Dramh-threalamh Leictreonach agus Leictreach a Athchúrsáil

Rataí

Costais Bhainistíochta Comhshaoil

Caithfidh táirgeoirí athchúrsáil WEEE a mhaoiniú a thagann ó earraí a chuireann siad ar an margadh i ndiaidh 13 Lúnasa 2005, agus freisin an athchúrsáil a dhéantar ar gach WEEE a thagann ó earraí a cuireadh ar an margadh roimhe sin. Caithfidh táirgeoirí bainistíocht na ‘dramhaíola stairiúla’ sin a mhaoiniú ar bhunús a scair reatha ar an margadh. Éilíonn an Treoir WEEE ar Bhallstáit a chinntiú ar feadh tréimhse idirthréimhseach ocht mbliana (10 mbliana i gcás fearais tí níos mó) go dtugtar deis do tháirgeoirí a thaispeáint do thomhaltóirí, nuair a dhíoltar táirgí nua, na costais a bhaineann le WEEE stairiúil a bhailiú, a chóireáil agus a dhiúscairt ar bhealach atá go maith don chomhshaol.

Léiríonn Costais Bhainistíochta Comhshaoil Infheicthe (vEMCs) na costais athchúrsála arna gceadú ag Cumann Cláraithe WEEE Teoranta, comhlacht cláraithe WEEE náisiúnta tionscal-bhunaithe, a bhfuil Coiste Bainistíochta neamhspleách aige. Maoineoidh na costais sin an dá chomhscéim chomhlíonta atá i bhfeidhm in Éirinn, WEEE Éireann agus Ardán Athchúrsála na hEorpa, chun cur ar a gcumas íoc as bainistíocht mhaith comhshaoil a dhéanamh ar gach WEEE tí a thógann miondíoltóirí ar ais nó a dhiúscraíonn an pobal ag láthair chonláiste pobail de chuid údaráis áitiúil.

Ní féidir leis na vEMCanna a thaispeántar do thomhaltóirí na costais iarbhír a bhaineann le hathchúrsáil a shárú. Tá sceideal vEMCanna fíoraithe agus eisithe a bheidh le taispeáint ag an gClár WEEE, an comhlacht clárúcháin náisiúnta do tháirgeoirí. Is mar seo a leanas atá sampla de na EMCanna, a chaithfear a thaispeáint i gcás táirgí éagsúla;

Chun breis eolais a fháil maidir le EMCanna (Costais Bhainistíochta Comhshaoil) ba chóir duit dul i dteagmháil leis an gClár WEEE (seoladh thíos).

Taispeáint Praghsanna

Ní mór vEMCanna a bheith san áireamh sna praghsanna a thugtar do cheannaitheoirí agus a chuirtear ar taispeáint i gcás aon trealamh leictreonach ná leictreach. Caithfear praghas an táirge lena n-áirítear CBL (gan an EMC san áireamh) agus an EMC a bheith ar taispeáint astu féin ar an lipéad ar choirnéal na seilfe nó ar an ábhar é féin.

Caithfidh miondíoltóirí sonrú chomh maith cé lena aghaidh an costas sin ar aon sonrasc, admháil nó duillín. Déanann siad é sin trína rá gur ‘Ciste Athchúrsála Táirgeora’ é seo (suim an chostais bhainistíochta comhshaoil)'. Caithfidh fógra a bheith le feiceáil go soiléir san áit a ndíoltar na hábhair leictreacha ag tabhairt le fios ‘Áirítear le praghsanna na n-ábhar seo cúnamh a tugadh do chiste athchúrsála táirgeora lena chinntiú go mbailítear agus go ndéantar athchúrsáil ar threalamh dramhaíola leictreonach agus leictreach ar bhealach freagrach’.

Marcáil Táirge

Beidh sé d’oibleagáid ar gach táirgeoir marc a chur ar a dtrealamh leictreonach agus leictreach le siombail bosca bruscair scriosta amach. Is comhartha é sin nár chóir an trealamh a chur i mbosca bruscair a théann chuig líon talún nuair nach mbíonn a thuilleadh úsáide le baint as.

Eolas ar dhiúscairt trealaimh

Tá oibleagáid ar mhiondíoltóirí eolas a sholáthar don tomhaltóir ar conas is féidir leo diúscairt a dhéanamh ar threalamh leictreonach nó leictreach nuair nach mbíonn aon mhaitheas sa trealamh sin níos mó. Is féidir le miondíoltóirí é sin a dhéanamh trí bhileoga nó comharthaíocht a chur ar fáil nuair a dhíoltar trealamh.

Cadhnraí agus dramhaíl éillithe

Ba chóir diúscairt shábháilte a dhéanamh ar chadhnraí agus gan iad a chur chuig líon talún de bhrí go bhfuil siad rangaithe mar dhramhaíl ghuaiseach. De réir an WEEE seo ní bheidh ar mhiondíoltóirí a thógáil ar ais ach cadhnraí a bheidh laistigh de threalamh leictreonach nó leictreach. Ba chóir duit gach cadhnra eile a dhiúscairt i Láthair Chonláiste Pobail

Níl aon oibleagáid ar mhiondíoltóirí dramhaíl éillithe a ghlacadh a chuirfeadh a bhfoireann i mbaol sláinte agus sábháilteachta.

Láthair Chonláiste Pobail

Is féidir le tomhaltóirí ábhair ina bhfuil trealamh leictreonach agus leictreach a thabhairt chuig Láithreacha Conláiste Pobail chun diúscairt a dhéanamh orthu saor in aisce. Is áiteanna iad láithreacha conláiste pobail inar féidir gach cineál ábhar in-athchúrsáilte a thabhairt agus déanann tomhaltóirí sórtáil ar na hábhair agus is údaráis áitiúla a bhíonn ina mbun.

Céard is féidir leat a dhéanamh chun dramhaíl ó fhearas leictreach agus leictreonach a sheachaint?

Nuair atá tú ag ceannach earraí leictreonacha nó leictreacha nua, roghnaigh na cinn a d'fhéadfá ré fada a bhaint astu, agus a d'fhéadfá a uasghrádú sa thodhchaí, más féidir. Smaoinigh an féidir gléas atá agat a uasghrádú in áit ceann nua a fháil.

Má tá gléas briste, sula gcuireann tú de láimh é, faigh amach an féidir é a dheisiú.

I gceantair áirithe, tá tionscadail ar fáil a bhailíonn troscáin teaghlaigh agus bunghléasanna leictreacha ar nós sorn agus cuisneoirí le haghaidh teaghlach ar ioncam íseal.

In áit gléasanna beaga briste a chur sa bhruscar, cuir in Ionad Áiseanna na Cathrach iad chun is go mbeifí in ann iad a chur le dramhaíl eile le haghaidh athchúrsála. Má tá earraí móra agat le cur de láimh, téigh i dteagmháil le d'údarás áitiúil le haghaidh sonraí breise.

Má tá fearas leictreonach nach bhfuil ag teastáil níos mó i d'áit oibre, téigh i dteagmháil le d'údarás áitiúil le haghaidh sonraí grúpaí atá ag dáileadh ríomhairí pearsanta don rannóg neamhbhrabúsach.

Tá trádálaithe áirithe ar fáil a mbíonn spéis acu i líon mór (tonnáiste) dramhaíola leictreonaí. Má tá an cineál sin dramhaíola agat, téigh i dteagmháil le d'údarás áitiúil le haghaidh eolas breise.