Ag bogadh go teach nua

Rialacha

Post a atreorú agus athrú seoladh baile a chur in iúl do dhaoine eile

Tairgeann An Post seirbhís atreoraithe, a chinnteoidh go gcuirfear do phost go léir ar aghaidh chuig do sheoladh nua. Beidh ort foirm a chomhlánú ag tabhairt do sheanseoladh agus do sheoladh nua agus caithfidh tú na táillí cuí a íoc (féach 'Rataí' agus 'Conas iarratas a dhéanamh' thíos). Ansin atreoróidh oifig an phoist do phost go léir chuig do sheoladh nua ó dháta comhaontaithe ar aghaidh. Tá an tseirbhís seo ar fáil do thréimhsí de 3, 6 nó 12 mhí.

Fiú má bhaineann tú leas as an tseirbhís seo, ná déan dearmad do sheoladh nua a thabhairt do dhaoine nó chuideachtaí eile a scríobhann chugat go rialta. Nuair atá do thréimhse atreoraithe comhaontaithe thart, leanfaidh do phost ag dul chuig do sheanseoladh mura bhfuil tú tar éis do shonraí teagmhála a athrú leis na daoine agus na cuideachtaí ábhartha.

Fóntais a aistriú - gás, leictreachas agus bailiú dramhaíola

Caithfidh tú cuntais fhóntais i do sheanbhaile (ar nós leictreachas, gás agus bailiú dramhaíola) a dhúnadh nó a aistriú go hainm na n-úinéirí nua. Má tá tú ag bogadh ó lóistín ar cíos, d'fhéadfadh do thiarna talún a iarraidh go n-aistreofá na seirbhísí sin go dtí a ainm chun táillí athnasctha a sheachaint. Déan cinnte de go léann tú na méadair do sheirbhísí gáis agus leictreachais díreach sula n-imíonn tú. Téigh i dteagmháil le d'údarás áitiúil le cur in iúl dóibh go bhfuil tú ag imeacht agus bí cinnte go bhfuil tú tar éis na táillí dramhaíola go léir atá dlite ar an maoin sin a íoc.

Má tá tú ag bogadh isteach i dteach ina raibh daoine ina gcónaí romhat, iarr ar na hiar-úinéirí na cuntais fhóntais a aistriú go dtí d'ainm. Léigh na méadair gáis agus leictreachais chomh luath agus a bhfuil an t-áitreabh i do sheilbh agat. Más gá fóntais a nascadh, téigh i dteagmháil le do sholáthraí seirbhíse leictreachais (Soláthar Custaiméirí an BSL nó eile) nó Bord Gáis in am trátha lena chinntiú go mbeidh gach rud ag obair faoin am a fhaigheann tú an t-áitreabh i do sheilbh. Tá rannóga ar líne atá tiomnaithe d'athlonnú ag Soláthar Custaiméirí an BSL agus Bord Gáis araon, ag tabhairt an fhaisnéis go léir atá ag teastáil duit d'athrú rianúil. Gearrfar táillí dramhaíola ó lá a bhogann tú isteach, mar sin téigh i dteagmháil led' údarás áitiúil le n-insint dóibh cathain a bheidh sé seo. Déan cinnte de nach bhfuil aon táillí dramhaíola gan íoc ar do bhaile nua mar d'fhéadfá a bheith faoi dhliteanas ina leith.

