Rótharraingtí bhainc

Rialacha

In Éirinn:

• Ní bhíonn rótharraingt ar fáil ach amháin ar chuntas reatha.
• Is í an institiúid airgeadais féin a dhéanfaidh cinneadh faoi rótharraingt a chur ar fáil do dhuine.
• Braitheann an rótharraingt agus an tsuim a cheadaítear don tomhaltóir mar rótharraingt ar an gcaoi a láimhsíodh bearta an chuntais reatha, den chuid is mó. Má tá drochstair chreidmheasa ag custaiméir d'fhéadfadh sé a bheith deacair dó/di rótharraingt a fháil.
• Aisíocann an tomhaltóir an tsuim rótharraingthe agus ús ar an tsuim rótharraingthe (de ghnáth bíonn sé sin níos lú ná an ráta úis ar iasacht téarmach) nuair a bhíonn airgead ar fáil sa chuntas.
• D'fhéadfadh rótharraingt a bheith sealadach nó buan.

De ghnáth ceadóidh banc rótharraingt do chustaiméir má bhíonn bearta isteach agus amach go rialta. Más amhlaidh atá airgead á thógáil amach as cuntas láithreach tar éis dó a bheith curtha isteach agus nach bhfuil airgead á choinneáil sa chuntas ar feadh tréimhse suntasaí, d'fhéadfadh an banc a bheith den tuairim gur comhartha é seo nach bhféadfar é a aisíoc. Sa chás sin d'fhéadfadh sé rótharraingt a dhiúltú.

Má tá deacrachtaí agat rótharraingt a aisíoc

Má tá deacrachtaí agat rótharraingt a aisíoc, d'fhéadfá síneadh ama a iarraidh ar an mbanc. Ceadófar é sin má tá stair d'íocaíochtaí sásúil.

Má tá deacrachtaí leanúnacha agat agus tú ag aisíoc na rótharraingte agus má tá do chuid fiacha ag méadú dá bharr, d'fhéadfá dul i dteagmháil leis an tSeirbhís Bhuiseadaithe agus Chomhairle Airgid (MABS). Rachaidh an eagraíocht seo i gcomhairle leat agus socróidh siad an méid airgid gur féidir leat a aisíoc in aghaidh na míosa. Rachaidh sí i dteagmháil leis an mbanc ar do shon. Socróidh MABS leis an mbanc go n-aisíocfaidh tú suim áirithe gach mí go dtí go laghdófar an rótharraingt agus go nglanfar na fiacha. Cuireann MABS an tseirbhís seo ar fáil saor in aisce.