An t-árachas sóisialach in Éirinn

Rátaí árachais shóisialaigh

Do dhaoine i bhfostaíocht in Éirinn, roinntear ranníocaíochtaí árachais shóisialaigh i gcatagóirí difriúla, ar a dtugtar aicmí nó rátaí ranníocaíochta. Cinntear an cineál aicme agus ráta ranníocaíochta a íocann tú de réir nádúr do chuid oibre. Mar shampla, beidh duine atá fostaithe in ollmhargadh a thuilleann níos lú ná €38 sa tseachtain árachaithe faoi Aicme J. Má thuilleann siad níos mó ná €38 sa tseachtain beidh siad árachaithe faoi Aicme A. I bhfírinne, íocann an chuid is mó de na fostaithe in Éirinn ÁSPC Aicme A. Leis an aicme seo de ranníocaíochtaí b’fhéidir go mbeifeá i dteideal réimse iomlán íocaíochtaí árachais shóisialaigh atá ar fáil ón Roinn Coimirce Sóisialaí, má chomhlíonann tú na critéir cháilithe.

Is iad na haicmí eile árachais ná aicmí C, D, B, E, H, J, S, K, M, agus P. Má tá tú árachaithe faoi cheann de na haicmí seo, tá tú ag íoc árachais ag ráta níos ísle ná ranníocóirí aicme A, agus ciallaíonn sé seo nach bhfuil tú i dteideal an réimse iomlán íocaíochtaí árachais shóisialaigh. Tá sé seo de bharr go bhfuil tú ag íoc níos lú árachais shóisialaigh ná ranníocóir aicme A agus P.

Beidh méid an ÁSPC a íocann tú ag brath ar do thuillimh agus an aicme a bhfuil tú árachaithe faoi. Léigh níos mó faisnéise anseo faoi na haicmí éagsúla Árachais Shóisialaigh agus cá mhéad árachais shóisialaigh a íocfaidh tú.

Ag coinneáil d’árachas sóisialach

Tá sé tábhachtach go gcoinníonn tú do thaifead árachais shóisialaigh, chomh fada agus is féidir. Má fhágann tú saol na hoibre, tá sé tábhachtach go gcoinníonn tú do thaifead árachais shóisialaigh gníomhach. Le do thaifead árachais shóisialaigh a chosaint agus a choinneáil gníomhach, ba cheart duit teagmháil a dhéanamh leis an Roinn Coimirce Sóisialaí lena sheiceáil an féidir leat Ranníocaíochtaí Creidiúnaithe a fháil. B’fhéidir go mbeifeá in ann, in imthosca áirithe, Ranníocaíochtaí Deonacha a dhéanamh. Chomh maith leis sin, is féidir leat do ranníocaíochtaí Éireannacha agus do rannaíocaíochtaí a d’íoc tú i stáit eile agus tú ag obair thar lear a chur le chéile le bheith incháilithe ar íocaíocht árachais shóisialaigh.

Más oibrí páirtaimseartha thú nó má tá tú i socrú roinnte poist ba cheart duit smaoineamh faoin dóigh ar féidir le do phatrún oibre dul i bhfeidhm ar do thaifead árachais shóisialaigh. Tá sé seo thar a bheith ábhartha má tá tú páirtaimseartha nó má tá tú ag roinnt oibre le seachtain shaor mar chuid de do phatrún oibre cionn is gur féidir leat gan íocaíocht ÁSPC a dhéanamh don tseachtain nach bhfuil tú ag obair. Léigh anseo le níos mó faisnéise a fháil faoi oibrithe páirtaimseartha agus comhroinnte oibre agus ranníocaíochtaí árachais shóisialaigh.

Is í rannóg na dTaifead ÁSPC sa Roinn Coimirce Sóisialaí a choinníonn agus a dhéanann bainistíocht ar gach taifead de do ranníocaíochtaí árachais shóisialaigh. Tá an Roinn freagrach as na h-íocaíochtaí déanta do do ranníocaíochtaí árachais shóisialaigh.

D’fhonn do thaifead árachais shóisialaigh a sheiceáil, beidh do Uimhir Phearsanta Seirbhíse Poiblí (PPSN) de dhíth ort. Is uimhir shainiúil aitheantais í seo atá de dhíth ort le linn duit a bheith ag déileáil le gníomhaireachtaí stáit.