, ní bhíonn uastáillí i gceist. Má roghnaíonn tú seirbhísí limisín a fhruiliú, caithfidh tú aon táillí a chomhaontú leis an tiománaí sula dtosaíonn do thuras.

Cártaí táillí

Is éard atá i gcárta táillí ná cárta a chaithfear a chur ar taispeáint i ngach tacsaí agus lena dtaispeáintear conas a ríomhtar limistéar na táille. Tá mionsonraí maidir le hachar, am agus míreanna breise ar an gcárta. Ba chóir go mbeadh an cárta táillí ar taispeáint go soiléir áit a mbeidh sé éasca ag an bpaisinéir é a fheiceáil.

Tá sé d’oibleagáid ar gach tacsaí ceadúnaithe eolas do phaisinéirí, lena n-áirítear cearta agus freagrachtaí agus eolas maidir le táillí, a chur ar taispeáint amuigh chun tosaigh agus ar chúl na feithicle. Soláthróidh an Coimisiún um Rialáil Tacsaithe an t-eolas seo.

Rialacháin Reatha

Faoi Alt 39 den Acht um Rialáil Tacsaithe 2003, is cion é má ghearrann tiománaí tacsaí nó hacnaí táille ort ar mó é ná an t-uastáille atá ar taispeáint ar an méadar nó an táille a comhaontaíodh ag tús an turais. Má mheasann tú gur gearradh táille iomarcach ort, tá tú i dteideal gearán a dhéanamh faoin tiománaí tacsaí. Faoi Alt 40 den Acht um Rialáil Tacsaithe 2003, is cion é mura gcomhaontaíonn paisinéir in SPSV an táille comhaontaithe nó an t-uastáille a thaispeántar ar an tacsaiméadar a íoc. Tá an tiománaí i dteideal iarraidh ort a chruthú go bhfuil sé d’acmhainn agat an táille a íoc sula dtosaíonn an turas. Mura féidir leat é seo a chruthú, is féidir leis diúltú tú a thabhairt leis ar an turas.

Faoi Alt 39 den Acht um Rialáil Tacsaithe 2003, tá tú i dteideal admháil phriontáilte a fháil ag deireadh an turais tacsaí tar éis duit íoc as. Ba chóir go mbeadh mionsonraí faoin dáta, faoi fhad an turais, faoin achar agus faoin tsuim a íocadh ar an admháil chomh maith le huimhir cheadúnais na feithicle.

An féidir liom gearán a dhéanamh faoi tháille tacsaí?

Is féidir. Má tá táille ina cnámh spairne agat, ba chóir an táille a thaispeántar ar an méadar a íoc mar aon le míreanna breise. Ba chóir duit a chinntiú go bhfaighidh tú admháil phriontáilte agus gearán foirmiúil a dhéanamh leis an gCoimisiún um Rialáil Tacsaithe. Féach ár ndoiciméad maidir le gearán a dhéanamh faoi thiománaí tacsaí, hacnaí nó limisín.