Seirbhísí dóiteáin

Rialacha

Cumhachtaí na seirbhíse dóiteáin ag láthair tine

Tá an cumhacht ag an oifigeach ceannais ag láthair éigeandála faoin Acht um Sheirbhísí Dóiteáin rud ar bith a dhéanamh, nó orduithe a thabhairt dá f(h)oireann nó lucht eile rud ar bith a dhéanamh chun an tine a chur as, nó daoine atá páirteach san éigeandáil a chosaint nó a shábháil. Clúdaíonn cumhachtaí an oifigigh cheannais:

• An ceart chun dul isteach in áitreabh ar bith
• An ceart foirgneamh ar bith a thréigean
• An ceart foirgneamh ar bith a leagan
• An ceart soláthar uisce a thógail ó fhoinse phoiblí, phríobháideach, nádúrach nó saorga ar bith.

Tá foireann dóiteáin díonta ar chásanna dlí agus iad i mbun a gcuid dualgas faoin Acht.

Coireanna faoin Acht um Sheirbhísí Dóiteáin 1981 agus faoin Acht um Cheartas Coiriúil 2006

Faoin Acht um Sheirbhísí Dóiteáin 1981, is coir í:

• Gáir bréige a thabhairt d'aon turas do na Seirbhísí Dóiteáin
• Cur isteach ar nó bac a chur ar hiodrant uisce ar bith, nó foinse eile soláthar uisce.
• D'fhéadfadh fíneáil 635 euro nó téarma príosúin suas le sé mhí, nó an dá rud a bheith mar phíonós ar na coireanna seo. D'fhéadfadh fíneáil suas le 12,700 euro nó téarma príosúin suas le dhá bhliain a bheith mar phíonós ar coireanna níos tromchúisí, mar shampla na coinníollacha sábháilteachta maidir le méid, dearú agus úsáid foirgnimh a sharú, nó na coinníollacha maidir le bealaí éalaithe nó an líon daoine is mó a d'fhéadfadh a bheith san áit a bhriseadh.

De réir Alt 185 den Acht um Cheartas Coiriúil 2006 is cion é comhaltaí pearsanra ón mbriogáid dóiteáin a ionsaí nó bagairt orthu agus iad i mbun a gcuid oibre. Is é an pionóis a ghearrtar as an gcion sin ná 5,000 euro agus 7 mbliana i bpríosún (nó an dá rud) Freisin is cion é teacht salach ar obair comhaltaí pearsanra ón mbriogáid dóiteáin nó iad a choimeád óna gcuid oibre. Gearrtar fíneáil 2,500 euro as an gcion sin.

Teastais Sábháilteacht Tine

Ní foláir d'fhorbróirí foirgnimh nua ar bith, seachas tithe cónaithe, teastas sábháilteacht tine a fháil. Cé go bhfuil teastais difriúla d'fhorbairtí difriúla ann ní mór do gach forbróir a p(h)leananna agus a d(h)eartha a chur chuig a (h)údarás dóiteáin áitiúil.

Déanann foireann sinsearach na seirbhísí dóiteáin iniúchadh ar phleananna forbróirí chun a bheith cinnte go bhfuil bealaí sásúla éalaithe ann, agus go bhfuil an foirgneamh leagtha amach sa chaoi is go mbeidh cosaint ann ar thine agus go gcuirfí cosc ar spré na tine. Má tá siad sásta, éisíonn an t-údarás dóiteáin teastas. Sa chás seo, feidhmníonn an t-údarás dóiteáin in áit an Údarás Rialaithe Tógála.

Scrúdú foirgneamh

Faoin Acht um Sheirbhísí Dóiteáin 1981, d'fhéadfadh cigirí ceadaithe ó na seirbhísí dóiteáin cuairt a thabhairt ar, agus scrúdú a dhéanamh ar fhoirgneamh ar bith faoina gcúram. D'fhéadfadh siad iarratas a dhéanamh ar cheann ar bith de na sonraithe thíos:

• Líon na n-oibrithe nó daoine atá san fhoirgneamh
• Cad chuige seomra nó áit ar bith san fhoirgneamh
• Na hábháir a úsáideadh chun an foirgneamh a thógáil
• Cáipéisí ar bith a bhaineann le sábháilteacht an fhoirgnimh.

