Seirbhísí Pleanála Clainne

Rialacha

Tá dualgas ar FSS cinntiú go bhfuil seirbhísí cuimsitheacha pleanála clainne ar fáil ina gceantair. Is féidir leo an dualgas seo a chomhlíonadh go díreach in ionaid sláinte le altraí sláinte poiblí nó tríd na LG agus eagraíochtaí pleanála clainne.

Eolas ar phleanáil chlainne

Cuireann na hoifigí FSS, na LG agus an tIonad um Chothú Sláinte sa Roinn Sláinte eolas agus oideachas ar fáil maidir le seirbhísí pleanála clainne agus maidir le frithghiniúint. Tá sé leagtha síos i dtreoirlínte ón Roinn Sláinte gur ceart do gach Oifig Sláinte Áitiúil bileog eolais a chur ar fáil a dhéanann cur síos ar an gcineál agus ar an réimse seirbhísí pleanála clainne atá ar fáil ina cheantar agus sonraí maidir le soláthraithe na seirbhísí nó uimhreacha teagmhála teileafóin lena naghaidh.

Frithghiniúint

I ndáiríre is iad na LG, eagraíochtaí deonacha agus clinicí príobháideacha pleanála clainne a chuireann comhairle ar an bhfrithghiniúint chomh maith le drugaí agus fearas frithghiniúna ar oideas ar fáil.

Má tá cárta leighis agat, is féidir leat seirbhísí LG a fháil saor in aisce ina measc comhairle ar fhrithghiniúint agus drugaí agus fearas frithghiniúna ar oideas. Ó am go chéile diúltaíonn LG nó cógaslann na seirbhísí sin a chur ar fáil. Má tharlaíonn sé seo tá dualgas ar an FSS seirbhís eile a chur ar fáil duit - le LG eile, cógaslann eile nó le heagraíocht phleanála clainne, bíodh sé deonach nó príobháideach.

Muna bhfuil cárta leighis agat is féidir na costais a bhaineann le drugaí agus fearas frithghiniúna a chur san áireamh sna socruithe fóirdheontais a bhaineann le drugaí agus míochaine ar oideas.

Cuireann clinicí deonacha agus príobháideacha pleanála clainne seirbhísí frithghiniúna ar fáil freisin. Bíonn táille le n-íoc go hiondúil leis na soláthraithe deonacha ach d'fhéadfadh sé go gcuirfeadh siad ar ceal iad nó go ngearrfadh siad táillí laghdaithe i gcásanna áirithe.

Aois

Níl aon íosaois faoi leith leagtha síos le go mbeadh cead comhairle frithghiniúna agus frithghiniúint ar oideas a chur ar fáil. Ní mór do dhuine a bheith 17 áfach le caidreamh collaí a bheith aige/aici agus mar sin d'fhéadfadh sé gur coir choiriúil a bheadh ann caidreamh collaí a bheith agat le duine atá faoi 17. Mar sin tá sé de chead ag soláthraithe seirbhísí frithghiniúna diúltú na seirbhísí seo a chur ar fáil do dhuine atá faoi 17. Go ginearálta is féidir le duine aontú le seirbhísí sláinte nuair atá sé/sí 16. Níl aon amhras nach féidir seirbhísí a dhiúltú do dhaoine fásta - daoine atá 18 nó ós a chionn.

Cóir Mháinliachta

Is faoin othar atá sé cinneadh a dhéanamh dul faoi obráid aimridithe chun críocha pleanáil clainne, i gcomhar lena lia comhairleach. Mura bhfuil an tseirbhís ar fáil in ospidéal ar leith, tá sé de cheart agat iarraidh ar an lia comhairleach go ndéanfaí tú a atreorú chuig ospidéal ina bhfuil an gnáthamh seo ar fáil. Ba cheart don oifig áitiúil FSS na socruithe a dhéanamh.

Tá an Roinn Sláinte tar éis iarraidh ar FSS a chinntiú go mbíonn fáil ar sheirbhísí vaiseachtóime in ospidéil, trí dhochtúirí teaghlaigh, agus i gclinicí pleanála clainne ina limistéir. Tá tú i dteideal na seirbhísí seo a fháil saor in aisce ar an mbunús céanna le seirbhísí ospidéil phoiblí go ginearálta. Is féidir an chóir seo a fháil i gcuid de na hospidéil phríobháideacha freisin. Beidh ort an costas iomlán a íoc.

Comhairle ghéiniteach

Níl fáil forleathan ar thástáil ghéiniteach faoi leith agus ar chomhairle ina dhiaidh. Is é/í an LG a chuireann chuig na saineolaithe seo thú chun comhairle ghéiniteach a phlé go ginearálta.

Níl aon teidlíocht ann don tseirbhís seo agus mar sin ní dóigh go n-aisíocfaidh an FSS na costais a thiteann ort má théann tú thar lear leis an tseirbhís seo a fháil.

Toirchis aothaithe

Toircheas nár déanadh a phleanáil agus nach bhfuil ag teastáil ó bhean é toircheas aothaithe agus atá ina ábhar mór buartha dí. Tá roinnt eagraíochtaí deonacha a chuireann comhairle ar mhná agus cuireann cuid ach eolas ar ghinmhilleadh ar fáil freisin.

Cuireadh Clár um Thoirchis Ghéarchéime FSS (ar a dtugtaí an Ghníomhaireacht um Thoirchis Ghéarchéime roimhe seo) ar bun chun iarracht a dhéanamh líon na dtoircheas gan iarraidh a laghdú agus líon na mban a théann thar sáile le haghaidh ginmhillte a laghdú.

Ginmhilleadh

Tá ginmhilleadh in aghaidh an dlí in Éirinn ach amháin má bhíonn baol fíor agus suntasach ann do bheatha (seachas do shláinte) na máthar. Áirítear leis seo baol ag éirí as bagairt féinmharaithe. De réir threoirlínte eiticiúla Chomhairle na nDochtúirí Leighis: ‘ní rud mí-eiticiúil é má tharlaíonn sé go bhfulaingíonn leanbh sa bhroinn nó sa chás gur chaill sé a bheatha mar fhothoradh ar chóir leighis caighdeánach a chuirtear ar an máthair’.

Ní féidir srian a chur ar mhná in Éirinn taisteal thar lear le ginmhilleadh a fháil. Tá sé dleathach faisnéis a chur ar fáil in Éirinn maidir le ginmhilleadh thar lear, faoi réir coinníollacha dochta. Níl sé dleathach ginmhilleadh a spreagadh nó a mholadh in imthosca faoi leith.