Liúntas Fiontraíochta um Fhilleadh ar Obair

Rialacha

Is féidir leat cáiliú le haghaidh Liúnta Fiontraíochta um Fhilleadh ar Obair (BTWEA) má:

1. Tá tú ag tosú mar ghnólacht féinfhostaithe a ceadaíodh i scríbhinn roimh ré ag Éascaitheoir Poist nó ag Comhlacht Comhpháirtíochta (féach ‘Conas a Dhéanaim Iarratas’ thíos)

   agus

2. Tá ceann de na híocaíochtaí cáilithíocha a liostaítear thíos á fáil agat ar feadh ar a laghad 12 mhí.

• Liúntas Cuardaitheora Poist
• Sochar Cuardaitheora Poist (le bunteidlíocht i leith an Liúntais Chuardaitheora Poist)*
• Íocaíocht Teaghlaigh Aontuismitheora
• Pinsean na nDall
• Liúntas Míchumais
• Liúntas Cúramóra (tar éis deireadh a chur leis na dualgais chúraim)
• Cúnamh Feirme
• Pinsean Easláinte
• Forlíonadh Neamhábaltachta
• Liúntas Réamhscortha
• Pinsean Baintrí, Baintrí Fir nó Páirtnéara Shibhialta Mharthanaigh (Neamh-Ranníocach)
• Sochar nó Liúntas Banchéile Tréigthe
• Liúntas Banchéile Príosúnaithe

  nó

• Sochar Breoiteachta ar feadh 3 bliana

*Má tá Sochar Cuardaitheora Poist á fháil agat, ní mór duit bheith dífhostaithe ar feadh 2 bhliain le bheith incháilithe . Má tá teidlíocht bhunúsach agat, áfach, i leith an Liúntais Chuardaitheora Poist (ciallaíonn seo go n-éireodh leat sa tástáil mhaoine agus go sásófá critéir eile) agus go raibh Sochar Cuardaitheora Poist á fháil agat ar feadh 12 mhí, tá tú incháilithe don liúntas. Ní chuirtear san áireamh síniú le haghaidh creidmheasanna dhífhostaíochta i ndiaidh do Shochair Chuardaitheora Poist i dtreo na tréimhse cáilithe.

Ina theannta sin, d’fhéadfaí breithniú a dhéanamh ort don Liúntas Fiontraíochta um Fhilleadh ar Obair má:

• Duine fásta cleithiúnach i dtaca le duine atá intofa chun an Liúntas Fiontraíochta um Fhilleadh ar Obair a éileamh, féadfaidh an duine fásta cleithiúnach sin cáiliú má scoireann an duine a ghlacann páirt i Scéim an Liúntais Fhiontraíochta um Fhilleadh ar Obair d'fhostaíocht nó d'fhéinfhostaíocht roimh dó/di an teidlíocht a ídiú. Féadfaidh teidlíocht a bheith aige/aici faoin scéim go ceann na tréimhse a bheidh fágtha ar an éileamh bunaidh. Is éard atá i gceist anseo ná go n-aistríonn an duine atá intofa don Liúntas Fiontraíochta um Fhilleadh ar Obair a t(h)eidlíochtaí chuig a c(h)éile, a p(h)áirtnéir sibhialta nó a c(h)omhchónaitheoir. (I bhfocail eile, téann an céile, an páirtnéir sibhialta nó an comhchónaitheoir le féinfhostaíocht agus is é an t-éilitheoir bunaidh an duine fásta cáilithe ar an Liúntas Fiontraíochta um Fhilleadh ar Obair). Má tá an t-éilitheoir bunaidh i dteideal creidmheasanna, is féidir leis/léi leanúint de chreidmheasanna a éileamh. Ní féidir, áfach, an Liúntas Fiontraíochta um Fhilleadh ar Obair a íoc in éineacht le híocaíocht leasa shóisialaigh eile agus mar sin, má chinneann an t-éilitheoir bunaidh (arb é an duine fásta cáilithe anois é) ar íocaíocht eile a éileamh, ní mór duit éirí as an Liúntas Fiontraíochta um Fhilleadh ar Obair a éileamh.
• Duine atá ionat a scaoileadh ón bpríosún a shásaíonn na critéir incháilitheachta le haghaidh na scéime

Tá tuilleadh faisnéise ar fáil ar an tréimhsí incháilithe don Liúntas um Fhilleadh ar Obair.

Is féidir tréimhse ar bith caite ar chúrsaí traenála FÁS, Scéimeanna Fostaíochta Pobail , Clár Seirbhísí Pobail, Scéím Tionscnamh Jabanna, Fáilte Ireland, TEAGASC, FIT agus scéimeanna um Fhilleadh ar Oideachas a chur san áireamh mar thréimsí dífhostaithe.

Áirítear tréimhsí ina bhfuarthas Liúntas Leasa Forlíontach agus Soláthar Díreach i leith na tréimhse cáiliúcháin ar choinníoll go mbunaíonn an t-iarratasóir teidlíocht ar íocaíocht ábhartha Leasa Shóisialaigh roimh dó/di an scéim a thosú.

Má ghlac tú páirt cheana i scéim LFFO agus má tá do theideal ídithe agat, féadfaidh tú páirt a ghlacadh an athuair má tá 5 bliana ar a laghad imithe ó shin.

Tá tuilleadh eolais ar fáil maidir le tréimhsí cáiliúcháin um Liúntas Fiontraíochta um Fhilleadh ar Obair.

Cabhair le gnó a thosú

Tá an Ciste um Oiliúint agus um Chúnamh Teicniúil (TAT) deartha le cabhrú le daoine a fhaigheann an Liúntas Fiontraíochta um Fhilleadh ar an Obair nó an Liúntas Fiontraíochta Gearrthéarmach le cuid de na costais a bhaineann le gnó a thosú. Níl teacht agat ar TAT go huathoibríoch; caithfidh cúnamh ón gciste seo a bheith ceadaithe ag an Éascaitheoir Post i d’Oifig Leasa Shóisialaigh Áitiúil. Caithfear íocaíochtaí ón gciste a dhéanamh díreach chuig soláthraí na seirbhíse.

Is féidir leat tuilleadh faisnéise a fháil faoi éirí féinfhostaithe.

Deontais fostaíochta

Ní rachaidh deontais fostaíochta ó Bhord Fiontar Contae nó ó chuideachtaí LEADER i gcion ar do theidlíocht maidir leis an Liúntas Fiontraíochta um Fhilleadh ar an Obair nó leis an Liúntas Fiontraíochta Gearrthéarmach.