Institiúidí airgeadais agus aitheantas

Rialacha

Má tá tú ag oscailt cuntais don chéad uair, nó más duine thú nach bhfuil cuntas agat san institiúid ar leith ach más mian leat beart a dhéanamh tríd an institiúid (de ghnáth os cionn €10,000), ní foláir duit an fhianaise seo a leanas a thaispeáint chun a dhearbhú cé thú féin:

Cáipéisí a dhearbhaíonn d'ainm

• Pas bailí reatha
• Ceadúnas bailí tiomána
• Cárta aitheantais reatha le griangraf ó fhostóir aitheanta
• Cárta aitheantais reatha mic léinn le griangraf, eisithe ag coláiste tríú leibhéil aitheanta
• Cárta aitheantais le griangraf eisithe ag an nGarda Síochána.

Cáipéisí a dhearbhaíonn do sheoladh

• Bille teaghlaigh eisithe le deireanas, mar shampla bille gáis, leictreachais nó teileafóin
• Ceadúnas tiomána reatha
• Cárta aitheantais le griangraf eisithe ag an nGarda Síochána
• Leabhar pinsin/liúntais eisithe ag an Roinn Coimirce Sóisialaí
• Bunchóip de ráiteas bainc nó cumainn fhoirgníochta i d'ainm
• Iontráil sa Chlár Votálaithe nó in eolaire teileafóin nó eolaire sráide
• Caipéis taisce nó infheistíochta de chuid An Post agus ainm sráide breactha uirthi.

Tá socruithe eile do dhaoine nach bhfuil an doiciméadú thuas acu. D'fhéadfadh na socruithe seo a athrú ó institiúid go hinstitiúid agus déantar gach cás a iniúchadh ann féin. Tá samplaí de fhoirmeacha eile aitheantais thíos:

• Fianaise go bhfuil cuntas ann nó go raibh gnó ag an duine leis an mbanc cheana
• Litir ó fhostóir atá ina c(h)ustaiméir den bhanc ag tabhairt seoladh an chustaiméara nua
• Do dhaoine atá ina gcónaí lena dtuismitheoirí agus dá bharr nach bhfaigheann billí teaghlaigh, déanfaidh litir in ainm duine dá dtuismitheoirí nó an bheirt acu an chúis.
• Litir theistiméireachta ó bhanc eile a bhfuil cuntas agat leis, nó lena ndearna tú gnó cheana
• D'fhéadfaí glacadh le cártaí aitheantais mic léinn le griangraf ó dhaoine atá faoi 25.

Ní foláir cóipeanna de na cáipéisí uilig a úsáideadh chun a dhearbhú cérbh é an custaiméir a choinneáil le haghaidh cúig bliana tar éis dó/di an cuntas a dhúnadh. Ní foláir, chomh maith, cóipeanna de bhearta a choinneáil le haghaidh cúig bliana tar éis an dáta gur cuireadh an beart i gcrích.

Tá sé riachtanach d'fhoireann an bhainc eolas a bheith acu ar an gcineál gnó atá ag a gcustaiméirí agus is féidir leo eolas a iarraidh ar an méid agus cineál gnó a bhéas ag dul tríd an gcuntas. D'fhéadfaí iarraidh ar chustaiméirí foinse a gciste a dhearbhú agus cúiseanna a thabhairt faoin fáth a ndéantar bearta áirithe.