Deonú Fola

Eolas

Is í Seirbhís Fuilaistriúcháin na hÉireann an Comhlacht Stáit atá freagrach as bailiú, próiseáil, tástáil agus dáileadh fola agus táirgí fola in Éirinn.

Cén fáth ar cheart dom fuil a thabhairt?

• Teastaíonn os cionn 3,000 deonú gach seachtain
• Teastóidh fuilaistriúchán ó dhuine as gach ceathrar againn am éigin
• Is féidir le deonú fola amháin cabhrú le téarnamh suas le triúr othar san ospidéal.

Chun a bheith i do dheontóir fola, ní mór duit a bheith folláin, a bheith idir 18 agus 65 bliain d’aois agus a bheith ar a laghad 50 cileagram (7 gcloch 12 phunt). Is féidir leat fuil a dheonú gach 90 lá.

Fuil a dheonú

• Nuair a roghnaíonn tú fuil a thabhairt, iarrfar ort do shonraí a chlárú le Seirbhís Fuilaistriúcháin na hÉireann agus ceistneoir sláinte agus stíl mhaireachtála a líonadh isteach. Coinneofar an fhaisnéis go léir a thabharfaidh tú faoi rún.
• Déanfar anailís ar bhraon fola chun an leibhéal haemaglóibin (iarann) a aimsiú.
• Tar éis an phróisis scagthástála leighis, tabharfar go dtí leaba deonaithe fola tú. Cuirfear cufa brú fola timpeall uachtar do láimh agus glanfar an áit le hantaiseipteach.
• Cuirfidh dochtúir nó altra snáthaid atá ceangailte le mála fola isteach i do lámh ansin. Coinneofar an mála as amharc faoin leaba. Iarrfar ort do lámh a oscailt agus a dhúnadh chun an sreabhadh fola a éascú.
• Tógann an deonú fola féin idir 8-15 nóiméad. Tógtar 470 ml fola (díreach faoi phionta). Níl aon bhaol ann go bhfaighfeá aon ghalar trí dheonú fola. Úsáidtear pacáiste fola steiriúil nua do gach deontóir fola. Ní bhaintear athúsáid as riamh.
• Glacfaidh tú scíth tar éis do chuid fola a thabhairt agus tabharfar sólaistí duit. Ba chóir duit scíth uair an chloig a thabhairt duit féin, agus níor chóir duit aon ní trom a chrochadh, a bhrú nó a phiocadh suas ar feadh ceithre nó cúig uair an chloig ar a laghad.

Fuil a Choinneáil Sábháilte

Tá Seirbhís Fuilaistriúcháin na hÉireann tiomanta soláthar fola atá chomh sábháilte agus is féidir a chur ar fáil d’ospidéil na hÉireann. Ciallaíonn sé seo go ndéanann siad tástáil ar gach deonú fola a fhaightear i gcomhair roinnt galar, ina measc Heipitíteas B, VEID agus Heipitíteas C.

Pláitíní a dheonú

Is éard atá i bpláitíní ná cealla fola beaga atá i gcolainn gach duine folláin agus atá riachtanach ionas gur féidir le fuil téachtadh i gceart. Tá daoine nach bhfuil dóthain pláitíní ina gcuid fola i mbaol fuil a chur gan choinne agus d’fhéadfaidís freisin an iomarca fola a chailleadh le linn obráide.

Ní mhaireann pláitíní ach 5-7 lá tar éis fuil a dheonú, mar sin tá sé tábhachtach soláthar leanúnach a chothú.

Teastaíonn os cionn 20,000 fuilaistriú pláitíní in Éirinn gach bliain, agus tá an líon seo fós ag dul i méid. Tugtar formhór na bpláitíní seo d’othair a bhfuil riochtaí leighis tromchúiseacha acu cosúil le hailse nó leoicéime, go háirithe iad siúd atá ag fáil ceimiteiripe nó tar éis trasphlandú smeara.

D’fhéadfadh sé go mbeadh gá acu seo a leanas le pláitíní freisin:

• Othair atá ag dul faoi obráid tromchúiseach
• Othair a loisceadh
• Daoine a bhí i dtimpiste a bhfuil gortú mór ag baint dóibh
• Naíonáin nuabheirthe a rugadh le comhaireamh íseal pláitíní.

Clárlann Smeara

Is éard atá i gClárlann Smeara Neamhghaolta na hÉireann (Irish Unrelated Bone Marrow Registry - IUBMR) ná clárlann de dhaoine atá sásta a smior a dheonú má fhaightear amach go meaitseálann sé othar óna dteastaíonn trasphlandú smeara. Tá an Chlárlann ar chuid de líonra domhanda clárlanna deontóra neamhghaolta. Ní mór breithniú cúramach a dhéanamh ar an gcinneadh a bheith i do dheontóir smeara neamhghaolta.

Léigh tuilleadh faoi Clárlann Smeara Neamhghaolta na hÉireann.