An Coimisiún um Chearta an Duine in Éirinn

Cabhair a fháil ón gCoimisiún maidir le ceisteanna a bhaineann le cearta an duine in Éirinn

Is féidir leis an gCoimisiún cabhrú leat cearta daonna a chur chun cinn in Éirinn trí fiosrúchán a dhéanamh nó thí chabhrú leat maidir le himeachtaí dlíthiúla. Nuair a chuirtear fiosrú ar bun déanann an Coimisiún cás faoi leith a iniúchadh ina bhféadfadh cearta an duine a bheith á sárú in Éirinn. Is féidir an fiosrú seo a dhéanamh go poiblí nó go príobháideach de réir mar a chinneann an Coimisiún féin agus tá sé de chumhacht aige a ordú go gcuirfí faisnéis nó cáipéisíocht bhainteach ar fáil nó go mbeadh daoine i láthair.

Más mian leat go ndéanfadh an Coimisiún fiosrú faoi cheist bhainteach maidir le cearta an duine nó cabhrú leat maidir le himeachtaí dlíthiúla a bhaineann le cearta an duine caithfidh tú a bheith cinnte ar dtús cén ceart de chuid an duine atá i gceist. Nuair a chuireann tú iarratas faoi bhráid an Choimisiúin:

• Léirigh go soiléir an chaoi a bhfuil baint ag an fiosrúchán nó ag an imeacht dlíthiúil le feidhm an Choimisiúin
• Inis an chaoi a d'fhéadfadh an fiosrúchán nó an imeacht dlíthiúil athrú a dhéanamh ar an gcaoi a chosnaítear cearta an duine in Éirinn
• Ní foláir iarrachtaí réasúnta a bheith déanta agat i gcás imeachtaí dlíthiúla chun cúnamh eile dlí a fháil, Cúnamh Dlíthiúil Sibhialta nó Cúnamh Dlíthiúil Coiriúil mar shampla.

Ní féidir leis an gCoimisiún beart a dhéanamh thar a chumhachtaí. Is féidir leis an gCoimisiún um Chearta an Duine in Éirinn fiosrúchán a dhéanamh nó cabhrú le himeacht dlíthiúil má tá baint ag an gcás le ceann acu seo a leanas:

• Athbhreithniú ar dhlí agus ar chleachtas Stáit na hÉireann agus a institiúidí
• Dul i gcomhairle le heagraíochtaí náisiúnta nó idirnáisiúnta
• Moltaí a dhéanamh don Rialtas
• Tuiscint agus feasacht a chur chun cinn faoi thábhacht cearta an duine.

Ní féidir leis an gCoimisiún cabhair a thabhairt i gcás imeachtaí dlíthiúla ach amháin sna cásanna seo a leanas:

• Go mbaineann ceist phrionsabail dlí leis an ábhar
• Go bhfuil an cás chomh casta nach mbeadh sé réasúnta déileáil leis an ábhar gan cabhair ón gCoimisiún
• Gur cás speisialta é agus go dtograíonn an Coimisiún ar a rogha féin cabhair a thabhairt.

Ní eagraíocht é an Coimisiúin a thugann breith ar ghearáin faoi sháraithe cearta an duine in Éirinn. Ní féidir leis sásamh nó cúiteamh a thabhairt i gcásanna ina ndearnadh sárú ar chearta an duine. Ní féidir leis rialú in aghaidh cinntí cúirte nó binsí agus ní féidir leis a ordú do ranna rialtais a dteidlíochtaí a thabhairt do dhaoine a cheapann go bhfuil na teidlíochtaí sin acu. Féadfaidh sé fiosrúchán a dhéanamh, áfach, le fáil amach an sásaíonn na dlíthe agus an cleachtas reatha na caighdeáin maidir le cearta an duine agus is féidir leis cúnamh a thabhairt maidir le himeachtaí dlíthiúla.

Cliceáil anseo chun tuilleadh eolais a fháil faoin gcaoi a ndéanann an Coimisiún um Chearta an Duine in Éirinn measúnú ar iarratais ar chabhair dhlíthiúil nó go gcuirfí fiosrúchán ar bun.