Seirbhísí fiaclóireachta

Cuireann Feidhmeannacht na Seirbhíse Sláinte (FSS) roinnt cóireála fiaclóireachta ar fáil saor in aisce tríd an tseirbhís sláinte poiblí. Tá na seirbhísí á gcur ar fáil ag fiaclóirí fostaithe ag Oifigí Sláinte Áitiúla i do cheantar, agus ag fiaclóirí príobháideacha, chomh maith, a bhfuil conarthaí acu le FSS chun seirbhísí áirithe a sholáthar.

Sa Bhuiséad 2022, fógraíodh go dtabharfar isteach rochtain mhéadaithe ar chóireáil fiaclóireachta do shealbhóirí cárta leighis. Déanfar an leathanach seo a nuashonrú de réir mar a bheidh níos mó sonraí ar fáil.

Mura gcáilíonn tú do sheirbhísí FSS, is féidir leat seirbhís phríobháideach fiaclóireachta a úsáid.

Scéim Sochair Cóireála

Má tá i ndóthain ranníocaíochtaí árachais shóisialaigh íoctha agat is féidir leat scrúduithe fiaclóireachta saor in aisce agus scimeáil agus snas fóirdheonaithe a fháil uair sa bhliain faoin Scéim Sochair Cóireála.

Sealbhóirí cárta leighis

Soláthraíonn an Scéim Seirbhísí Cóireála Fiaclóireachta (DTSS) rochtain ar chóireáil fiaclóireachta do dhaoine fásta a bhfuil cárta leighis acu (16 bliana d’aois nó níos sine).

Tá sealbhóirí cárta leighis i dteideal scrúdú fiaclóireachta saor in aisce i ngach bliain féilire, chomh maith le haon stoitheadh a theastaíonn. Cuirtear cóireáil ionódóntach céadchéime amháin (cuais fréimhe) ar fáil freisin gach bliain do fhiacla ar thaobh tosaigh an bhéil.

Tá dhá líonadh saor in aisce i ngach bliain féilire. Le haghaidh líonadh ar fhiacail atá líonta cheana féin sna 5 bliana roimhe sin, ní mór don fhiaclóir cead a lorg ón bPríomh-Dhéidlia FSS áitiúil ag sonrú cén fáth go bhfuil sé riachtanach ó thaobh cliniciúil de, an líonadh a dhéanamh arís.

Clúdófar deisiúcháin cíor fiacla, rialú rith fola agus eisiúint oidis nuair is gá.

Ní mór cead a fháil roimh ré ó Phríomh-Dhéidlia áitiúil FSS maidir le gach cóireáil eile, lena n-áirítear cíor fiacla a sholáthar.

Soláthraíonn fiaclóirí seirbhísí fiaclóireachta do leanaí i gclinicí fiaclóireachta FSS áitiúla. Is féidir teacht ar an tseirbhís seo trí choinní scagthástála i mbunscoil do linbh.

Gnáthchóireáil fiaclóireachta

Tairgtear coinne do scrúdú fiaclóireachta saor in aisce do gach leanbh i ranganna áirithe sa bhunscoil agus do pháistí le riachtanais speisialta. Déanfar coinne leantach le do Chlinic Fiaclóireachta FSS áitiúil más gá.

Ní fheicfidh Clinic Fiaclóireachta FSS ach leanaí lasmuigh de na ranganna seo le haghaidh cóireála éigeandála.

Cúram Fiaclóireachta Éigeandála do Leanaí

Tá gach leanbh faoi 16 bliana d’aois i dteideal freastal ar chóireáil éigeandála. Glaoigh ar do Chlinic Fiaclóireachta FSS áitiúil le haghaidh cóireáil éigeandála fiaclóireachta.

Cóireáil ortódóntach

Cuireann FSS cóireáil ortódóntach saor in aisce ar fáil do leanaí a bhfuil na fadhbanna ortódóntacha is déine acu. Tá na critéir a úsáidtear chun cinneadh a dhéanamh an gcáilíonn leanbh bunaithe ar chóras idirnáisiúnta grádaithe ar a dtugtar Innéacs Riachtanas Cóireála Ortódóntach.

