Díospóidí a réiteach idir tiarnaí talún agus tionóntaí

Rialacha

Ag déileáil le díospóidí

Má tharlaíonn díospóid idir tusa agus do thiarna talún, ba chóir duit iarracht a dhéanamh i dtús báire teacht ar réiteach idir an bheirt agaibh. I gcruinniú idir an dá pháirtí is féidir míthuiscintí a leigheas agus is féidir deis a thabhairt don dá pháirtí a dtuairim a thabhairt. Bí cinnte go bhfuil do chearta agus oibleagáidí ar eolas agat agus go bhfuil do chuid fíricí ullmhaithe roimhe ré agus iad a bheith ceart agat. Cliceáil ar an táb thuas i gcomhair tuilleadh eolais mar gheall ar dhíospóidí idir tionóntaí agus tiarnaí talún agus ar bhealaí chun iad a réiteach.

D'fhéadfadh sé a bheith cuideachtúil litir a chur chuig do thiarna talún, le mionsonraí do ghearán. Agus tú ag iarraidh an díospóid a réiteach, ba cheart duit taifead a choimeád d'aon teagmháil idir tusa agus do thiarna talún. Ní i gcónaí a éiríonn le tionóntaí agus tiarnaí talún díospóidí a réiteach eatarthu féin. Más amhlaidh an cás seans go bhfuil cabhair sheachtrach ag teastáil.

Údaráis Áitiúla

Tá na húdaráis áitiúla freagrach as a chinntiú go sásaíonn cóiríocht phríobháideach atá ligthe ar cíos íoschaighdeáin fhisiciúla áirithe. Má tá baint ag do dhíospóid le fadhbhanna le do chóiríocht nó le truailliú de dheasca torainn tá seans ann go bhfuil siad in ann cabhrú leat. Labhair le d'Oifigeach Sláinte Comhshaoil ó d'údarás áitiúil i gcomhair tuilleadh eloais.

An Bord um Thionóntachtaí Cónaithe Príobháideacha

Soláthraíonn An Bord um Thionóntachtaí Cónaithe Príobháideacha (BTCP) seirbhís réiteach díospóide do thiarnaí talún agus thionóntaí. Nuair a thagtar ar chomhaontú le cabhair nó breithniú an BTCP, tá an comhaontú sin ceangailteach de réir dlí.

Tá an próiseas réiteach díospóide a úsáideann an BTCP neamh-choimhlinteach agus faoin rún. Is féidir le tiarnaí talún, tionóntaí nó páirtithe eile ar a dtéann an díospóid i bhfeidhm (m.sh. comharsana) an próiseas a thionscnamh chun an díospóid a réiteach. Ní foláir go bhfuil tiarnaí talún cláraithe leis an BTCP chun leas a bhaint as an seirbhís seo ach is féidir le tionóntaí leas a bhaint as an seirbhís fiú mura bhfuil an tionóntacht cláraithe ag an tiarna talún.

Ba cheart dul i dteagmháil le Threshold (féach thíos) i gcomhair comhairle ar do chás sula dtéann tú i dteagmháil leis an BTCP. Ní seirbhís comhairle é an BTCP agus níor cheart dul i dteagmháil leo ach amháin chun iarratas a dhéanamh le leas a bhaint as a seirbhís réiteach díospóide. Má dhéanann tú an cinneadh díospóid a chur ar aghaidh chuig an BTCP, ba chóir duit dul i dteagmháil leo trí ríomhphost no trí ghuthán agus do chás a phlé le hoifigeach réiteach diospóide. Cuirfidh siad in iúl duit an é an BTCP an eagraíocht is fearr chun cabhrú leat.

Threshold

Eagraíocht charthanachta atá i Threshold a sholáthraíonn faisnéis agus comhairle saor in aisce do dhaoine le fadhbanna tithíochta.Is féidir dul i dteagmháil leo trí ghuthán, facs, ríomhphost, litir nó is féidir coinne a dhéanamh ag ceann dá dtrí ionad (Baile Átha Cliath, Corcaigh agus Gaillimh). Tá Aonad Rochtain ar Thithíocht ann a thugann seirbhís suibscríbhinne do thiarnaí talún le comhairle faoi idirghabháil le tionóntaí. Murar féidir an díospóid a réiteach fós, seans go molfar duit do chás a thabhairt faoi bhráid an Bhoird um Thionóntachtaí Cónaithe Príobháideacha (BTCP).

