Aisghabháil íocaíochtaí iomarcacha leasa shóisialaigh

Rialacha

An íocaíocht iomarcach a aisíoc

Is féidir leis an Roinn iarraidh ort an íocaíocht iomarcach a aisíoc trí:

• Íocaíocht amháin a dhéanamh chun an íocaíocht iomarcach iomlán a aisíoc
• Aisíocaíochtaí seachtainiúla nó míosúla a dhéanamh go dtí go mbeidh an íocaíocht iomarcach aisíoctha
• Má tá tú fós ag fáil íocaíocht leasa shóisialaigh, trí asbhaint as d'íocaíocht sheachtainiúil (agus trí riaráiste íocaíochta ar bith dlite duit a choinneáil siar).

Agus iad ag socrú an ráta aisíocaíochta, breathnóidh an Roinn ar na rudaí seo a leanas:

• D'acmhainn chun aisíocaíocht a dhéanamh
• Fíricí nó cúinsí a bhaineann le ceist na haisíocaíochta a tharraing tú anuas
• Méid na híocaíochta iomarcaí agus na cúinsí inar tharla sí.

Mura bhfuil sé d'acmhainn agat an íocaíocht iomarcach a aisíoc

Mura bhfuil sé d'acmhainn agat an tsuim a íocadh leat go hiomarcach a aisíoc, b'fhéidir go laghdofaí, go gcuirfí ar athló, nó go gcuirfí siar í. Má fheabhsaíonn do chúinsí ar ball ionas go mbeidh sé d'acmhainn agat an aisíocaíocht a dhéanamh, beidh ort an tsuim atá amuigh ort a aisíoc ag ráta a bhfuil tú ina acmhainn. D'fhéadfadh an Roinn Coimirce Sóisialaí an dlí a chur ar dhuine tríd an gcóras cúirte mar thoradh ar fhaillí in aisíocaíocht íocaíochtaí leasa shóisialaigh in Éirinn.

Cén uair a laghdaítear nó a chuirtear ar ceal aisíocaíocht?

B'fhéidir go laghdófaí nó go gcuirfí íocaíocht iomarcach ar ceal mar gheall ar:

• Fhaillí an Roinn Coimirce Sóisialaí gníomhú taobh istigh de thréimhse ama réasúnta ar eolas curtha ar fáil agat nó ar do shon.
• Bhotún a rinne an Roinn - ní thagann sé seo san áireamh ach amháin nuair nach féidir a bheith ag súil go reasúnta go raibh eolas agat faoin mbotún

Má cheapann tú go ndearna an Roinn botún, ba cheart duit aird na Roinne a tharraingt ar an scéal chomh luath agus is féidir.

Más amhlaidh go mbeifeá in ann íocaíochtaí a fháil faoi scéim eile

Má fuair tú íocaíochtaí nach raibh tú ina dteideal faoi scéim leasa shóisialaigh amháin, ach dá mbeifeá i dteideal íocaíochtaí faoi scéim leasa shóisialaigh eile, cuirfear é sin san áireamh agus cinneadh á dhéanamh faoin méid a chaithfidh tú a aisíoc.