Banc Sonraí um Mhíchumas Fisiceach agus Céadfach

Rialacha

Déantar eolas a bhailiú ó dhaoine faoi mhíchumas fisiceach agus/nó céadfach a bhfuil sainsheirbhísí sláinte agus seirbhísí sóisialta pearsanta dhá fháil acu nó atá ag teastáil uathu faoi láthair agus don chúig bhliain amach anseo. Tá na daoine seo a leanas i dteideal a bheith ar an mBanc Sonraí:

• daoine faoi mhíchumas buan fisceach nó céadfach de bharr galair, easláinte nó tráma
• má tá níos mó ná míchumas amháin ar dhuine agus más é an míchumas fisiceach nó céadfach an míchumas is mó atá air/uirthi
• daoine atá faoi 66 bliain d'aois
• daoine atá ag fáil sainsheirbhíse sláinte nó seirbhísí pearsanta sóisialta a bhaineann lena míchumas
• daoine a bhfuil a gcead tugtha acu a n-ainm a chur ar an mBanc Sonraí.

Maidir le úsáideoirí seirbhísí teiripe teanga agus urlabhra bheadh daoine a bhfuil liopa agus carball scoilte, diospraicse, sain-neamhord teanga agus diagnóis trom (e.g., neamhlíofaíocht trom) orthu i dteideal a bheith ar an mBanc Sonraí seo.

Nuair atá daoine i dteagmháil leis na seirbhísí seo a leanas - teiripe shaothair, fisiteiripe, teiripe teanga agus urlabhra, teicneolaíocht chúnta agus altracht sláinte poiblí ar mhaithe le cúnamh agus trealamh teicniúil a fháil - is féidir na critéir scagtha seo a chur i bhfeidhm.

• Má cheaptar go mbeidh gá le tuilleadh cúraim a chur ar an duine seo maidir lena t(h)realamh teicniúil sa chúig bhliain amach anseo, ba cheart go mbeadh sé/sí cláraithe ar an mBanc Sonraí
• Más conradh aon uair amháin é seo a bhaineann lena t(h)realamh teicniúil, ní shásaíonn an duine na critéir a bhaineann le bheith cláraithe ar an mBanc Sonraí.

Nuair atá duine faoi mhíchumas intleachtúil agus fisiceach/céadfach

Daoine atá faoi mhíchumas intleachtúil atá domhan, trom nó measartha agus atá faoi mhíchumas fisiceach nó céadfach freisin is fearr iad sin a chlárú ar an mBanc Sonraí Náisiúnta um Mhíchumas Intleachtúil agus mar sin ní ceart iad a chur san áireamh ar an mBanc Sonraí Náisiúnta um Mhíchumas Fisiceach agus Céadfach. Má cheaptar go bhfuil cás ann nach bhfuil chomh soiléar sin moltar gur ceart taifead a dhéanamh ar an gcás agus é a chur in iúl don Oifigeach Acmhainní.

Cén fhad a bhíonn eolas coinnithe ar an mBanc Sonraí

Déantar eolas a bhailiú agus a thaifead ar an duine go mbíonn 66 bliain d'aois bainte amach aige/aici.

• Má tá an duine 65, déanfar eolas a bhaineann le pleanáil don chéad bhliain eile a thaifead.
• Má tá an duine 64, déanfar eolas a bhaineann le pleanáil don chéad dhá bhliain eile a thaifead.
• Má tá an duine 63, déanfar eolas a bhaineann le pleanáil don chéad trí bhliain eile a thaifead.
• Má tá an duine 62, déanfar eolas a bhaineann le pleanáil don chéad cheithre bhliain eile a thaifead.
• Má tá an duine 61, déanfar eolas a bhaineann le pleanáil don chéad chúig bhliain eile a thaifead.

Sonraí duine a bhaint den Bhanc Sonraí

Déanfar sonraí a bhaineann le daoine faoi mhíchumas fisiceach nó céadfach a bhaint den Bhanc Sonraí:

• Má dhiúltaíonn siad a thuilleadh a gcead a thabhairt an t-eolas a bheith ar an mBanc Sonraí
• Nuair a chailltear iad
• Muna mbíonn sainsheirbhís sláinte ná seirbhís phearsanta shóisialta ag teastáil uathu a thuilleadh
• Muna mian leo sainsheirbhís sláinte ná seirbhís phearsanta shóisialta a fháil a thuilleadh
• Má tá an tír fágtha acu
• Má tá daoine faoi dhá mhíchumas agus go n-athraíonn a gcás sa chaoi agus gurb é an míchumas intleachtúil an ceann is mó atá orthu.

Cosaint Sonraí

Baineann an tAcht um Chosaint Sonraí 1988 agus an tAcht um Chosaint (Leasaithe) Sonraí, 2003 ar an ngnáthbhealach leis an eolas ar an mBanc Sonraí seo. Ciallaíonn seo, go hachomair, go bhfuil sé de cheart agat nó más páiste thú ag do thuismitheoir/caomhnóir:

• cóip den eolas atá coinnithe fút ar an mbanc sonraí a bheith agat – is féidir é seo a dhéanamh ach teagmháil a dhéanamh le Comhordnóir an Bhainc Sonraí i Fheidhmeannacht na Seirbhíse Sláinte (FSS)
• aon eolas atá míchruinn a cheartú nó a bhaint den bhanc sonraí
• gearán a chur chuig an gCoimisinéir um Chosaint Sonraí muna bhfuil do chuid cearta dhá chosaint.