Tá roinnt rialacha ann maidir le hinghlacacht an fhístaifeadta seo ar ráitis.

• Caithfidh an fístaifeadadh a bheith ábhartha.
• Caithfidh an finné linbh a bheith ar fáil do chroscheistiú ón gcosaint ag an triail i ndiaidh an fhístéip a chasadh (cé go bhféadfaí an croscheistiú a dhéanamh trí nasc teilifíse agus trí idirghabhálaí a úsáid).
• Caithfidh an t-ionchúiseamh fógra a sheirbheáil go bhfuil sé ar intinn acu agallamh fístaifeadta a ghlacadh i bhfianaise, agus caithfidh siad deis réasúnta a thabhairt don chúisí féachaint ar an bhfístéip.
• D'fhéadfaí leagan den fhístéip atá curtha in eagar a chasadh sa chúirt ar an gcoinníoll go dtoilfeadh an cúisí leis agus go gceadódh an breitheamh é.

I ndeireadh na dála, is faoi rogha bhreitheamh na trialach é cead a thabhairt maidir le fístéip a ghlacadh i bhfianaise. Ní mór don bhreitheamh breathnú ar aon riosca a d'fhéadfadh a bheith ann go dtiocfadh leatrom ar an gcúisí as glacadh leis an bhfístéip i bhfianaise.

Is féidir ráitis ó íospartaigh faoi bhun 14 bliana d'aois a dhéanamh le linn agallaimh le ball den Gharda Síochána nó le duine inniúil eile.

Céard is duine inniúil ann?

Níl aon sainmhíniú ar an téarma duine inniúil san Acht um Fhianaise Choiriúil 1992. Is féidir glacadh leis áfach, go bhforálann sé do chúinsí ina ndéantar físeanna d'agallaimh ag aonaid mheasúnaithe. Is é an duine inniúil i gcúinse mar sin ná an duine gairmiúil a dhéanann measúnú ar an duine óg de thoradh cáis mhí-úsáidte atá á iniúchadh.

An gclúdaíonn an dlí seo daoine atá faoi mhíchumas intleachta?

Clúdaíonn. Tá feidhm ag na forálacha uile atá bainteach le fístaifeadadh ráiteas ó íospartaigh faoi bhun 14 bliana d'aois agus le hinghlacacht fístéipeanna dá leithéid i gcúirt ar aon íospartach faoi mhíchumas intleachta freisin. (Tabhair faoi deara go dtugtar éislinn mheabhrach ar mhíchumas intleachta san Acht um Fhianaise Choiriúil 1992).