Ag oscailt cuntas bainc agus ag athrú cuntas bainc

Eolas

Gheobhaidh tú amach go mbeidh cuntas bainc éigin riachtanach má tá tú i do chónaí in Éirinn agus ag obair in Éirinn. Tugann cuntas bainc deis duit airgead a chur i dtaisce, idirbheartaíochtaí airgeadais a dhéanamh, do phá a fháil srl.

Tairgeann soláthróirí seirbhíse airgeadais cuntais difriúla. Mar shampla, soláthraíonn bainc, comhair chreidmheasa, cumainn foirgníochta agus An Post réimse cuntas. Tá dhá chatagóir cuntais ann, tríd is tríd; cuntas reatha agus cuntas taisce:

• Tugann cuntas reatha deis duit idirbheartaíochtaí a dhéanamh ó lá go lá (.i. bille a íoc, do thuarastal a fháil díreach chuig an gcuntas, idirbheartaíochtaí a dhéanamh srl.). Is bainc agus cumainn foirgníochta amháin a chuireann iad sin ar fáil.
• Tugann cuntas taisce deis duit cur le hairgead a bheidh i dtaisce agat agus d'fhéadfá ús a shaothrú ar an airgead sin. Tairgeann formhór na gcomhlachtaí seirbhíse airgeadais iad sin – bainc, cumainn foirgníochta agus Comhair Chreidmheasa.

Ba chóir duit dul ag cuardach thart chun an cineál cuntais is oiriúnaí do do chuid riachtanas féin a fháil. Nuair a osclaíonn tú cuntas déan iarracht a dhéanamh amach cad iad na riachtanais atá agat agus conas a theastaíonn uait do chuid airgid a stóráil agus rochtain a fháil air.

Ag Oscailt Cuntas Bainc

Nuair a osclaíonn tú cuntas reatha ba chóir duit a bheith ar an eolas faoi na seirbhísí a bheidh agat ar an gcuntas seo. Ba chóir duit a bheith ar an eolas freisin faoi na táillí agus muirir a bhaineann leis an gcuntas. Nuair a osclaíonn tú cuntas taisce ba chóir go mbeadh fios agat cén céatadán den airgead a bheidh i dtaisce agat a mbeidh tú ag saothrú úis air. Ba chóir duit freisin a fháil amach conas a bheidh tú in ann teacht ar do chuid airgid sa chás go dteastódh sé uait.

Tá bealaí eile seachas cuntais taisce a úsáid chun airgead a chur i dtaisce.

Tá oibleagáid ar an institiúid airgeadais d’ainm a fháil agus do sheoladh a dheimhniú sula bhféadfaidh tú cuntas bainc a oscailt.

Ag Athrú do Chuntais

B’fhéidir go mbeifeá ag iarraidh do chuntas a athrú ar aon cheann de na cúiseanna seo a leanas:

• Tá do chuid cúinsí athraithe agus tá riachtanais difriúla ag teastáil uait ó chuntas.
• B’fhéidir gur aimsigh tú cuntas a thug margadh ní b’fhearr duit.
• B’fhéidir nach bhfuil tú sásta leis an leibhéal seirbhíse a bhfuil do bhanc á chur ar fáil.
• B’fhéidir nach bhfuil tú sásta leis na táillí a bhfuil do bhanc á ghearradh.

Más ann d'aon cheann de na cúinsí thuas is féidir leat rogha a dhéanamh cuntas a athrú. B’fhéidir go mbreathnaíonn an próiseas chun cuntais a athrú idir soláthróirí casta ach tá cúnamh le fáil.

Tugann an Gníomhaireacht Náisiúnta do Thomhaltóirí faoi shuirbhéanna ar chostais institiúidí airgeadais agus tá Suirbhé Costais i gcás Cuntas Reatha Pearsanta foilsithe aige. B’fhéidir go gcabhródh sé sin leat fáil amach an bhfaighidh tú margadh níos fearr ó sholáthróir seirbhíse airgeadais eile. Má dhéanann tú cinneadh soláthróirí seirbhíse a athrú, tá cód cleachtais maidir le cuntaís reatha institiúidí creidmheasa a athrú (pdf) eisithe ag Cónaidhm Baincéirí na hÉireann. Tugann an cód cleachtais sin treoir do bhainc agus do chustaiméirí chun go n-éireoidh leo sa phróiseas le cuntais a athrú.