Is féidir le déidlianna FSS comhairle a thabhairt maidir le hincháilitheacht agus tú a atreorú chuig aonad ortódóntach áitiúil FSS le haghaidh measúnaithe más cuí. I measc na gcineálacha fadhbanna ortódóntacha a cháilíonn faoi na treoirlínte tá fiacla tosaigh atá faoin drandal agus nach bhféadtar teacht chun cinn, fiacla iomadúla ar iarraidh, fiacla tosaigh an-ghobhach nó fadhbanna tromchúiseacha greama nó le forbairt an ghéill.

Mura gcáilíonn tú do sheirbhísí FSS, is féidir leat seirbhís phríobháideach fiaclóireachta a úsáid.

Ní mór d’fhiaclóirí táillí príobháideacha a thaispeáint in áit inar féidir le hothair breathnú orthu roimh chomhairliúchán. Ní mór táille amháin a bheith i gceist le haghaidh cóireálacha áirithe agus féadfar na táillí do chinn eile a thaispeáint mar raon, le híosmhéid agus uasmhéid sonraithe go soiléir. I gcás ina bhfuil raon táillí i gceist, ní cheadaítear íosphraghas amháin a shocrú.

Tá an Chomhairle Fiaclóireachta tar éis a Cód Cleachtais a bhaineann le: Taispeáint Táillí Príobháideacha i gCleachtais Fiaclóireachta (pdf)a fhoilsiú.

Faoiseamh cánach ar chostais fiaclóireachta

Má íocann tú as seirbhísí fiaclóireachta ó chleachtóir príobháideach, féadfaidh tú faoiseamh cánach a éileamh ar shainchóireáil fiaclóireachta áirithe. (Tá gnáthchóireáil amhail stoitheadh, scimeáil agus líonadh fiacla agus soláthar agus deisiú fiacla saorga agus cíor fiacla eisiata ón bhfaoiseamh cánach).

Tá tuilleadh faisnéise ar conas faoiseamh cánach a éileamh ar chostais fiaclóireachta ar leith a thabhaigh tú, cibé acu duit féin, do chéile, do leanbh cleithiúnach nó gaol cleithiúnach ar fáil inár ndoiciméad ar chánachas agus speansais leighis.

Teicneoirí Fiaclóireachta Cliniciúla

Is gairmithe cúram sláinte fiaclóireachta iad Teicneoirí Fiaclóireachta Cliniciúla, atá cláraithe leis an gComhairle Fiaclóireachta. Soláthraíonn siad cíor fiacla iomlána agus páirtchíor fiacla go díreach d’othair aosacha a ndearna fiaclóir measúnú orthu le déanaí. Ní dhéanann siad obair ar fhiacla nádúrtha nó ar fhíocháin bheo.

Is féidir le Teicneoirí Cliniciúla Fiaclóireachta a bhfuil conradh acu le FSS cóir leighis a chur ar shealbhóirí cárta leighis faoin Scéim Seirbhísí Cóireála Fiaclóireachta, ag soláthar cíor fiacla agus athlíneálacha ceadaithe chomh maith le deisiúcháin agus breisithe cíor fiacla.

Féadfaidh d’ionad sláinte áitiúil liosta d’fhiaclóirí a chuireann cóir ar shealbhóirí cártaí leighis a sholáthar. Is féidir leat úsáid a bhaint freisin as an Léarscáil Aimsitheoir Seirbhíse FSS chun fiaclóirí atá gar duit a aimsiú. Tá na fiaclóirí a chuireann seirbhísí ar fáil do shealbhóirí cárta leighis liostaithe mar fhiaclóirí a ghlacann páirt sa Scéim Seirbhísí Cóireála Fiaclóireachta.

Is é Cumann Fiaclóireachta na hÉireann an príomhchomhlacht ionadaíochta do dhéid-liachleachtóirí ginearálta, do speisialtóirí fiaclóireachta agus do dhéidlianna FSS.

Tá liosta de Theicneoirí Fiaclóireachta Cliniciúla cláraithe (pdf)ag an gComhairle Fiaclóireachta.

Conas gearán maidir le Fiaclóir a dhéanamh

Ní mór duit gearán a dhéanamh go díreach ar dtús leis na baill foirne sa lialann fiaclóra atá i gceist. Ba chóir dóibh sonraí iomlána a thabhairt duit faoin nós imeachta gearán agus iarracht a dhéanamh do ghearán a réiteach. Mura bhfuil tú sásta leis an bhfreagra a fhaigheann tú, is féidir leat teagmháil a dhéanamh leis an tSeirbhís um Réiteach Gearán Fiaclóireachta a oibreoidh leat agus leis an bhfiaclóir chun an gearán a réiteach.