Sciúradh airgid

Rialacha

Tá iachall ar institiúidí airgeadais coinníollacha ar leith a chomhlíonadh chun cosc a chur ar scíuradh airgid. Ceann de na coinníollacha seo ná an riachtanas atá ar institiúidí airgeadais aitheantas a gcustaiméirí a chruthú agus tuairisc a chur ar aghaidh láithreach chuig an nGarda Síochána má tá aon amhras acu faoi scíuradh airgid.

Ón 15 Meán Fómhair 2003, beidh ar ghairmithe ainmnithe eile úsáid a bhaint as na bearta céanna is a úsáideann institiúidí airgeadais chun dul i ngleic le sciúradh airgid. I measc na ngairmithe seo tá:

• cuntasóirí
• ceantálaithe
• iniúchóirí
• gníomhairí eastáit
• comhairleoirí cánach
• aturnaetha
• gnólachtaí um gnó infheistíochta
• gníomhaireachtaí a chuireann seirbhísí íocaíochta airgid ar fáil (.i. iad siúd a aistríonn airgead de dhroim sreinge ó áit amháin go háit eile)
• déileálaithe in earraí ardluacha (.i. clocha lómhara, miotail, saothair ealaíne a n-íoctar 15,000 euro nó níos mó in airgead tirim ina leith)
• casino*
• cuideachtaí riaracháin a sholáthraíonn seirbhísí do scéimeanna comhinfheistíochta

* Cé go bhfuil casino neamhdhleathach in Éirinn, cuireadh san áireamh ar an liosta iad mar thoradh ar bhreithiúnais a rinne an Chúirt Eorpach le déanaí. Fuair na breithiúnais seo cé go bhfuil casino neamhdhleathach in Éirinn, ní mór do bhallstáit an AE a chinntiú go leagtar síos forálacha uile na treorach um sciúradh airgid ina ndlí náisiúnta).

I gcás roinnt de na gairmithe thuas, tá teorannú ar idirbhearta a thuairisciú curtha san áireamh. Mar shampla, ní bhaineann na riachtanais tuairiscithe le cuntasóirí, iniúchóirí, aturnaetha ná comhairleoirí cánach maidir le heolas a fhaigheann siad ó chliant nó faoi chliant in imthosca áirithe, ina measc sin tá:

(a) nuair atá staid dhlíthiúil an chliaint sin á fhionnadh

(b) nuair atá cliant á chosaint nó ionadaíocht á dhéanamh orthu in imeachtaí breithiúnacha nó maidir leo nó

(c) nuair atá comhairle á cur ar chliant maidir le himeachtaí breithiúnacha a thionscnamh, a sheachaint nó a chosaint, cibé an bhfuil a leithéid d’eolas faighte roimh, le linn nó dá éis na himeachtaí sin.

Dearbhú aitheantais

Má tá tú ag iarraidh cuntas a oscailt le hinstitiúid airgeadais (mar shampla oifig an phoist, banc, cumann foirgníochta nó comhar creidmheasa) don chéad uair, ní foláir duit fianaise a bheith agat a thaispeánann cé thú féin (griangraf san áireamh) agus fianaise a dhearbhaíonn do sheoladh buan. Má tá tú ag iarraidh gnó airgid a dhéanamh le hinstitiúid airgeadais (de ghnáth níos mó ná euro 13,000) gan cuntas a oscailt, ní foláir duit fianaise a thaispeáint ó dhá fhoinse éagsúil a chruthaíonn do sheoladh agus cé thú féin. Tá roinnt samplaí thíos:

Cáispéisí a dhearbhaíonn d'ainm :

• Pas
• Ceadúnas tiomána
• Cárta aitheantais reatha le griangraf ó fhostóir aitheanta.
• Cárta aitheantais mhic léinn le griangraf eisithe ag coláiste tríú leibhéil aitheanta
• Cárta aitheantais le griangraf eisithe ag an nGarda Síochána

Ní ghlactar le cárta aitheantais idirnáisiúnta mac léinn (ISIC) de chuid USIT ná le pas bus.

Cáipéisí a dhearbhaíonn do sheoladh:

• Bunchóip bhille tí a eisíodh le deireanas i d'ainm (mar shampla bille leictreachais, teileafóin, gáis agus araile)
• Ceadúnas tiomána reatha
• Cárta aitheantais le griangraf eisithe ag an nGarda Síochána
• Leabhar pinsin/socair eisithe ag an Roinn Coimirce Sóisialaí
• Bunchóip de ráitéas bainc nó cumainn foirgníochta a eisíodh le deireanas i d'ainm
• Clárú ar an gclár toghchánach, insan eolaire teileafóin nó san eolaire sráide.
• Cáipéis choigiltis nó infheistíochta An Post i d'ainm

Tá bealaí eile ag na hinstitiúidí airgeadais le cruthú cé thú féin muna bhfuil na cáipéisí thuasluaite agat – téigh i dteagmháil leis an institiúid chuí chun tuilleadh eolais a fháil.

Is féidir leis an gCúirt suas le 14 bliain príosúnachta agus fineáil gan teorann a ghearradh ar dhuine atá ciontaithe i leith scíuradh airgid

Is coir í chomh maith de réir an Acht um Dhlí Choiriúil 1994 comhairle nó cabhair a thabhairt d'aon duine atá i mbun scíuradh airgid.