Cuntas a thabhairt ar Iarratas ar chead pleanála

Eolas

Tá sé de cheart agat breathnú ar iarratas ar chead pleanála agus má íocann tú táille cuntas/tuairimí scríofa a thabhairt air. Ní mór an cuntas/tuairimí a nochtadh taobh istigh de 5 sheachtain ó thagann an t-iarratas ar chead pleanála isteach chuig an údarás pleanála.

Ní mór d'iarrthóirí ar chead pleanála fógra a chrochadh ar an suíomh agus fógra a chur i nuachtán áitiúil le deis a thabhairt duit fios a bheith agat go bhfuil an t-iarratas déanta. Ní mór do na húdaráis áitiúla liostaí a chur le chéile chuile sheachtain de na hiarratais ar chead pleanála atá faighte acu agus na liostaí seo a bheith ar fáil don phobal le scrúdú ar feadh 8 seachtainí ar a laghad ina n-oifigí agus sa leabharlann phoiblí.

Tá sé de cheart agat na cáipéisí ar fad a cuireadh leis an iarratas a fheiceáil, beidh siad ar fáil ag oifigí an údaráis áitiúil. Ní féidir le údarás pleanála cinneadh a thógáil ar iarratas pleanála go dtí go bhfuil 5 sheachtain slán ó dáta an iarratais.

Ba cheart aon rud atá le rá agat a chur i scríbhinn chuig an údarás áitiúil. Más féidir ba cheart an uimhir thagartha atá ag an iarratas ar chead pleanála a lua i do chomhfhreagras. Ní mór duit freisin d'ainm agus do sheoladh féin a thabhairt chomh maith le do sheoladh poist (muna bhfuileadar mar an gcéanna).

Ní mór don údarás áitiúil admháil a chur chugat go bhfuil do chuntas/tuairimí faighte agus ní mór scéal a chur chugat maidir leis an gcinneadh a dhéantar ar an iarratas. Tá táille de 20 euro le n-íoc le cuntas/tuairimí a nochtadh ar iarratas.