Seirbhísí leighis agus teidlíochtaí leasa shóisialaigh do dhídeanaithe agus daoine a dtugtar cead chun fanacht doibh
Seirbhísí leighis
Tabharfaidh an Oifig Sláinte Áitiúil sa cheantar ina gcónaíonn tú aire do do riachtanais leighis. Cabhróidh Gníomhaireacht um Fháiltiú agus Imeascadh leat liachleachtóir (dochtúir) ginearálta a aimsiú. Scríobhfaidh Gníomhaireacht chuig clárbhainisteoir an Oifig Sláinte Áitiúil lena gcur ar an eolas faoi do theacht agus le moladh go dtabharfaí an deis duit scagthástáil leighis agus cúram fiaclóireachta a fháil. Cuirfear in iúl don Phríomhfhiaclóir freisin go bhfuil tú tagtha ionas go bhféadfar aire a thabhairt do do riachtanais fhiaclóireachta.
Leanfaidh na seirbhísí leighis a fuair tú mar iarrthóir tearmainn ar aghaidh má bhronntar stádas dídeanai nó cead chun fanacht ort, mar nach bhfuil difear ar bith sa soláthar d’iarrthóirí tearmainn agus dídeanaithe Coinbhinsiúin agus do dhaoine a dtugtar cead chun fanacht dóibh.
Tabharfaidh an fáilteoir ag d’ionad sláinte áitiúil foirm iarratais ar chárta leighis duit. Ba chóir duit í seo a chomhlíonadh agus a sheoladh ar ais chuig an Oifig Sláinte Áitiúil chomh luath agus is féidir. Ligeann cárta leighis duit agus do do theaghlach rochtain a fháil ar sheirbhísí leighis saor in aisce. Mura gcuireann tú isteach ar chárta leighis agus mura bhfaigheann tú ceann, iarrfar ort íoc as seirbhísí áirithe leighis. Cuireann cárta leighis ar do chumas, arna eisiúint ag Feidhmeannacht na Seirbhíse Sláinte, seirbhísí liachleachtóra ghinearálta a fháil saor in aisce; drugaí agus cógais ar oideas (le roinnt eisceachtaí); seirbhísí mar othar cónaitheach in ospidéal poiblí; seirbhísí othair sheachtraigh; seirbhísí fiaclóireachta, optúla agus cluaise; gairis leighis; seirbhísí chúram máithreachais agus naíonán. Íocfar deontas €10.16 in airgead tirim ar bhreith gach leanbh. Cuirfear seirbhísí síceolaíochta ar fáil dóibh siúd ar tharla tráma dóibh de thoradh pianta, éignithe, nó droch-eispéireas eile ina saol.
- D’fhéadfadh liostaí feithimh a bheith ag Oifig Sláinte Áitiúil do na seirbhísí seo agus leithdháilfear tús áite ar bhunús riachtanais leighis.
- Má tá tú ag iompar clainne nó má tá leanaí óga agat, ba cheart duit dul i dteagmháil leis an Altra Sláinte Poiblí (ASP) i d’ionad sláinte áitiúil. Fanfaidh an t-altra i dteagmháil leat fad is a bhíonn tú ag iompar agus i ndiaidh bhreith do linbh agus tabharfaidh siad cabhair agus comhairle duit.
- Má tá ioncam ró-ard agat le leas a bhaint as carta leighis, tá tú fós i dteideal seirbhísí ospidéil ghinearálta a fháil, ar saor in aisce den chuid is mó iad. Beidh ort íoc as seirbhísí eile ar nós seirbhísí liachleachtóra ghinearálta. Féadfaidh tú árachas leighis a fháil le do riachtanas leighis féin agus riachtanas do chlainne a chumhdach.
Teidlíochtaí leasa shóisialaigh
Mar dhídeanaí, tá an ceart céanna agat cur isteach ar íocaíochtaí leasa shóisialaigh is atá ag saoránach Éireannach ar bith. Tá rialacha agus coinníollacha ag baint le gach íocaíocht leasa shóisialaigh. Ní gá go gcomhlíonfá an Coinníoll Gnáth-Chónaithe, ach caithfidh tú coinníollacha eile a chomhlíonadh. Tá réimse leathan íocaíochtaí leasa shóisialaigh ann, agus gheobhaidh tú cúnamh i do oifig leasa shóisialaigh áitiúil le cur isteach ar an íocaíocht chuí a fheileann do chás - féach 'Cá háit a dhéanfaidh mé iarratas' thíos.
Má tá cead chun fanacht agat, tá an ceart céanna agat cur isteach ar íocaíochtaí leasa shóisialaigh. Áfach, má fhaigheann tú íocaíocht leasa shóisialaigh, is féidirgo mbeadh éifeacht ar athnuacháin do chead chun fanacht nó iarratas ar shaoránacht.
Seo a leanas roinnt samplaí de íocaíochtaí leasa shóisialaigh:
- Tá sé de cheart agat do bheatha a shaothrú. Mar sin má tá tú in ann obair a dhéanamh ach go bhfuil tú as obair faoi láthair, féadfaidh tú cur isteach ar Liúntas Cuardaitheora Poist
- Mura bhfuil tú in ann aon obair a dhéanamh de bharr míchumais nó tinnis féadfaidh tú cur isteach ar Liúntas Míchumais
- Mura bhfuil tú in ann aon obair a dhéanamh de bhrí gur tuismitheoir aonair tú féadfaidh tú cur isteach ar Íocaíocht Teaghlaigh Aontuismitheora
- Más tuismitheoir nó caomhnóir gasúir tú féadfaidh tú cur isteach ar Shochar Linbh
Fad is atá tú ag fanacht ar thoradh do iarratais ar íocaíocht leasa shóisialaigh, féadfaidh tú cur isteach ar Liúntas Leasa Forlíontach. Déan iarratas chuig an Oifigeach Leasa Pobail i d'ionad sláinte áitiúil - féach 'Cá háit a dhéanfaidh mé iarratas' thíos.
Cá háit a ndéanfaidh mé iarratas
Déan teagmháil le d'ionad sláinte áitiúil agus d'oifig leasa shóisialaigh áitiúil.
Ábhar Gaolmhar
- Seirbhísí agus teidlíochtaí do dhaoine ag lorg tearmainn in
Éirinn
Más iarrthóir tearmainn thú i do chonaí i bhforáil dhíreach in Éirinn tá seirbhísí áirithe ag súil leat. - Seirbhísí agus teidlíochtaí leighis d'iarrthóirí tearmann
Más iarrthóir tearmainn thú tá seirbhísí leighis ag súil leat. - Dídeanaithe agus iarrthóirí tearmainn
Tugann an doiciméad seo cur síos ar an bpróiseas chun tearmann a lorg in Éirinn agus ar sheirbhísí do dhídeanaithe in Éirinn.
Téigh i dteagmháil linn
Má tá ceist agat a bhaineann leis an ábhar seo, is féidir leat glao a chur ar an tSeirbhís Ghutháin um Fhaisnéis do Shaoránaigh 0761 07 4000 (Luan go hAoine idir 9rn agus 9in) no trí bhualadh isteach san Ionad Faisnéise do Shaoránaigh is gaire duit.