Seirbhísí ar líne do cháiníocóirí ÍMAT

Eolas

Más cáiníocóir ÍMAT thú, is é sin má bhíonn do cháin á baint as d’ioncam ag d’fhostaitheoir, is féidir leat an tseirbhís ÍMAT Aon Tráth, Aon Lá ar fáil a úsáid.

Nuair atá tú cláraithe, is féidir leat:

• Féachaint ar do thaifead cánach
• Réimse leathan creidmheasanna cánach a éileamh
• Cur isteach ar aisíocaíochtaí cánach lena n-áirítear costais shláinte
• Breis ioncaim a dhearbhú
• Athbhreithniú ar dhliteanas cánach do bhlianta eile a iarraidh
• Creidmheasanna a ath-leithdháileadh idir tú féin is do chéile
• Do chuid comhfhreagrais chuig na Coimisinéirí Ioncaim a leanúint

Tá ÍMAT Aon Tráth, Aon Lá ar fáil freisin do chustaiméirí nach dteastaíonn uathu ach rochtain a fháil ar a gcuid sonraí cánach. Níl sé mar riachtanas de chuid ÍMAT Aon Tráth, Aon Lá gur gá duit idirbhearta a chur isteach go leictreonach má chláraíonn tú leis

Ní gá éilimh ar pháipéar a chur isteach nuair a chuirtear idirbheart isteach le ÍMAT Aon Tráth, Aon Lá, cé go mbíonn ort admhálacha a choinneáil ar feadh 6 bliana toisc gur féidir leis na Coimisinéirí Ioncaim iarraidh amharc orthu ina dhiaidh sin.

Nuair a chuirtear idirbheart isteach le ÍMAT Aon Tráth, Aon Lá, déanfar é a admháil ar an bpointe agus cuirfear taifead buan ar an idirbheart i Stair d’Iarrataí.

Ní féidir d’fhaisnéis teagmhála a athrú trí ÍMAT Aon Tráth, Aon Lá. Ní mór dul i dteagmháil leis an oifig cánach áitiúil chun do sheoladh a athrú.

Tá ÍMAT Aon Tráth, Aon Lá ar fáil don bhliain reatha agus do na 4 bliana roimhe sin.