Measúnú ar riachtanais do dhaoine faoi mhíchumas

Measúnuithe

Cé atá i dteideal measúnaithe

Tá tú i dteideal measúnú ar riachtanais má cheapann tú go bhfuil míchumas ort. Tá míchumas ort má tá srianadh suntasach ar do chumas gníomhú i ngairm, i ngnó nó i bpost nó páirt a ghlacadh sa saol sóisialta nó cultúrtha toisc lagú fisiceach, céadfach, intinne nó intleachtach seasmhach a bheith ort.

Deir an reachtaíocht maidir le míchumas go gciallaíonn “srianadh suntasach” go bhfuil srianadh buan ort nó ar chosúil go mbeidh sé buan, agus go mbíonn deacracht agat le cumarsáid, foghlaim nó gluaiseacht, nó go bhfuil próisis chognaíocha agat a bhfuil mí-ord suntasach orthu, mar thoradh air sin agus go gciallaíonn sé sin go bhfuil seirbhísí leanúnacha de dhíth ort nó, i gcás linbh, go bhfuil seirbhísí de dhíth ort sna luathbhlianta le feabhas a chur ar an míchumas.

Tá FSS ag iarraidh daoine a spreagadh chun iarratas a cur isteach má cheapann siad go bhfuil míchumas orthu áfach, seachas iad a bheith in ann é a shainmhíniú faoin reachtaíocht maidir le míchumas.

Measúnú a fháil

Ní mór duit iarratas a chur chuig FSS i scríbhinn (trí do Oifig Sláinte Áitiúil, ag baint úsáide as an bhfoirm iarratais oifigiúil) agus caithfidh FSS a admháil go bhfuarthas d’iarratas laistigh de 14 lá. Ní mór go mbeadh an dáta ar a dtosóidh an measúnú luaite ar an admháil seo. Forálann an tAcht go gcaithfear an measúnú a thosú laistigh de thrí mhí ón dáta a fhaightear an t-iarratas agus go gcaithfear é a chur i gcrích gan aon mhoill mhíchuí - ach níl aon teorainn ama ar leith dá chur i gcrích. Forálann na rialacháin seo, áfach, go bhfuil ar FSS an measúnú a chur i gcrích laistigh de thrí mhí ach amháin i gcásanna eisceachtúla. Má bhíonn moill i gceist leis an measúnú a chur i gcrích caithfear an chúis a mhíniú duit agus amscála a thabhairt duit dá chur i gcrích.

Athbhreithnithe

Baineann an méid seo a leanas go ginearálta le measúnuithe ar riachtanais ach níl sé i bhfeidhm fós. D’fhéadfaí measúnú FSS a dhiúltú duit má rinneadh measúnú dá leithéid ort cheana féin agus mura bhfuil an tréimhse athbhreithnithe éagtha fós nó, má tá tú i do leanbh, agus rinneadh measúnú ort sna 12 mhí roimhe sin. D’fhéadfá measúnú nua a iarraidh áfach, má tá athrú tagtha ar do chúinsí nó má tá faisnéis bhreise le fáil anois nó má mheasann tú go raibh dearmad fíorais i dtuairisc an mheasúnaithe.

Má tá measúnú á dhéanamh ort cheana nó má rinneadh measúnú ort faoin Acht um Oideachas do Dhaoine a bhfuil Riachtanais Speisialta Oideachais Acu (nach bhfuil i bhfeidhm fós maidir le measúnuithe ar riachtanais) ní bheidh tú i dteideal mheasúnú FSS de ghnáth. Má thaispeánann an measúnú oideachais go bhfuil seirbhísí sláinte de dhíth ort, caithfear é a chur chuig FSS ar mhaithe le ráiteas seirbhíse a dhréachtú.

