Do cheadúnas tiomána a athrú go ceadúnas tiomána Éireannach

Rialacha

Sealbhóirí ceadúnais arna n-eisiúint ag ballstát AE/LEE

Má tá ceadúnas tiomána agat a d’eisigh ballstát AE/LEE, is féidir leat tiomáint in Éirinn chomh fada is atá do cheadúnas reatha bailí. Más mian leat do cheadúnas tiomána a mhalartú i gcomhair ceadúnas tiomána Éireannach comhionann, ní mór duit é sin a dhéanamh taobh istigh de 10 mbliana ón dáta a théann do cheadúnas tiomána in éag.

Sealbhóirí ceadúnais arna n-eisiúint ag stáit aitheanta

Tá comhaontuithe ag Éire le tíortha/stáit áirithe eile a shannann iad mar stáit aitheanta chun cuspóirí mhalartú ceadúnais tiomána. Is iad sin:

• an Astráil
• Giobráltar
• Geansaí
• Manainn
• an tSeapáin
• Geirsí
• An Afraic Theas
• An Chóiré Theas
• An Eilvéis
• Nua-Shéalainn*
• Téaváin*

*Cuireadh faoi IR 402/2010 Nua-Shéalainn agus Téaváin le liosta na stáit aitheanta ach le cáilíochtaí áirithe.

Más sealbhóir tú de cheadúnas a d’eisigh ceann de na stáit seo, is féidir leat tiomáint in Éirinn nuair a thagann tú ar cuairt, chomh fada is atá do cheadúnas bailí. Má bhíonn gnáthchónaí ort in Éirinn, is féidir leat tiomáint ar feadh suas le 12 mhí ón dáta a thagann gnáthchónaí ort, chomh fada is nach bhfuil do cheadúnas imithe in éag. Meastar go bhfuil gnáthchónaí ort in Éirinn má bhíonn cónaí ort anseo go hiondúil ar feadh ar a laghad 185 lá i ngach bliain féilire, mar gheall ar cheangal pearsanta agus ceirde.

Más mian leat do cheadúnas tiomána a mhalartú i gcomhair ceadúnas tiomána comhionann Éireannach, ní mór duit é sin a dhéanamh taobh istigh de bhliain amháin ón uair a théann do cheadúnas tiomána in éag.

Sealbhóirí cheadúnais tiomána ó thíortha eile

Murab as aon cheann de na tíortha thuas thú, (mar shampla, más as Cheanada nó na Stáit Aontaithe thú) agus go bhfuil do cheadúnas tiomána náisiúnta féin nó ceadúnas tiomána idirnáisiúnta agat ó do thír féin, is féidir leat tiomáint in Éirinn ar feadh do chuairt sealadach (suas le 12 mhí).

Má tá tú ag fanacht in Éirinn ar feadh tréimhse níos faide ná 12 mí, is féidir leat iarratas a dhéanamh ar cheadúnas tiomána Éireannach, ach beidh ort dul tríd an nós imeachta ceadúnaithe tiománaithe iomlán. Ní mór duit tástáil teoirice tiomána a dhéanamh ar dtús, iarratas a dhéanamh ar cheadúnas tiomána foghlaimeora agus do thástáil tiomána a dhéanamh in Éirinn. Má éiríonn leat i do thástáil tiomána, eiseofar ceadúnas tiomána Éireannach iomlán duit.

Catagóirí Feithiclí

Tá mótarfheithiclí in Éirinn roinnte i gcatagóirí éagsúla ar mhaithe le ceadúnú tiománaithe. Is é seo an gnáthchleachtas ar fud an Aontais Eorpaigh. Tá 14 catagóir san iomlán ag Éire, ag dul ó ghluaisrothair go feithiclí talmhaíochta. Is féidir leat tuilleadh faisnéise a fháil inár ndoiciméad ar chatagóirí feithiclí agus aoiseanna íosta thiománaithe.

Cionta tiomána a rinneadh i ndlínsí eile

Níl pointí pionóis agus droimscíobh ar cheadúnas tiomána a fuarthas i stáit eile (lena n-áirítear ballstáit AE/LEE) aitheanta in Éirinn. Seo mar gheall go bhfuil na pionóis seo eisithe ag cúirteanna i ndlínsí eile. Go praiticiúil, ciallaíonn sé seo má fuair tú pointí pionóis nó droimscríobh ar cheadúnas tiomána roimh duit a theacht go hÉirinn, nach n-aistríonn na pointí pionóis nó driomscríobh seo go ceadúnas tiomána Éireannach. Má tá tú cosctha ó thiomáint i ndlínse eile, áfach, (mar shampla, mar gheall ar thiomáint ar meisce) ní gá go mbeidh tú ábalta do cheadúnas reatha a mhalartú i gcomhair ceadúnas tiomána Éireannach.

Má tá tú ag tiomáint ar cheadúnas tiomána eachtrannach in Éirinn agus go bhfaigheann tú pointí pionóis anseo, gheobhaidh tú an ghnáth-fhíneáil reachtúil ach ní chuirfear na pointí pionóis ar do cheadúnas tiomána eachtrannach. Má mhalartaíonn tú do cheadúnas tiomána eachtrannach i gcomhair ceadúnas tiomána Éireannach ina dhiaidh sin, cuirfear do phointí pionóis Éireannacha i bhfeidhm ar do cheadúnas tiomána Éireannach.