An Muirear Teaghlaigh

Rialacha

Cé a íocann an muirear seo?

Más leatsa áitreabh, tá tú faoi dhliteanas an Muirear Teaghlaigh a íoc dó, ach féach ar na díolúintí agus tarscaoiltí a liostaítear thíos. Má tá do theach á ligean ar cíos, tá tusa faoi dhliteanas an muirear a íoc – seachas do thionónta. Ar a shon sin, má tá an teach ligthe ar léas le breis agus 20 bliain, is é an duine lena bhfuil an teach ar léas an t-úinéir, ar mhaithe le cuspóirí an mhuirir. Déantar cur síos ar dhíolúintí agus tarscaoiltí thíos.

Tá nach mór gach réadmhaoin phríobháideach chónaithe, lena n-áirítear árasáin agus mionárasáin, faoi dhliteanas an muirear a íoc.

Tarscaoiltí

Má tá tú i dteideal Forlíonadh Ús Morgáiste ar dháta an dliteanais (an 1 Eanáir gach bliain), déanfar an Muirear Teaghlaigh a tharscaoileadh.

Gheobhaidh daoine ar a bhfuil cónaí in eastáit áirithe tithíochta nach bhfuiltear críochnaithe lena dtógáil tarscaoiltí le haghaidh 2012 agus 2013. Tá sonraí faoi eastáit incháilithe ar láithreán gréasáin an Mhuirir Theaghlaigh. Tá an liosta seo foilsithe sna Rialacháin (SI 1/2012) freisin. Muna bhfuil d'eastát ar an liosta, ni bhfaighidh tú an tarscaoileadh.

Caithfidh tú do réadmhaoin a chlárú chun ceann des na tarscaoiltí a éileamh - féach 'Conas iarratas a dhéanamh' thíos.

Díolúintí

Níl an muirear le híoc ar áitreabh:

• Atá mar chuid de stoc trádála gnólachta agus nár díoladh iad nó nach raibh siad ina bhfoinse d’aon ioncam ó tógadh iad
• Atá faoi úinéireacht ranna rialtais nó Fheidhmeannacht na Seirbhíse Sláinte
• Atá faoi úinéireacht údarás áitiúil nó chomhlachtaí deonacha tithíochta (lena n-áirítear áitribh nach bhfuil ceannaithe go hiomlán ó údarás áitiúil go fóill faoin scéim comhúinéireachta)
• Atá faoi dhliteanas rátaí tráchtála
• Áta in iontaobhas lánroghnach ag carthanacht cheadaithe.

Níl tithe soghluaiste faoi dhliteanas an Muirear Teaghlaigh a íoc.

Níl tú faoi dhliteanas an muirear a íoc más gá duit an réadmhaoin a fhágáil, bliain nó a thuilleadh roimh an dáta dliteanais, de bharr éiglíocht fhadtéarmach mheabhrach nó fhisiciúil – seo chun cásanna a chuimsiú go mórmhór ina mbíonn daoine i dtithe altranais nó a bhog isteach le gaolta de bharr go dteastaíonn cúram uathu. Chun an díolúineadh seo a fháil i 2012, ní mór ná gur fhág tú an réadmhaoin ar 31 Nollaig 2010 nó roimhe sin. Ní gá réadmhaoin díolúinte a chlárú, ach d'fhéadfaí éileamh ort a chruthú go raibh tú incháilithe (le litir dochtúra nó mar sin) muna n-íocann tú an muirear.

Réadmhaoin a chlárú

Amhail a luaitear thuas, tá dualgas ort do dhliteanas a dhearbhú don Mhuirear Teaghlaigh, nó tarscaoileadh a éileamh. Nuair atá tú ag clárú don mhuirear, caithfidh tú sonraí na réadmhaoine a thabhairt - féach 'Conas iarratas a dhéanamh' thíos.

Déantar foráil san Acht go bhféadfar sonraí a roinnt i measc gníomhaireachtaí cuí, ar nós údaráis áitiúla, na Roinne Coimirce Sóisialaí, na gCoimisinéirí Ioncaim, an Bord um Thionóntachtaí Cónaithe Príobháideacha agus BSL ionas gur féidir réadmhaoine dlite cónaithe a shainaithint.

An muirear a íoc

Más leatsa áitreabh, is é an dáta dlite don Mhuirear Teaghlaigh an 1 Eanáir gach bliain, ag tosú in 2012. Má tá sé á íoc agat mar shuim shingil, tá agat 3 mhí le híoc as – a fhad leis an 31 Márta. Má theastiagh uait é a íoc i 4 thráthchuid ar fud na bliana, níor mhór duit sainordú dochair dhírigh a shocrú faoin 29 Feabhra 2012.

Gearrfar pionóis de bharr íocaíochtaí déanacha agus beidh ús i gceist mura n-íocfaidh tú an muirear in am – féach ‘Rátaí’ thíos. Cion é gan an muirear a íoc. Tá ag údaráis áitiúla an chumhacht chun daoine nach n-íocann an muirear a ionchúiseamh.

Cruthúnas íocaíochta

Gheobhaidh tú fáltas nuair a bheidh an Muirear Teaghlaigh íoctha agat. Más mian leat, is féidir leat iarraidh freisin ar dheimhniú díscaoilte, a dheimhníonn gur íocadh an muirear don bhliain lena mbaineann. Beidh gá le cruthúnas íocaíochta más mian leat an réadmhaoin a dhíol nó a aistriú.

Úinéirí a fuair bás

Má fhaigheann úinéir réadmhaoine cónaithe bás, tá ionadaí pearsanta an té mhairbh faoi dhliteanas an muirear a íoc má ghlacadh le deonú ionadaíochta. Murar glacadh le deontas ar bith, níl muirear le híoc.

Beidh an t-ionadaí pearsanta faoi dhliteanas íoc as aon mhuirir gan íoc laistigh de 3 mhí tar éis deonú ionadaíochta a ghlacadh – is iad na muirir seo iad sin a bhí gan íoc ag tráth bhás an úinéara. Mura n-íocann an t-ionadaí pearsanta aon mhuirir gan íoc laistigh den tréimhse 3 mhí seo, déantar na muirir agus an t-ús a charnadh arís ó dháta an deonaithe ionadaíochta.