Forlíonadh Ioncaim Teaghlaigh

Rialacha

Íocaíocht sheachtainiúil shaor ó cháin é an FIT d’fhostaithe:

• A dhéanann 19 n-uaire an chloig a oibre ar a laghad sa tseachtain (nó 38 uair an chloig ar a laghad in aghaidh na coicíse). Is féidir leat na huaireanta seachtainiúla a d’oibrigh tú a shuimiú le huaireanta do chéile, do pháirtnéara shibhialta nó do chomháititheora chun an coinníoll seo a shásamh. Ní féidir leat am a chaith tú i mbun féinfhostaíochta a úsáid chun an coinníoll seo a shásamh.
• Sa chás gur dóigh go mairfidh fostaíocht 3 mhí ar a laghad
• A bhfuil leanbh amháin ar a laghad faoina gcúram, agus
• A thuilleann níos lú ná suim ar leith ar a dtagann athrú de réir mhéid an teaghlaigh.

Go hiondúil, leanann an íocaíocht ar feadh bliana agus ní thagann aon athrú uirthi de bharr ardú pá, mar shampla, méadú nó laghdú ar thuillimh. Is é an t-aon chás inar féidir leat iarratas a dhéanamh ar mhéadú ar ráta do FIT ná le linn na tréimhse 52 seachtain má thosaíonn tú le cúram a thabhairt do leanbh breise.

Má chailleann tú do phost nó má tá uaireanta laghdaithe oibre agat

Má laghdaítear do phá san ionad oibre, ní thiocfaidh aon athrú íocaíochta ar an bhForlíonadh Ioncam Teaghlaigh (FIT). Ní bheidh méadú i gceist. Mar sin féin, nuair a chríochnaíonn d'íocaíocht FIT, is féidir leat iarratas a dhéanamh in athuair ag tabhairt sonraí faoi d’ioncam nua laghdaithe. (Is gnách go n-íoctar an FIT ar feadh 52 seachtain. Ag deireadh na 52 seachtain, is féidir leat athchur isteach ar an FIT.)

Má laghdaítear na huaireanta oibre a oibríonn tú gach seachtain go dtí faoi bhun 19 n-uaire in aghaidh na seachtaine (38 uair in aghaidh na coicíse), ní bheidh tú i dteideal an FIT a fháil a thuilleadh. Ba chóir duit fógra a thabhairt don rannnóg FIT má thiteann do chuid uaireanta faoi bhun an riachtanais íosta.

Má chailleann tú do phost ní bheidh tú i dteideal an FIT a fháil a thuilleadh. Ní mór duit fógra a thabhairt don rannóg FIT.

An FIT a fháil le híocaíocht eile leasa shóisialaigh

Ní féidir leat an FIT a fháil má tá páirt á glacadh agat i Scéim Fostaíocht Pobail, i Scéim TÚS nó in aon scéim eile de chuid FÁS seachas Dreasacht Poist.

Ní féidir leat an FIT a fháil má tá ceann amháin de na híocaíochtaí leasa shóisialaigh a leanas á bhfáil agat:

• Sochar Cuardaitheora Poist nó Liúntas Cuardaitheora Poist
• Pinsean Stáit (Idirthréimhse) nó Liúntas Réamhscoir

Má tá ceann de na híocaíochtaí seo á bhfáil ag do chéile, do pháirtí sibhialta nó do chomháititheoir, is féidir leat a bheith i dteideal an FIT a fháil. Déanfar measúnú ar a n-íocaíocht leasa shóisialaigh, áfach, amhail ioncam ar mhaithe le cuspóirí an FIT. Má cháilítear thú don FIT, ní bhfaighidh siad íocaíocht duit a thuilleadh agus beidh tionchar aige seo ar aon Mhéadú i leith Leanbh Cáilithe.

Má tá tú i do thuismitheoir i d’aonair, d’fhéadfá bheith i dteideal an FIT sa mhullach ar d’Íocaíocht Teaghlach Aontuismitheora, Sochar Bean Chéile Tréigthe nó Pinsean Baintrí, Baintreach Fir nó Páirtnéara Shibhialta Mharthanaigh (Ranníocach).

Faoin Acht um Chosaint Mháithreachais, 1994, tá bean a gcáilítear í do Shochar Máithreachais, Sochar Uchtaíoch nó Sochar Sláinte agus Sábháilteachta i dteideal FIT a éileamh (a fhad agus a chomhlíonann sí na coinníollacha íocaíochta FIT agus go bhfuil clann aici – ní cháilítear bean atá ag iompar clainne nach bhfuil aon leanaí eile aici don FIT go dtí go saolaítear an leanbh). Ní mór go mbeidh d’ioncam faoi bhun na teorann ioncaim ar mhéid do theaghlaigh. (Má tá Sochar Máithreachais á éileamh agat, ríomhtar do mheántuillimh sheachtainiúla trí d'olltuillimh a úsáid go dtí seo nó trí do P60 a úsáid). Íocfar ansin d’éileamh ar FIT ar feadh bliain amháin ó thús d’íocaíochta Sochar Máithreachais (má tá leanbh agat cheana féin) nó nuair a shaolaítear do leanbh, más é/í do chéad leanbh. Níl tú i dteideal leanúint leis an FIT a éileamh má ghlacann tú le saoire bhreise mháithreachais nó uchtaíoch neamhíoctha, mura bhfilleann tú ar an obair i ndiaidh saoire mháithreachais nó uchtaíoch nó má chailleann tú do phost tar éis filleadh ar an obair.

Cothabháil

Is féidir le tuismitheoir scartha cur isteach ar an FIT a luaithe a chomhlíonann siad na coinníollacha cáilitheacha agus

• go bhfuil siad ina gcónaí leis na leanaí nó
• Go bhfuil cothabháil iomlán á híoc acu don iarchéile, iarpháirtnéir nó iar-chomháititheoir lena gcónaíonn na leanaí

Ciallaíonn cothabháil iomlán a íoc nach mór don chothabháil a íocann tú, an t-iarratasóir ar an FIT, bheith an t-aon ioncam atá ag d’iarchéile, iarpháirtnéir sibhialta nó ag d’iar-chomháititheoir.

Ní féidir ach íocaíocht FIT amháin a dhéanamh do theaghlach

Cothabháil a íoc

Más tuismitheoir scartha thú agus má tá cothabháil á híoc agat, d’fhéadfá cáiliú don FIT. Chun cáiliú, ní mór duit cothabháil iomlán a bheith á híoc agat leis an tuismitheoir lena gcónaíonn na leanaí. Ní féidir ach íocaíocht FIT amháin a dhéanamh do theaghlach, níor cheart go mbeadh an FIT á fháil ag an tuismitheoir a bhfuil cothabháil á híoc agat leo.

Má tá cothabháil á híoc agat mar thoradh ar ordú cúirte nó comhaontú atá ina cheanglas dlíthiúil don dara teaghlach, ní bhainfear suim na híocaíochta cothabhála sin den ioncam ar a ndéanfar measúnú don FIT.

Cothabháil a fháil

Má tá cothabháil á fáil agat, déanfar measúnú ar shuim iomlán d'íocaíochta cothabhála amhail ioncam don FIT. Ní féidir ach íocaíocht FIT amháin a dhéanamh do theaghlach, níor cheart go mbeadh an FIT á fháil ag an tuismitheoir óna bhfuil cothabháil á fáil.

Ina theannta sin, déanfar measúnú ar thuismitheoir a fhaigheann cothabháil do leanbh cáilithe i leith an FIT.