Cearta agus oibleagáidí na niarrthóirí tearmainn

Eolas

Bíonn cearta agus oibleagáidí áirithe agat le linn na tréimhse ina mbíonn tú i d'iarrthóir tearmainn agus go mbíonn d’iarratas ar dhearbhú mar theifeach á phróiseáil; agus is mar seo a leanas iad:

Do chearta

• Mura mbítear chun plé le do chás de réir Rialachán Bhaile Átha Cliath II/Choinbhinsiún Bhaile Átha Cliath, ní bhainfear den Stát tú nó go dtugtar caoi duit do chás láithriú ina iomláine chuig an gCoimisinéir Iarratais do Dhídeanaithe nó chuig an mBinse Achomhairc do Dhídeanaithe, de réir mar is cuí.
• Déanfar gach iarracht chun teangaire a sholáthar duit, de réir mar is gá agus is féidir.
• Bíonn tú i dteideal dul i gcomhairle le haturnae. Is comhlacht neamhspleách í Seirbhís Dhlíthiúil na dTeifeach a sholáthraíonn cúnamh dlíthiúil do dhaoine aonair a bhíonn ag déanamh iarratais ar dhearbhú mar theifeach a fháil. Tabharfar bileog eolais faoi Sheirbhís Dhlíthiúil na dTeifeach duit nuair a dhéanann tú do chéadiarratas.
• Bíonn tú i dteideal dul i gcomhairle le hArd-Choimisinéir na Náisiún Aontaithe do Theifigh (UNHCR) a bhfuil oifig aige i mBaile Átha Cliath.
• Cuirfidh an Ghníomhaireacht um Fháiltiú agus Comhtháthú cóiríocht ar fáil duit (ar bhonn lánchoinneála) i gceann amháin dá lár-ionaid chónaithe a fhad agus a bhíonn d’iarratas ar thearmann á phróiseáil. Ní bhíonn iarrthóirí tearmainn i dteideal forlíonadh cíosa a fháil ón mBord Sláinte. Bíonn an teidlíocht agat ar thacaíocht leasa agus cúram sláinte a fhad agus a bhíonn d’iarratas á phróiseáil.
• Caithfear faoi rún le gach mionsonra i leith d’iarratais. Féadtar faisnéis a nochtadh, ámh, chuig comhlachtaí eile a d’fhéadfadh a bheith ag plé leat, ar nós ranna agus gníomhaireachtaí rialtas na hÉireann lena n-áirítear na hÚdaráis Inimirce, an Garda Síochána, údaráis áitiúla chomh maith le UNHCR chun a chur ar chumas na n-eagras seo a bhfeidhmeanna a stiúradh lena n-áirítear riarachán an dlí a bhaineann le hiontráil agus díbirt ón Stát de neamh-náisiúnaigh. Féadtar roinnt faisnéise a sholáthar freisin chuig tíortha eile a oibríonn Rialachán Bhaile Átha Cliath II/Choinbhinsiún Bhaile Átha Cliath chun críche oibriú na socrúchán seo.
• Fógrófar duit i scríbhinn, ag an seoladh is déanaí ar thug tú, d’aon choinne a mbeidh ort a choinneáil agus aon mholadh a dhéantar nó aon chinneadh a thógtar i gcomhar le d’iarratas ar dhearbhú mar theifeach ag an gCoimisinéir Iarratais do Dhídeanaithe, an Bínse Achomhairc do Dhídeanaithe agus an tAire Dlí agus Cirt (de réir mar is cuí).

