Eascairí agus pleadálacha

Eolas

Doiciméid cúirte is ea pleadálacha (a gcuirtear eascairí orthu scataí) a ndéanann na páirtithe i gcás a mhalartú. Cuirtear an "Comhghearánaí" ar an té atá ag agairt an cháis. Cuirtear an "Cosantóir" ar an duine a bhfuil cás á agairt leis.

Má fhaigheann tú eascaire nó pleadáil trí dhearmad, níor mhór duit dul i dteagmháil leis an aturnae a bhfuil a ainm ar an doiciméad.

Cásanna sa Chúirt Dúiche

Más mian leis an gComhghearánaí imeachtaí a thosú sa Chúirt Dúiche, déanfaidh a aturnae toghairm shibhialta a ullmhú don Chosantóir.

Ansin cuirfidh an Cosantóir (nó a aturnae) Fógra go bhfuiltear chun an cás a chosaint chuig an Comhghearánaí nó a aturnae le cur in iúl go bhfuil sé ar a intinn an cás a chosaint.

Má chreideann an Cosantóir go bhfuil éileamh aige ar an gComhghearánaí, déanfaidh an Cosantóir Fógra Frithéilimh a eisiúint a leagfaidh amach an t-éileamh atá aige ar an gComhghearánaí.

Cásanna sa Chúirt Chuarda agus san Ard Chúirt

Más cás a bhaineann leis an Ard Chúirt nó cás de chuid na Cúirte Cuarda atá i gceist, is iondúil go gceapfaidh aturnae an Chomhghearánaí abhcóide chun pleadálacha an cháis a dhréachtú.

Déanfaidh abhcóide an Chomhghearánaí Bille Sibhialta a ullmhú más cás a bhaineann leis an gCúirt Chuarda atá i gceist agus Ráiteas Éilimh má bhaineann an cás leis an Ard Chúirt.

Is é an cuspóir atá ag na doiciméid seo ná an cás in aghaidh an Chosantóra a chur in iúl. Mar shampla, má bhaineann an cás le timpiste bhóthair ba chóir don eascaire cúinsí na timpiste a thaispeáint go soiléir agus a chur in iúl cén chaoi a bhfuil an locht ar an gCosantóir. Léireoidh an doiciméad go mion an díobháil a tharla don Comhghearánaí.

Nuair a fhaigheann an Cosantóir an doiciméad caithfidh sé láithreas a thaifeadadh le cur in iúl go bhfuil sé bainteach leis an gcás agus go bhfuil sé ar intinn aige é a chosaint. Is féidir leis an gCosantóir Fógra Sonraí a chur chuig an Comhghearánaí ag iarraidh tuilleadh sonraí agus eolais.

Nuair atá na Freagraí ar Shonraí faighte ag an gCosantóir, déanfar a Chosaint a eisiúint, ag cur in iúl cén fáth nach bhfuil an locht ar an gCosantóir. Má chreideann an Cosantóir go bhfuil éileamh aige ar an gComhghearánaí, déanfaidh an Cosantóir "fógra frithéilimh" a eisiúint a leagfaidh amach an t-éileamh atá aige ar an gComhghearánaí.