Próiseas réiteach díospóide an BTCP

An chéad chéim sa phróiseas ná foirm iarratais a chomhlánú agus í a sheoladh ar ais chuig an BTCP le táille 25 euro. Má tá deacrachtaí agat leis an bhfoirm seo a chomhlánú, cabhróidh ball foirne de chuid an BTCP leat. Ba chóir duit an oiread sonraí faoin díospóid agus gur féidir a lua sa bhfoirm agus í a sheoladh ar ais chuig an BTCP mar aon le haon fhianaise a gceapfaidh tú a chabhróidh le d'éileamh. Ba cheart cóip den léas sínithe (má tá ceann agat) a chur ann chomh maith. Má tá tú ag cur grianghraf, iarrann an BTCP go solathraíonn tú trí chóip de gach grianghraf. Cuirfear aon fhaisnéis a thugann tú faoi bhráid gach páirtí ata páirteach.

Gheobhaidh tú litir ón BTCP, ag admháil go bhfuarthas d'fhoirm iarratais agus gheobhaidh an páirtí eile sa díospóid litir gearáin. Gheobhaidh an bheirt agaibh na litreacha seo a leanas chomh maith: litir chun glacadh leis an idirghabháil agus litir chun diútiú don idirghabháil.

• Ciallaíonn idirghabháil go gcuidíonn idirghabhálaí de chuid an BTCP leis an dá pháirtí teacht ar chomhaontú le chéile.
• Ciallaíonn breithniú go nglacann an breithneoir le cinneadh a fhéadann nó nach bhféadann freagairt d'aon chomhaontú ar ar thángthas idir na páirtithe. Is iad na páirtithe a chinneann ansin an bhfuil siad toilteanach glacadh leis an gcinneadh sin.

Ní mór duit ceann de na litreacha sin a chomhlánú agus í a sheoladh ar ais chuig an BTCP.

Idirghabháil

Ní rachaidh an próiseas idirghabhála ar aghaidh ach amháin sa chás go n-aontaíonn an dá pháirtí leis an idirghabháil agus sa chás go measann an BTCP gurb í an slí is fearr chun an díospóid a réiteach. Má aontaíodh leis sin, ceaptar Monatóir an BTCP don chás agus déanfaidh sé teagmháil le ceachtar páirtí le dáta agus am don éisteacht phríobháideach. Ag an éisteacht seo, déanfaidh an dá phairtí a gcás agus tabharfaidh siad aon fhianaise a gceapfaidh siad a thacaíonn leis an gcás sin.

Cabhróidh Idirghabhálaí an BTCP leo teacht ar chomhaontú leis an díospóid a shásóidh gach duine. Cuirfear tuairisc ar an idirghabháil chuig an dá pháirtí mar aon le litir ag glacadh leis an gcomhaontú agus litir ag diúltú don chomhaontú. Beidh stadtréimhse de 21 lá ansin ag an dá pháirtí agus ina dhiaidh sin beidh orthu an litir glactha nó an litir diúltaithe a sheoladh ar ais chuig an BTCP. Má ghlacann an bheirt acu leis an gcomhaontú idirghabhála, is ord dearbhaithe de chuid an BTCP é atá ceangailteach de réir dlí.

Breithniú

Sa chás go socraíonn na páirtithe gan seirbhísí idirghabhála a úsáid, nó sa chás nach gceapann an BTCP go bhfuil an cás feiliúnach d' idirghabháil, téann sé ar aghaidh chuig breithniú. Ceaptar breithneoir an BTCP chun an cás a fhiosrú go hiomlán. Socróidh breithneoir an BTCP ar an mbealach a mbeidh an díospóid réitithe, bunaithe ar fhianaise agus finnéithe na bpáirtithe.

