Ceadúnais tiomána foghlaimeora le haghaidh ghluaisrothar

Rialacha

Sula bhfoghlaimíonn tú chun tiomáint ar bhóithre poiblí, ní mór duit ceadúnas tiomána foghlaimeora a bheith agat a chuimsíonn an catagóir gluaisrothair is mian leat a thiomáint. Ní mór teastas do thástáil teoirice a fháil sula mbronnfar ceadúnas foghlaimeora gluaisrothair. Ní mór a thabhairt faoi deara nach bhfuil cead ag sealbhóirí ceadúnais foghlaimeora paisinéirí cúlóige a iompar (.i. paisinéirí ar chúl a ngluaisrothair) nó tiomáint ar mhótarbhealach.

Ní mór do thiománaithe gluaisrothair le ceadúnais foghlaimeora L phlátaí a léiriú ar thabard ard-infheictheacht fluaraiseach buí. (Is beannóg nó éadach seachtrach gan muinchillí le huaimeanna oscailte ar na taobhanna atá i tabard). Ní mór an litir ‘L’ a bheith ar a laghad 15cm ar airde ar chúlra bán agus a bheith ar do bholg agus ar do dhroim. Is cion coiriúil atá ann do thiománaithe gluaisrothair atá ina bhfoghlaimeoirí gan L phlátaí a bheith ar taispeáint acu.

Catagóirí gluaisrothair

Tá trí chatagóir gluaisrothair in Éirinn atá ceadaithe chun úsáidte ar bhóithre poiblí. Tá aoiseanna íosta sainithe ann do thiománaithe gluaisrothair freisin.

Tá srian i bhfeidhm ar cheadúnais foghlaimeora Catagóir A. Cuireann an srian seo teorainn ar an sealbhóir ceadúnais do ghluaisrothair (le nó gan taobhcharr) atá faoi réir teorainn cumhachta de 25Kw. Fanann an srian seo i bhfeidhm ar feadh dhá bhliain ón uair a chríochnaíonn tú do thástáil tiomána gluaisrothair don chatagóir seo agus tar éis duit do cheadúnas tiomána iomlán a fháil don chatagóir seo.

Is iondúil go mbíonn ceadúnas foghlaimeora chun gluaisrothar a thiomáint bailí ar feadh dhá bhliain. Ní féidir leat tástáil tiomána a dhéanamh ar feadh ar a laghad sé mhí tar éis duit do chéad cheadúnas foghlaimeora a fháil (sa chás nach bhfuil tú ag athrú ó cheadúnas sealadach go ceadúnas foghlaimeora).

Ón uair a bunaíodh an tSeirbhís um Thástáil Teoirice Tiomána in 2001, ní mór teastas do thástáil teoirice a fháil sula mbronnfar an chéad cheadúnas foghlaimeora do ghluaisrothar. Ní féidir leat cur isteach ar an tríú ceadúnas foghlaimeora murar féidir leat a chruthú go:

• ndearna tú tástáil tiomána sa tréimhse dhá bhliain díreach roimh an iarratais (ceadófar ceadúnas foghlaimeora dhá bhliain)

Nó

• Fianaise de dháta tástála atá ag teacht aníos (ceadófar ceadúnas foghlaimeora ar feadh bliana)

Má chuaigh do cheadúnas sealadach in éag 5 bliana ó shin, ní mór duit scrúdú teoirice a dhéanamh sula n-eiseofar ceadúnas foghlaimeora.

Má athraím m’ainm nó mo sheoladh, an gá dom iarratas a dhéanamh ar cheadúnas foghlaimeora gluaisrothair nua?

Cé nach mór duit do cheadúnas foghlaimeora a bheith leat an t-am ar fad nuair atá tú ag tiomáint, níl aon iachall ort faoin dlí do cheadúnas a athrú má athraíonn tú d’ainm nó do sheoladh. Moltar duit é sin a dhéanamh, áfach. Tá iachall ort fianaise ded’ cheadúnas a thaispeáint má iarrann An Garda Síochána ort é sin a dhéanamh, agus mar sin ba chóir faisnéis chun dáta a bheith ar do cheadúnas.

Is seirbhís saor in aisce atá i gceist chun do cheadúnas a mhalartú chun d’ainm nó do sheoladh a athrú. Tá sé saor in aisce freisin droimscíobh a bhaint de cheadúnas, catagóir de bhreis a chur leis, nó botún a cheartú.

Ní mór duit foirm iarratais comhlánaithe, 2 ghrianghraf den chineál a úsáidtear do phas (agus iad sínithe ar a gcúl) agus aon dhoiciméid tacaíochta a theastaíonn, cosúil le bunchóip de theastas pósta, a sheoladh isteach. Téigh i dteagmháil le d’Oifig Mótarchánach áitiúil chun tuilleadh faisnéise a fháil.

Cén chaoi a ndéanaim ceadúnas foghlaimeora atá caillte nó goidte a athsholáthar?

Má cailleadh do cheadúnas foghlaimeora reatha, nó má goideadh é, má rinneadh damáiste dó nó má loiteadh é, ba chóir duit iarratas a dhéanamh chuig d’Oifig Mótarchánach áitiúil chun ceadúnas a fháil ina áit. Tá an ceadúnas seo ina chóip díreach de do bhuncheadúnas foghlaimeora. Is féidir leat tuilleadh a fháil amach inár ndoiciméad ar athchóip a fháil de cheadúnas foghlaimeora Éireannach a cailleadh nó a goideadh.