An Coimisiún Reifrinn

Eolas

Bunaítear coimisiún reifrinn nua in Éirinn le haghaidh gach reifreann nua a bhíonn ann, má dhéanann an tAire Comhshaoil, Pobal agus Rialtais Áitiúil ordú aireachta chun coimisiún a cheapadh.

Ullmhaíonn gach coimisiún reifrinn nua eolas neamhspleách agus neamhchlaonta faoin reifreann agus cuireann sé an t-eolas sin ar fáil don phobal. Foilsíonn agus scaipeann an coimisiún leabhráin agus bróisiúir a thugann eolas ginearálta faoin reifreann. Freisin cuireann siad díospóireacht agus plé chun cinn faoin reifreann agus fógraíonn siad an reifreann sna meáin.

Bunaíodh an Coimisiún Reifrinn reatha roimh an reifreann a tharlóidh an 2 Deireadh Fómhair 2009 - nuair a iarrfar ar dhaoine vótáil chun Bunreacht na hÉireann a leasú le Conradh Liospóin.

Roimh an reifreann sin, bhunaigh an Coimisiún láithreán gréasáin tiomnaithe don reifreann ar Chonradh Liospóin agus bileog treorach ag míniú Conradh Liospóin (pdf).

Is é Cathaoirleach reatha an Choimisiún Reifrinn ná an Breitheamh Onórach Frank Clarke (breitheamh den Ard-Chúirt). Faoi Acht an Reifrinn, 1998 is iad gnáthbhaill an Choimisiúin ná Cléireach na Dála, Cléireach an tSeanaid, an tOmbudsman agus an tArd-Reachtaire Cuntas agus Ciste.

Bíonn fógraíocht teilifíse, preas, allamuigh agus pictiúrlainne ar siúl le linn na seachtainí roimh an reifreann chun eolas ginearálta a thabhairt faoi na hábhair atá i gceist. Bíonn fotheidil ag gabháil leis na craoltaí teilifíse agus déantar físeán speisialta den leabhrán eolais i dteanga chomharthaíochta na hÉireann agus scaiptear é ar bhaill de phobal na mbodhar in Éirinn. Freisin déantar leabhráin eolais an Choimisiúin i mBraille agus ar théip le haghaidh daoine a bhfuil lagú amhairc orthu agus scaiptear iad trí Chomhairle Náisiúnta na hÉireann do na Daill.