An Clár um Thoirchis Ghéarchéime

Eolas

Tá Clár um Thoirchis Ghéarchéime FSS (an Ghníomhaireacht um Thoirchis Ghéarchéime roimhe seo) freagrach as straitéis náisiúnta a fhorbairt agus a chur i bhfeidhm chun tabhairt faoi thoirchis ghéarchéime. Is clár náisiúnta é seo a oibríonn taobh istigh de Ghrúpa Cúraim Seirbhísí Sóisialta Leanaí agus Teaghlaigh i FSS. Oibríonn an Clár um Thoirchis Ghéarchéime i dtreo na gcuspóirí lárnacha seo a leanas a bhaint amach:

• Laghdú i líon na dtoircheas géarchéime trí sholáthar seirbhísí oideachais, comhairle agus frithghiniúna.
• Laghdú i líon na mban a mbíonn toircheas géarchéime acu agus a roghnaíonn ginmhilleadh a fháil trí sheirbhísí agus tacaí a chur ar fáil a dhéanann roghanna eile níos tarraingtí.
• Soláthar seirbhísí comhairleoireachta, seirbhísí leighis agus aon seirbhísí sláinte eile a chuirfidh tacaíocht ar fáil tar éis toirchis ghéarchéime, a cheapann an Clár um Thoirchis Ghéarchéime a bheith feiliúnach.

Díríonn an Straitéis 2007-2011 ar thrí chuspóir lárnacha, a tógadh ó shainchuspóirí an Chláir um Thoirchis Ghéarchéime.

• Líon na dtoircheas géarchéime a laghdú
• Líon na mban a roghnaíonn ginmhilleadh a fháil mar thoradh ar thoirchis ghéarchéime a laghdú
• Sláinte fisiciúil agus intinne na mban a chosaint tar éis dóibh ginmhilleadh a fháil.

Toirchis ghéarchéime agus comhairleoireacht toirchis

Tá láithreán gréasáin ag an gclár ar a dtugtar Positive Options. Tugann an láithreán seo sonraí eagraíochtaí a chuireann seirbhísí comhairleoireachta toirchis ar fáil faoi rún agus go príobháideach do mhná a bhfuil cónaí orthu in Éirinn. Tá na seirbhísí comhairleoireachta seo saor in aisce. Cuireann Positive Options áis fón póca (téacstheachtaireacht) ar fáil chun cur ar chumas daoine faisnéis a fháil maidir le seirbhísí ina rogha contae.

Cuireann go leor dochtúirí teaghlaigh (DG) seirbhísí ar fáil do mhná le toirchis nach raibh pleanáilte. Má theastaíonn tacaíocht agus cúnamh uait, is féidir leat dul i dteagmháil le do DG nó le dochtúir i do cheantar.

I seisiún comhairleoireachta, cabhróidh an Comhairleoir leat oibriú chun réiteach a fháil ar do thoircheas gan choinne. Cuireann comhairleoireacht maidir le toircheas deis ar fáil duit do mhothúcháin faoi do thoircheas a phlé agus na roghanna éagsúla atá ar fáil duit a phlé.

Ní chuireann an Clár um Thoirchis Ghéarchéime seirbhísí comhairleoireachta ar fáil go díreach do mhná. Ina áit sin, cuireann roinnt dochtúirí teaghlaigh (DG) agus gníomhaireachtaí deonacha seirbhísí ar fáil go díreach do mhná.

Iarchúram Ginmhillte

Tá feachtas chun mná a threorú chuig comhairleoireacht iar-ghinmhillte agus scrúduithe sláinte ar bun ó mhí na Samhna 2008 i leith. Spreagtar mná féachaint ar abortionaftercare.ie nó téacstheachtaireacht in aisce a sheoladh chuig 50444 chun sonraí a fháil faoi sheirbhísí a chuireann scrúduithe sláinte agus comhairleoireachta iar-ghinmhillte in aisce, gan breithiúnas ar fáil.