Comhairle Aontas na hEorpa

Vótáil sa Chomhairle

Tá bealaí éagsúla ina dtógann an Chomhairle cinnithe. Teastaíonn cinneadh d'aonghuth le ceisteanna tábhachtacha, mar shampla, comhpholasaí eachtrach agus slandála chomh maith le cánach. Tá ceart crosta ag gach Ballstát maidir leis na ceisteanna seo mar sin.

Le ceisteanna eile, tógann an Chomhairle cinnithe le Vótáil Tromlaigh Cháilithe. Tá méid áirid vótaí ag gach Ballstát, a bhaineann le méid a dhaonra. Go dtí Bealtaine na bliana 2004 baineadh amach Tromlach Cáilithe má bhí ar a laghad 62 den 87 vóta caite i bhfábhar ábhair. Ón 1 Bealtaine 2004 go dtí 31 Deireadh Fómhair 2004 tá socruithe sealadacha i bhfeidhm maidir le vótaí.

Ón 1 Eanáir 2007, is mar seo a leanas atá an líon vótaí gur féidir le gach tír a chaitheamh (na Ballstáit nua san áireamh):

• An Ghearmáin, An Fhrainc, An Iodáil agus an RA: 29
• An Spáinn agus An Phólainn: 27
• An Rómáin: 14
• An Ísiltír: 13
• An Bheilg, Poblacht na Seice, An Ghréig, An Ungáir agus An Phortaingéil: 12
• An Ostair, an Bhulgáir agus An tSualainn: 10
• An Danmhairg, Éire, An Liotuáin, An tSlóvaic agus An Fhionlainn: 7
• An Chipir, An Eastóin, An Laitvia, Lucsamburg agus An tSlóibhéin: 4
• Málta: 3
• Líon iomlán na vótaí: 345.

Beidh Tromlach Cáilithe ann:

• Má tá tromlach na mBallstát i bhfábhar ceiste; agus
• Má chaitear ar a laghad 73.9% de na vótaí i bhfábhar ceiste.

Chomh maith, d'fhéadfadh Ballstát dearbhú a sholáthar go ndéanann na vótaí a caitheadh i bhfábhar na ceiste ionadaíocht ar son ar a laghad 62% de dhaonra iomlán an Aontais Eorpaigh. Más rud é nach bhfuil sé seo amhlaidh ní ghlacfar leis an gcinneadh.

Athruithe sa chóras vótála

De thoradh Chonradh Liospóin déanfar na hathruithe seo a leanas:

• Méadófar líon na réimsí sin ina ndéanfar vótáil trí thromlach cáilithe agus
• Athrófar córas vótála na Comhairle féin ó 2014 ar aghaidh.

Tabharfar tromlach dúbailte ar thromlach cáilithe agus ó 2014 i leith éileofar go sásóidh cinntí dhá choinníoll:

• Caithfidh 55% de na ballstáit aontú leis: is ionann é sin agus a rá go gcaithfidh 15 bhallstáit a aontú leis chomh fada is atá 27 ann
• Caithfidh siad siúd atá ag tacú leis a bheith ina n-ionadaithe ag 65% de dhaonra an AE.

Má táthar chun cosc a chur le cinneadh caithfidh 4 bhallstát ar a laghad a bheith san áireamh ar an tromlach coscach. Más rud é go bhfuil níos lú ná 4 bhallstát in aghaidh cinnte, measfar go mbeidh an tromlach cáilithe sroichte fiú mura sásófar critéir an daonra. I gcúinsí áitithe, má bhíonn níos lú ná 4 bhallstát in aghaidh cinnte féadfaidh siad cinneadh na Comhairle a chur ar fionraí go sealadach.

Beidh socruithe idirthréimhseacha i bhfeidhm i gcomhair na tréimhse 2014-2017; féadfaidh ballstát a iarradh i rith an ama sin go gcuirfear an nós imeachta reatha i bhfeidhm seachas an córas nua.