D’oibleagáidí

• Ní mór duit cloí le dlíthe an stáit.
• Ní mór duit do sheoladh a fhógairt i scríbhinn don Choimisinéir Iarratais do Dhídeanaithe (laistigh de 5 lá oibre ó dhéanamh d’iarratais) agus i leith aon athrú i do sheoladh. Má mhainníonn tú sa mhéid sin, d'fhéadfaí tú a chiontú as cion faoi Acht na nDídeanaithe 1996, arna leasaithe. D’fhéadfaí nach bhfaighfeá fógraí tábhachtacha i ndáil le d’iarratais freisin le mainneachtain ar do leithse agus go dteipfeadh ort chun teorainneacha ama a shásamh um thaisceadh cáipéisíochta, achomharc agus mar sin de. Tá faisnéis faoi chionta i gcoinne Acht na nDídeanaithe 1996 i 'Tuilleadh eolais' thíos.
• Ba cheart duit d’ainm, seoladh, náisiúntacht, agus an Uimhir Thagartha a thaispeántar ar do Theastas um Chónaitheacht Shealadach a chur in iúl go soiléir ar gach comhfhreagras leis an gCoimisinéir Iarratais do Dhídeanaithe nó leis an mBínse Achomairc do Dhídeanaithe.
• Ní féidir leat an stát a fhágáil ná iarracht a dhéanamh chun na críche sin gan comhthoil an Aire Dhlí agus Chirt a fhad agus a bhíonn d’iarratas á mheas.
• Ní bhíonn teidlíocht agat chun fostaíocht a lorg ná chun dul ina bun, murar lorg tú tearmann sa stát ar nó roimh an 26 Iúil 1999. Má lorg tú tearmann roimh an dáta sin agus go bhfuil tú fós ag fanacht ar chinneadh faoi d’iarratas agus gur mian leat dul i mbun fostaíochta, ba cheart duit dul i dteagmháil le hOifig an Choimisinéir Iarratais do Dhídeanaithe.
• Ní bhíonn tú i dteidil chun aon ghnó, ceird ná gairm a chleachtadh.
• Féadann tú a bheith faoi riachtanas chun dul i láthair Oifigeach Inimirce, duine le húdarú ón Aire Dlí agus Cirt nó ball den Gharda Síochána ag eatraimh shonraithe.
• Ní foláir duit cónaí nó fanacht ag an lár-ionad cónaitheachta a leithdháiltear chugat ag an nGníomhaireacht um Fháiltiú agus Comhtháthú
• Ní féidir leat bogadh ón lóistín sin ach le cead na Gníomhaireachta um Fháiltiú agus Comhtháthú agus is sa chás amháin go mbíonn ar chumas na Gníomhaireachta um Fháiltiú agus Comhtháthú lóistín ailtéarnach a thairscint duit, a tharlóidh sé seo.
• Caithfidh tú a bheith fírinneach i gcónaí san fhaisnéis a sholáthraíonn tú i leith d’iarratais. Mura mbíonn, d’fhéadfaí a chinneadh as gur gan foras ar bith atá d’iarratas. Sna cásanna sin, bheadh tréimhse ní ba ghiorra le hachomharc laistigh di agus phléifí le haon achomharc a d’fhéadfá a dhéanamh gan éisteacht bhéil.
• Ní foláir duit comhoibriú go hiomlán le fiosrú d’iarratais. D’fhéadfadh mainneachtain chun déanamh amhlaidh a chur isteach ar inchreidteacht d’iarratais nó d’iarratas a bheith aistarraingthe dá thoradh.
• Ba cheart duit gach faisnéis ábhartha do d’iarratas a chur ar fáil don Choimisinéir Iarratais do Dhídeanaithe. Mura ndéanann tú amhlaidh agus má lorgann le faisnéis bhreise a thabhairt ar aghaidh ag staid an achomhairc, beidh ort an fáth nár cuireadh an fhaisnéis seo ar fáil don Choimisinéir Iarratais do Dhídeanaithe a mhíniú agus beidh ar an mBínse Achomhairc do Dhídeanaithe é seo a chur san áireamh i measúnú inchreidteacht d’iarratais
• Ní foláir duit mionsonraí do dhlíodóirse agus aon athrú dlíodóra (ainm, seoladh, uimhir ghutháin, agus mar sin de) a sholáthar don Choimisinéir Iarratais do Dhídeanaithe nó don mBínse Achomhairc do Dhídeanaithe (de réir mar is iomchuí).
• Ní mór duit féin nó do do dhlíodóir gach cóip den cháipéisíocht a thugann an Coimisinéir Iarratais do Dhídeanaithe agus an Bínse Achomhairc do Dhídeanaithe duit a choinneáil. Is i gcúinsí eisceachtúla amháin a chuirfear cóipeanna breise de na cáipéisí ar fáil.

Iarratais a d’fhéadfaí a mheas mar aistarraingthe mar gheall ar mhainneachtain chun cloí le hoibleagáidí áirithe

Bíonn roinnt cúinsí ann ina d’fhéadfaí d’iarratas ar stádas teifigh a mheas mar aistarraingthe de bharr mainneachtana ar do leithse chun comhall le d’oibleagáidí reachtúla; agus ina dhiúltóidh an tAire dearbhú a thabhairt duit.

Is iad seo a leanas iad, mar atá:

• Mainneachtain chun seoladh a thabhairt don Choimisinéir laistigh de 5 lá oibre ó dhéanamh d’iarratais;
• Mainneachtain chun an Coimisinéir a chur ar an eolas i dtaobh athrú seolta;
• Mainneachtain chun teacht i láthair nuair is gá amhlaidh;
• Mainneachtain chun cónaí nó chun fanacht ag dúiche nó áit faoi leith sa Stát nuair is gá amhlaidh;
• Fágáil nó iarracht chun an Stát a fhágáil gan comhthoil an Aire;
• Mainneachtain chun comhoibriú leis an gCoimisinéir Iarratais do Dhídeanaithe, nó chun faisnéis ar ábhartha do d’iarratas í a thabhairt;
• Mainneachtain chun freastal ar agallamh leis an gCoimisinéir;
• Mainneachtain chun comhoibriú leis an Bínse Achomhairc do Dhídeanaithe, nó chun faisnéis ar ábhartha do d’achomharc í a thabhairt;
• Mainneachtain chun freastal ar éisteacht bhéil leis an mBínse.

Tabhair faoi deara: ní bhíonn aon achomharc sa chás ina meastar iarratas a bheith aistarraingthe