Teileafón

Is féidir cuntais teileafóin a aistriú ó sheanseoltaí go seoltaí nua amhail na cuntais leictreachais agus gáis. Má dhéanann tú é sin ní bheidh ort táille athnasctha a íoc agus beidh teileafón ag obair agat ón uair a bhogann tú isteach. Sa chaoi chéanna, má tá duine ag bogadh isteach i do sheanteach láithreach, is féidir leat an cuntas a aistriú go dtí a (h)ainm. Soláthraíonn na cuideachtaí móra teileafóin go léir faisnéis ar líne faoi athlonnú agus beidh siad in ann aon cheisteanna a d'fhéadfadh a bheith agat, faoi chuntas a athrú nó chuntas nua a bhunú, a fhreagairt. D'fhéadfadh go mbeadh tú in ann d'uimhir theileafóin reatha a choinneáil, má tá tú ag bogadh go teach nua atá laistigh den mhalartán ina bhfuil tú faoi láthair. Má tá nasc idirlín agat chomh maith, téigh i dteagmháil le do sholáthraí seirbhíse i dtreo is go mbeidh tú in ann do chuntas a eagrú i do theach nua. Má tá nasc idirlín leathanbhanda agat, seiceáil an mbeidh sé sin le fáil ag do sheoladh nua. Mura mbeidh, beidh ort dul i dteagmháil le do sholáthraí leathanbhanda agus deireadh a chur le do chonradh.

Ceadúnas teilifíse

Má tá teilifís agat caithfidh Ceadúnas Teilifíse a bheith agat chomh maith. Má tá tú ag bogadh go teach nua caithfidh tú an seoladh ar do cheadúnas teilifíse a athrú. Tabhair an ceadúnas atá agat chuig oifig an phoist i ngar duit, chomh maith le fianaise de do sheoladh nua (déanfaidh bille fóntais teaghlaigh nó ráiteas bainc an gnó). Ansin leasóidh ball foirne in oifig an phoist na sonraí ar do thaifead agus déanfar nuashonrú ar do cheadúnas agus atheiseofar duit é. Tá an tseirbhís seo saor in aisce.

Teilifís chábla/dhigiteach

Má liostálann tú do sheirbhísí teilifíse cábla nó digiteacha, beidh ort dul i dteagmháil le do sholáthraí seirbhíse chun do chuntas a chur ar ceal nó chun seirbhís a eagrú i do theach nua. Seans go mbeidh tú in ann do chuntas a aistriú ó do sheanseoladh, ag brath ar an áit a bhfuil tú ag bogadh. Más gá an tseirbhís a nascadh le do bhaile nua, beidh ort táille nasctha a íoc. Bíonn an táille seo difriúil ag brath ar an soláthraí seirbhíse. Le tuilleadh eolais a fháil, ba chóir duit féachaint ar a láithreán gréasáin nó dul i dteagmháil leo go díreach.

Clár toghthóirí

Tá An Clár Toghthóirí i seilbh d'údaráis áitiúil. Déantar clár nua gach bliain agus tá go dtí 25 Samhain agat led' ainm a chur san áireamh ann nó chun aon athruithe a dhéanamh dod' shonraí (ar nós seoladh a athrú). Mura bhfuil tú in am don spriocdháta seo, is féidir leat iarratas a dhéanamh chun d'ainm a chur san áireamh san Fhorlíonadh don Chlár Toghthóirí. Chun é seo a dhéanamh, beidh ort foirm um Athrú Seolta (pdf) a chomhlánú agus í a sheoladh ar ais chuig d'údarás áitiúil. Ní ghearrtar aon táille as an tseirbhís seo.

Sonraí faoi cheadúnas tiomána, árachas cairr agus chlárú feithicle

Caithfidh tú dul i dteagmháil le do bhróicéir nó chuideachta árachais agus do sheoladh nua a thabhairt dóibh i dtreo is gur féidir leo do pholasaí árachais a nuashonrú. Más ball de sheirbhís chliste tú, ná déan dearmad do sheoladh a athrú leo siúd chomh maith.

Chuimhnigh ar an rannóg um athrú seolta a chomhlánú ar do theastas cláraithe feithicle agus seol ar ais chuig An Roinn Iompair, Turasóireachta agus Spóirt, Sionainn, Co an Chláir é. Gheobhaidh tú an seoladh ar an teastas. Déanfaidh siad nuashonrú ar do chuid sonraí agus seolfaidh siad teastas cláraithe nua chugat. Níl aon mhuirir ar an tseirbhís seo.

Níl sé de dhualgas ort an seoladh ar do cheadúnas tiomána a athrú, ach moltar duit a leithéid a dhéanamh. Téigh i dteagmháil le d'Oifig Mótarchánach chun tuilleadh eolais a fháil. Níl aon mhuirir ar an tseirbhís seo.