Mar a tharlaíonn sa phróiseas idirghabhála, cuirfear tuairisc an bhreithneora chuig an dá pháirtí mar aon le litreacha glactha agus diúltaithe. Ní mór ceann de na litreacha sin a chomhlánú agus a sheoladh ar ais chuig an BTCP laistigh de 21 lá. Má ghlacann an bheirt acu le cinneadh an bhreithnithe, is ordú dearbhaithe de chuid an BTCP é atá ceangailteach de réir dlí.

Binse Tionóntachta

An dara céim i seirbhís réiteach díospóide an BTCP atá sa Bhinse Tionóntachta. Is féidir díospóid a chur ar aghaidh chuig an Binse Tionóntachta ar son ceithre chúis:

• Má theipeann ar an gcóras idirghabhála teacht ar chomhaontú
• Más mian le ceachtar párití achomharc a dhéanamh ar chinneadh an Bhreithneora laistigh de 21 lá
• Má iarrann ceachtar de na páirtithe éisteacht bhinse
• Má chuireann an BTCP an díospóid díreach faoi bhráid an Bhinse, m.sh. nuair atá cuma air go bhfuil seans láidir ann go ndéanfar damáiste don áit chónaithe no contúirt do pháirtí amháin.

Má théann do chás faoi bhráid an Bhinse, cuirfidh an BTCP é sin in iúl duit i scríbhinn. Léiríonn an litir sin dáta, am agus áit na héisteachta agus tugann sí cuntas ar an díospóid agus ar na nósanna imeachta a nglacfar leo ag an éisteacht. Níor chóir go mbeadh sé riachtanach ionadaíocht dhlíthiúil a bheith ag duine nuair a thógtar cás chuig an BTCP ach is féidir dlíodóir a thabhairt chuig an éisteacht más mian leat. Is féidir finnéithe a thabhairt leat a thabhairt a thabharfaidh fianaise chun tacú le do chás, ach ba cheart cuimhniú go mbeidh tú freagrach as aon chostais a thabhaíonn tú (costais dlíodóra agus finnéithe). Is annamh a dhámhfaidh an Binse costais agus níl aon chúnamh dlí ar fáil más mian leat ionadaíocht dhlíthiúil a thabhairt leat.

Triúr atá i gceist le Binse. Tagann an triúr ó Choiste Réiteach Díospóide an BTCP agus tá eolas agus taithí gairmiúil agus ábhartha acu. Éisteachtaí poiblí ata i gceist agus is cosúil le héisteachtaí cúirte iad mar sin beidh deis agat do chás a chur i láthair don Bhinse. Tá an t-údarás ag an mBinse finnéithe a thoghairm, cur ar fáil cáipéisí ábhartha a iarraidh agus fianaise a thógáil faoi mhionn.

Eiseofar an cinneadh a dhéanann an Binse Tionóntachta chuig gach páirtí mar ordú dearbhaithe de chuid an BTCP agus tá sé ceangailteach de réir dlí. Is féidir féachaint ar orduithe dearbhaithe ar láithreán gréasáin an BTCP anseo. Ní féidir achomharc a dhéanamh ar chinntí a dhéanann an Binse ach chuig an Ard-Chúirt ar phointe dlí agus ní mór an t-achomharc a chur isteach laistigh de 21 lá.

Forfheidhmiú Orduithe Dearbhaithe BTCP

An Chúirt Chuarda atá freagrach as forfheidhmiú Orduithe Dearbhaithe an BTCP. Más rud é nach gcomhlíonann ceachtar de na pártithe ordú dearbhaithe, is féidir iad a thuairisciú chuig an BTCP. Is féidir leis an BTCP iarratas a dhéanamh ar Ordú Cúirte Cuarda ansin ag treorú an pháirtí atá i gceist an tOrdú a chomhlíonadh. Má chuirtear isteach ort toisc nach bhfuil duine ag comhíonadh ordaithe is féidir leat iarratas a dhéanamh díreach chuig an Chúirt Chuarda.