Rialacha

Cuireann Feidhmeannacht na Seirbhíse Sláinte (FSS) seirbhísí otharchairr ar fáil le daoine atá go dona tinn a thabhairt chuig an ospidéal nó idir ospidéil. I mBaile Átha Cliath, cuireann Briogáid Dóiteáin Átha Cliath seirbhísí otharchairr ar fáil do mhórcheantar Átha Cliath. Tá a chuid seirbhísí otharchairr freisin ag Feidhmeannacht na Seirbhíse Sláinte (an Údaráis Réigiúnda um Shláinte an Oirthir roimhe seo) atá ag feidhmiú as an seomra stiúrtha chéanna, ach, níl an dá sheirbhís chomhtháithe.

Tá an tseirbhís otharchairr teoranta le freastal ar ospidéil lae, ceardlanna, ionaid do dhaoine faoi mhíchumas foghlama, aonaid scagdhealaithe duánaigh agus clinicí seachtracha ospidéil. Cuireann cuid de Limistéir FSS seirbhísí iompair ar fáil chuig na hospidéil le freastal ar na clinicí seachtracha agus na hionaid lae. Déantar é seo go minic ar chonradh le oibreoirí príobháideacha iompair. Anois agus arís d'fhéadfadh sé go mbeadh FSS sásta cúnamh a thabhairt i dtreo na gcostas a thiteann ar dhuine a bhfuil bealach fada le taisteal aige/aici chuig an ospidéal a íoc. Braitheann an cás go mór ar an mbord sláinte atá i gceist, agus i roinnt cásanna, braitheann sé ar chúinsí pearsanta an othair freisin.

Níl aon cheart soiléir ann don tseirbhís otharchairr. Go ginearálta baintear úsáid as otharcharranna i gcásanna éigeandála. Is cinneadh leighis a dhéantar má tá otharcharr le n-úsáid taobh amuigh de chásanna éigeandála. Go ginearálta, is féidir táille a ghearradh ar dhaoine as an tseirbhís muna bhfuil cártaí leighis acu. Braitheann sé arís ar FSS agus is féidir i gcásanna faoi leith na táillí a mhaitheamh.

Seirbhísí príobháideacha otharchairr

Tá roinnt seirbhísí príobháideacha otharchairr ar fáil, ina measc seirbhísí otharchairr aeir - cuireann tú glaoch orthu agus íocann tú as a gcuid seirbhísí ar bhonn tráchtála. Anois 's arís d'fhéadfadh FSS glaoch orthu le cúnamh a thabhairt i gcásanna éigeandála, sa chás sin, íocann FSS as a gcuid seirbhísí.

Seirbhísí deonacha otharchairr

Tá roinnt eagraíochtaí deonacha otharchairr freisin ann. Baintear úsáid astu go hiondúil le cúnamh a thabhairt ar an láthair ag imeachtaí poiblí.