Pobal-ar-Aire

Eolas

Is éard atá sa chlár Pobal-ar-Aire ná clár pobalbhunaithe chun coireanna a chosc, agus cúram agus sábháilteacht a chur chun cinn i measc na bpobal faoin tuath. Leagann sé béim faoi leith ar dhaoine aosta agus ar dhaoine leochaileacha i bpobail faoin tuath.

Bunaíodh an clár i 1984 agus is iad Muintir na Tíre agus an Garda Síochána a bhainistíonn é. Is iad an Roinn Dlí agus Cirt agus Comhionannais agus an Roinn Sláinte a thugann maoiniú don chlár.
Is é aidhm an chláir ná cáilíocht beatha na ndaoine sna pobail faoin tuath a fheabhsú tríothu seo a leanas:

• Laghdú a dhéanamh ar dheiseanna chun coireanna a dhéanamh
• Dea-chomharsanacht agus féintuilleamaí a spreagadh
• Timpistí a chosc agus sábháilteacht phearsanta a chur chun cinn

Grúpaí Pobal-ar-Aire

Is trí líonra Grúpaí Pobal-ar-Aire a chuirtear an clár Pobal-ar-Aire i bhfeidhm agus bíonn gach grúpa freagrach as limistéar faoi leith. Féadfar grúpa a bhunú de bharr éilimh ón bpobal nó de bharr go raibh duine i dteagmháil le Garda. Tá thart ar 1250 grúpa den sórt sin ar fud na tíre.

Bíonn Coiste Pobal-ar-Aire ag gach grúpa a bhainistíonn an grúpa agus Comhordaitheoir Pobal-ar-Aire a bhíonn i dteagmháil le hOifigeach Idirchaidrimh de chuid an Gharda Síochána. Cuireann An Garda Síochána acmhainní ar fáil dóibh.

Tá tuilleadh eolais faoin gclár Pobal-ar-Aire agus conas Grúpa Pobal-ar-Aire a bhunú ar láithreán gréasáin Mhuintir na Tíre agus sa lámhleabhar Pobal-ar-Aire (pdf).

Teagmháil a dhéanamh

Más rud é go bhfuil cónaí ort i limistéar Pobal-ar-Aire féadfaidh tú sonraí teagmhála do Ghrúpa Pobal-ar-Aire a fháil i Stáisiún na nGardaí do cheantair. Mura bhfuil cónaí ort ina leithéid de cheantar agus más spéis leat Grúpa a bhunú téigh i dteagmháil leis na Gardaí sa stáisiún cóngarach duit nó le Oifigeach Forbartha Pobal-ar-Aire Mhuintir na Tíre.