Seirbhísí Cosliachta

Eolas

Déanann coslia measúnú, diagnóis agus cóireáil ar ghalair agus éalang a bhaineann leis an gcos. Is féidir le cosliacht feabhas suntasach a chur ar chaighdeán saoil daoine trí phian a mhaolú agus soghluaisteacht a chur chun cinn agus a chothú.

Sa Bhéarla, tá an téarma ‘podiatrist’ ag teacht isteach anois in áit an téarma ‘chiropodist’.

Níl aon dualgas dlíthiúil ar Fheidhmeannacht na Seirbhísí Sláinte (FSS) seirbhísí cosliachta a chur ar fáil ach sa chás go ndéanann siad é sin, d’fhéadfadh seirbhísí a bheith á gcur ar fáil ag an Oifig Sláinte Áitiúil nó ag eagraíochtaí deonacha thar ceann FSS. Sa chás go bhfuil an tseirbhís ar fáil, is seirbhís í atá saor in aisce i gcás daoine a bhfuil cártaí leighis acu agus daoine a tholg Heipitíteas C go díreach nó go hindíreach as glóbailin imdhíonachta frith-D daonna a úsáid nó as aon táirge fola nó aistriú fola a fuarthas in Éirinn agus a bhfuil Cárta faoin Acht Sláinte Leasaithe acu.

Faoiseamh cánach agus seirbhísí cosliachta

D’fhéadfadh sé go mbeadh daoine nach bhfuil cártaí leighis acu ábalta faoiseamh cánach a éileamh ar sheirbhísí cosliachta má tá orthu freastal ar na seirbhísí sin mar chuid de chóir leighis. (Is é sin, má tá míchumas suntasach nó tinneas tromchúiseach srl. ort, agus go n-ordaíonn do dhochtúir duit freastal ar sheirbhísí cosliachta). D’fhéadfadh sé go mbeifeá ábalta faoiseamh cánach a éileamh ar aon chuairt dochtúra agus ar chógais ar oideas a bhaineann leis an gcúram seo freisin.

Má tá éileamh ar chostais á dhéanamh agat, ba chóir duit foirm Med 1 a íoslódáil agus a chomhlánú agus é a sheoladh le do P60 ón mbliain cánach ábhartha chuig d’oifig cánach áitiúil chun aisíoc a éileamh. Ceithre bliana an teorainn ama atá ann maidir le héilimh ar aisíocaíochtaí cánach.

Clárú coslianna

Tá Coru, an Chomhairle um Ghairmithe Sláinte agus Cúraim Shóisialaigh, freagrach as coslianna a chlárú agus a rialú. Tá an bunús do bhunú na gclár agus na gcaighdeán gairmiúil do ghrúpaí arna gclúdach ag an Acht um Ghairmithe Sláinte agus Cúraim Shóisialaigh 2005 á chur le chéile ag Coru i láthair na huaire.

Léigh tuilleadh faoi chlárú na ngairmithe cúraim shóisialaigh anseo.

Tá trí chomhlacht gairmiúil ar leith ag déanamh ionadaíocht ar choslianna faoi láthair:

• Cumann Coslianna na hÉireann
• Irish Chiropodists/Podiatrists Organisation Ltd
• Institute of Chiropodists and Podiatrists

Is féidir leat dul i dteagmháil leo má theastaíonn tuilleadh eolais uait faoi chosliacht nó más mian leat a sheiceáil an ball cláraithe é / í do chleachtóir.