An measúnú a dhéanamh

Tá FSS tar éis oifigigh mheasúnaithe a cheapadh atá neamhspleách agus iad ag comhlíonadh a gcuid feidhmeanna. Tá siad bunaithe in Oifigí Sláinte Áitiúla agus d’fhéadfaidís cabhrú leat an fhoirm iarratais a chomhlánú agus pé fhaisnéis atá ag teastáil uait a thabhairt duit. Is féidir leis na hoifigigh mheasúnaithe an measúnú a dhéanamh iad féin nó údarú a thabhairt d’fhostaithe eile de chuid FSS nó daoine eile a bhfuil taithí chuí acu chun é a dhéanamh. Tugtar measúnóirí ar na daoine seo. Tá forálacha ann maidir le comhoibriú agus maidir le chomhordú idir an próiseas measúnaithe seo agus na socruithe chun measúnú a dhéanamh ar riachtanas oideachais faoin Acht um Oideachas do Dhaoine a bhfuil Riachtanais Speisialta Oideachais Acu 2004.

Caithfear an measúnú a dhéanamh de réir na gcaighdeán arna nglacadh ag an Údarás um Cháilíocht agus Eolas Sláinte (ÚCES). Pléann na caighdeáin seo le raon saincheisteanna, lena n-áirítear imréiteach an Gharda Síochána do na daoine a dhéanann an measúnú, faisnéis shoiléir agus inrochtana a sholáthar d’iarrthóirí agus dá n-ionadaithe agus déileáil le faisnéis rúnda.

Is í aidhm an mheasúnaithe ná cinneadh a dhéanamh maidir leis na riachtanais sláinte agus oideachais atá agat de bharr do mhíchumais agus maidir leis na seirbhísí atá de dhíth ort chun na riachtanais sin a chomhlíonadh. Cuimsíonn seirbhísí sláinte seirbhísí sóisialta pearsanta agus áirítear iontu sin seirbhísí arna gcur ar fáil ag FSS go díreach agus seirbhísí arna gcur ar fáil ar son FSS (is iad comhlachtaí deonacha a chuireann mórán de na seirbhísí do dhaoine faoi mhíchumas intleachta ar fáil ar son FSS).

Tá sé de dhualgas ar an gComhairle Náisiúnta ar Oideachas Speisialta (CNOS) cabhrú le FSS le measúnuithe ar riachtanais a dhéanamh ar dhaoine fásta a bhfuil míchumais orthu agus le ráitis seirbhíse a ullmhú. I gcás leanaí, má aithníonn an measúnú go bhfuil gá le seirbhísí oideachais, ní mór don oifigeach measúnaithe an cás a chur ar aghaidh go dtí an soláthraí seirbhíse oideachais (scoil de ghnáth) nó chuig an CNOS.

Aithníonn an measúnú do chuid riachtanas féin. Ní thógann sé san áireamh na costais a bhaineann leis na seirbhísí sin a chur ar fáil nó cibé an bhfuil acmhainní ann faoi láthair chun seirbhísí a sholáthar leis na riachtanais a chomhlíonadh.

Do ról sa mheasúnú

D’fhéadfadh an t-oifigeach measúnaithe agallamh a chur ort agus ar do thuismitheoir, chaomhnóir, ionadaí dlí nó abhcóide pearsanta. Má tharlaíonn agallamh, ní mór don oifigeach measúnaithe an chúis leis an agallamh a mhíniú duit nó do do thuismitheoir nó chaomhnóir mura mbeadh sé seo dochrach do do shláinte mheabhrach, fholláine nó riocht mothúchánach nó mura mbeadh sé míchuí maidir le d’aois nó nádúr do mhíchumais Ní mór don oifigeach measúnaithe a chinntiú gur féidir leat an próiseas a thuiscint chomh fada agus is féidir.

Tuairisc ar an measúnú

Nuair atá an measúnú curtha i gcrích, scríobhann an t-oifigeach measúnaithe tuairisc ar an measúnú agus tugann sé/sí duit, do FSS agus don CNOS, más cuí, í (faigheann tú an ráiteas seirbhíse (féach thíos) ag an am céanna). Leagann an tuairisc ar an measúnú amach cibé an bhfuil míchumas ort nó nach bhfuil agus má tá, leagann sé amach:

• Ráiteas faoi nádúr agus méid an mhíchumais
• Ráiteas faoi riachtanais sláinte agus oideachais de bharr an mhíchumais
• Ráiteas faoi na seirbhísí cuí chun na riachtanais sin a chomhlíonadh
• Ráiteas faoin tréimhse inar chóir athbhreithniú a dhéanamh ar an measúnú (níor chóir di seo a bheith níos déanaí ná bliain ón dáta ar a eisítear an tuairisc ar an measúnú)