D'fhéadfadh na cigirí an soláthar uisce a scrúdú chomh maith, agus is féidir leo trealamh ar bith atá riachtanach a thabhairt leo go dtí an suíomh agus scrúdú nó iniúchadh a dhéanamh ar córas téimh, solais, nó aeraithe ar bith, agus ábhair ar bith atá in úsáid nó stórálaithe laistigh d'áitreabh.

D'fhéadfadh cigire ó na seirbhísí dóiteáin iarraidh ar uinéirí áitribh léaráidí nó pleananna foirgnimh atá ina seilbh a chur ar fáil. Tá dualgas dlíthiúil ar an úinéar freagra sásúil a thabhairt don chigire. Muna bhfuil an cigire sásta leis an méid a fhaigheann sé/sí amach, d'fhéadfadh sé/sí iarratas a dhéanamh chuig an Ardchúirt ar ordú ag éileamh go mbainfí, go n-aistreofaí, nó go ndéanfaí sábháilte struchtúr, seirbhís, feisteas, nó píosa trealamh ar bith, nó ordú ag cur srian ar obair thógála ar an suíomh nó ag cur cosc ar úsáid an fhoirgnimh go dtí go bhfuil na hathruithe cuí déanta. Má thugann an Ardchúirt a leithéid d'ordú, tá ceangal dlíthiúil ar úinear an fhoirgnimh nó an tsuímh glacadh le tearmaí an ordaithe. D'fhéadfadh fíneáil 635 euro nó téarma príosúin sé mhí a ghearradh ar chiontóirí agus d'fhéadfadh fíneálacha breise suas le 635 euro ar bhonn laethúil a bheith i gceist muna gcloítear le téarmaí an ordaithe.

Má tá bealach isteach diúltaithe do chigire ó na seirbhísí dóiteáin, nó má cuirtear isteach air/uirthi, nó má cuirtear bac air/uirthi agus é/í i mbun a c(h)uid dualgais, is coir í sin a tharraingíonn fíneáil suas le 635 euro, nó téarma priosúin sé mhí. D'fhéadfadh cigire ó na seirbhísí dóiteáin iarratas a dhéanamh ar an gCúirt Dúiche ar bharántas muna ligtear leis/léi dul isteach i bhfoirgneamh nó suíomh.

Tá dualgas ar na seirbhísí dóiteáin chomh maith maidir le hiniúchadh agus scrúdú a dhéanamh ar ábhair dhainséaracha, peitriliam mar shampla, chun a bheith cinnte go gcloítear leis an Acht Um Ábhair Dhainséaracha 1972 agus Rialacha um Ábhair Dhainséaracha 1979. Deireann an tAcht Um Ábhair Dhainséaracha go bhféadfadh an tAire Comhshaoil, Pobal agus Rialtais Áitiúil ordú a dhéanamh ag rá gur ábhar dainséarach é ábhar ar bith a d'fhéadfadh damáiste a dhéanamh do dhuine nó maoin. Má tá a leithéid d'ábhar i do sheilbh, ní foláir duit iarratas a dhéanamh chuig d'údarás áitiúil ar cheadúnas d'ábhair dhainséaracha. Ní mór doibh siúd atá níos mó ná 60 galún peitril acu, mar shampla, iarratas a dhéanamh ar cheadúnas don pheitreal sin. Caithfidh iarrthóirí cóipeanna de learscáileanna Suirbhéireacht Ordanáis den cheantar, agus pleananna ailtire an tsuímh agus foirgnimh ar bith ar an suíomh a chur isteach chuig a n-údaráis áitiúla. Tá an t-eolas seo riachtanach ionas go mbeidh na seirbhísí doiteáin in ann a dhéanamh cinnte go stóráiltear ábhair dhainséaracha, de gnáth lear mór peitril i stáisiúin pheitril agus suíomhanna tionsclaíocha, go sábháilte agus go gcoinnítear iad achar réasúnta ó fhoirgnimh eile.