Árachas tí, sláinte agus saoil

Caithfidh tú dul i dteagmháil le do chuideachta árachais chun d'árachas tí a phlé mar bíonn an clúdach difriúil ó chuideachta amháin go chéile. Ba chóir duit a fhiafraí chomh maith an mbeidh inneachar do thí clúdaithe le linn bogadh. Cuirfidh go leor cuideachtaí árachais inneachar do thí faoi árachas agus iad faoi bhealach chomh fada is a mbeidh siad á bpacáil agus á mbogadh ag gnólacht bogtha ghairmiúil. Mura gcuirfidh, soláthraíonn an chuid is mó de na gnólachtaí árachas bogtha.

Beidh sonraí do sheolta nua ag teastáil ó do chuideachta árachais sláinte chomh maith i dtreo is go mbeidh siad in ann eolas faoi do pholasaí agus eolas athnuachana a chur ar aghaidh chugat go díreach.

Scoileanna do chuid leanaí

Má bheidh do leanaí fós ag freastal ar an scoil ina bhfuil siad faoi láthair níl ort ach a chinntiú go bhfuil do sheoladh nua agus d'uimhir theagmhála nua ag an scoil. Má tá tú tar éis do leanaí a rollú i scoil nua, déan cinnte de go n-aistreofar taifid scoile do leanaí sula dtosaíonn siad ann. Ná déan dearmad a insint don scoil ina bhfuil do leanaí faoi láthair cathain a bheidh siad ag fágáil na scoile.

Institiúidí airgeadais

Má tá tú ag bogadh go ceantar nua, b'fhéidir go bhfuil sé ar intinn agat do chuntas bainc a athrú go brainse áitiúil. Níl aon mhuirir ar an tseirbhís seo. Má tá tú ag fanacht leis an mbrainse bainc céanna, bí cinnte go bhfuil do sheoladh nua acu. Caithfidh tú dul i dteagmháil le do chumann foirgníochta, do chomhar creidmheasa, do chuideachta cárta creidmheasa, do sholáthraí pinsean, srl. chomh maith.

Na Coimisinéirí Ioncaim

Beidh ort do sheoladh nua a thabhairt do na Coimisinéirí Ioncaim chomh maith. Déan cinnte de go dtéann tú i dteagmháil leis an gceantar cánach ceart; is féidir leat an t-eolas teagmhála a fháil ó aon cheann de do cháipéisí cánach. Tabhair d'uimhir PSP i gcónaí i gcomhfhreagras nó ar an teileafón.

Fostóirí

Téigh i dteagmháil leis an roinn Acmhainní Daonna (AD) agus leis na ranna párolla san áit ina n-oibríonn tú agus tabhair do shonraí teagmhála nua dóibh.

Íocaíochtaí árachais shóisialta agus slándála sóisialta

Má fhaigheann tú aon íocaíochtaí leasa shóisialaigh, ar nós Sochar Linbh nó Sochar Cuardaitheora Poist beidh ort dul i dteagmháil led' oifig leasa shóisialaigh áitiúil chun do sheoladh nua a thabhairt dóibh. Má theipeann ort a leithéid a dhéanamh d'fhéadfadh sé cur isteach ar do chuid íocaíochtaí. Beidh cruthúnas de do sheoladh nua ag teastáil uathu, ar nós bille fóntais nó ráiteas bainc.

Gairmithe sláinte

Beidh ort do sheoladh nua a thabhairt dod' dhochtúir, fhiaclóir, radharceolaí agus aon ghairmithe sláinte eile lena mbíonn tú ag déileáil. Má tá tú ag bogadh go ceantar nua, is féidir leat dul i dteagmháil le do Oifig Sláinte Áitiúil chun sonraí a fháil faoi ghairmithe sláinte i do cheantar. Déan cinnte de go n-aistrítear do thaifid sláinte go dtí do ghairmithe nua.