Rabhadh do Sheanóirí

Rialacha

Cé atá incháilithe do chúnamh deontais?

Cuireann an scéim cúnamh ar fáil do dhaoine scothaosta. Chun a bheith incháilithe ní mór duit a bheith:

• 65 bliain d'aois nó níos mó agus maoin nó acmhainn theoranta a bheith agat
• Ag maireachtáil i d’aonar nó le duine eile a chomhlíonann na critéir cháilitheachta
• Ag maireachtáil sa cheantar atá á chlúdach ag an ngrúpa pobail atá ag riaradh an chúnaimh deontais
• Ábalta leas a bhaint as an trealamh a chuirtear ar fáil
• Sásta fanacht i dteagmháil leis an ngrúpa pobail

Cén cineál trealaimh is féidir a chur ar fáil?

Cuirtear cúnamh deontais ar fáil i dtreo na gcostas a bhaineann le trealamh sábháilteachta agus slándála a cheannach agus a chur isteach. Tá deontais ar fáil dóibh seo a leanas:

• Aláraim phearsanta atá faoi mhonatóireacht
• Brathadóirí deataigh atá faoi mhonatóireacht
• Brathadóirí aonocsaíd charbóin atá faoi mhonatóireacht
• Soilse slándála seachtracha
• Soilse éigeandála inmheánacha

Fanann an trealamh a chuirtear ar fáil faoin scéim faoi úinéireacht an ghrúpa pobail.

Conas a dhéantar iarratas ar dheontas?

Déanann an grúpa pobail cláraithe i do cheantar iarratas ar dheontas. Nuair a aithníonn grúpa pobail duine scothaosta ina gceantar óna dteastaíonn cabhair:

• Déanann sé measúnú ar incháilitheacht an duine don scéim agus comhlánaíonn sé an fhoirm iarratais.
• Aithníonn sé an trealamh a theastaíonn agus faigheann sé luachana ó sholáthróirí
• Seolann sé an t iarratas le doiciméid thacaíochta chuig an Roinn.

Is féidir le grúpaí iarratas a dhéanamh ar dheontais ar feadh na bliana ar fad.

Cén sórt grúpaí atá in ann clárú don scéim?

Ní mór do ghrúpaí ar mian leo páirt a ghlacadh sa scéim clárú leis an Roinn ar dtús. Tá eagraíochtaí pobail, deonacha agus neamhbhrabúis i dteideal clárú. Ní mór dóibh struchtúr aitheanta a bheith acu agus a bheith ábalta a léiriú go bhfuil an cumas acu na deontais a bhainistiú. Ní mór dóibh cuntas teiste a bheith acu ag obair le daoine scothaosta sa phobal freisin. Ní bheidh grúpa ábalta clárú sa chás go bhfuil grúpa i mbun na scéime sa cheantar cheana féin.