Roinn Gnóthaí Eachtracha agus Trádála

Eolas

Déanann an Rialtas ionadaíocht ar Éirinn agus é i mbun caidrimh le tíortha eile. Is í an Roinn Gnóthaí Eachtracha agus Trádála an Roinn Stáit a bhfuil freagracht iomlán uirthi as an gcaidreamh sin a stiúradh. Is é an tAire Gnóthaí Eachtracha agus Trádála atá i gceannas ar an Roinn agus tá foireann státseirbhíseach inti a thugann comhairle don Aire ar ghnéithe beartais agus caidreamh idirnáisiúnta. Freisin déanann an tAire agus an Roinn caibidlí le rialtais tíortha eile agus féadann siad comhaontuithe a dhéanamh leo thar ceann na hÉireann.

Má theastaíonn ón Rialtas go mbeadh Éire mar pháirt de aon chonradh idirnáisiúnta ní mór dóibh é a chuir ós cómhair na Dála , é a bheith pléite agus cead na Dála a fháil chun a bheith páirteach sa Chonradh. Chun go mbeadh aon chonradh idirnáisiúnta i bhfeidhm in Éirinn ní mór don chonradh a bheith glacadh isteach sa reachtaíocht in Éirinn i dtosach.

Tá an Roinn Gnóthaí Eachtracha agus Trádála roinnte i réimsí éagsúla: Áirítear ar na réimsí sin:

• An Rannóg Pholaitíochta: tá an chuid sin den Roinn freagrach as rannpháirtíocht na hÉireann i bpolaitíocht idirnáisiúnta. I measc a cuid feidhmeanna tá bainistíocht a dhéanamh ar rannpháirteachas na hÉireann i gComhbheartas Eachtrach agus Slándála an AE.
• An Rannóg um Chomhar Forbarth: Tá an rannóg seo freagrach as clár cúnaimh choigríche na hÉireann agus as beartas forbartha na hÉireann a chur i bhfeidhm.
• Rannóg an AE: déanann an rannóg seo comhordú ar chur chuige na hÉireann laistigh den AE.
• An Rannóg um Chaidreamh Eacnamaíoch Déthaobh: pléann an rannóg sin le caidreamh eacnamaíoch idir Éirinn agus tíortha eile ar fud an domhain
• Prótacal agus Cultúrtha: freagrach as cuairteanna a thugann daoine mór le rá agus ceannairí Stáit ar Éirinn a eagrú agus a bhainistiú chomh maith le cuairteanna a thugann Uachtarán na hÉireann thar lear.
• An Rannóg Chonsalachta: freagrach as raon seirbhísí a riar a bhaineann le cosaint chonsalach shaoránaigh na hÉireann atá ar cuairt i dtíortha eile nó ina gcónaí iontu.

Mar Roinn Stáit a bhfuil freagracht iomlán uirthi as caidreamh na hÉireann le tíortha eile a stiúradh, tá roinnt feidhmeanna tábhachtacha eile ag an Roinn Gnóthaí Eachtracha agus Trádála. Mar shampla eisíonn sí pasanna agus ceapann sí taidhleoirí agus consail chun ionadaíocht a dhéanamh ar son na hÉireann ar fud an domhain.

Tá tuilleadh eolais ar an raon seirbhísí a bhaineann le cosaint chonsalach shaoránaigh na hÉireann atá ar cuairt i dtíortha eile nó ina gcónaí iontu ar fáil ón seoladh thíos.