Seirbhísí Athchúrsála

Eolas

Tá sé riachtanach go mbíonn plean bainistiú dramhaíola ag gach údarás áitiúil ina leagtar síos conas a chaithfear le dramhaíl an cheantair. Cé gurb í an Roinn Comhshaoil, Oidreachta agus Rialtais Áitiúil atá freagrach as athchúrsáil agus bainistiú dramhaíola in Éirinn, tá an fhreagracht seo tugtha do na húdaráis áitiúla ag an Roinn. Coiméadann an Eagraíocht um Chosaint na Timpeallachta (ECT) súil ar thionscal an bhainistiú dramhaíola. Tá orthu déanamh cinnte de go gcomhlíonann na húdaráis áitiúla a ndualgais maidir le cosaint na timpeallachta. Má cheapann an ECT nach bhfuil na húdaráis áitiúla ag comhlíonadh a ndualgas, iarrann siad tuairisc ón údarás áitiúil, tugann treoir agus moltaí dóibh agus tugann aon chabhair a cheapann ECT atá ag teastáil bunaithe ar an tuairisc sin. Muna nglacann an t-údarás áitiúil leis an treoir a tugadh dóibh nó muna gcuireann siad i bhfeidhm na moltaí a tugadh dóibh, is féidir leis an ECT ordú a thabhairt dóibh na dualgais mholta a chomhlíonadh, nó ag deireadh an lae, is féidir leis an ECT, iad féin, an fhadhb a réiteach agus aon chostas a bhaineann leis an réiteach sin a fháil ar ais ón údarás áitiúil.

Leag an Roinn Comhshaoil, Oidreachta agus Rialtais Áitiúil síos a spriocanna, sa bhliain 1998, sa doiciméad Ag Athrú ár Nósanna. Cé nach bhfuil aon chúram áirithe ainmnithe do na húdaráis áitiúla maidir leis na seirbhísí athchúrsála gur ceart dóibh a sholáthar, glactar leis go bhfuil orthu ionaid bhailithe, láithreacha d'áiseanna pobail, seirbhísí muiríní nó bailiúchán cosáin a chur ar fáil chun go mbeidh spriocanna doiciméid na Roinne á gcomhlíonadh acu.

Ní mór do na húdaráis áitiúla tuairimí an phobail a fháil sula gcuireann siad aon chóras bainistiú dramhaíola i bhfeidhm ina gceantar féin. Faoin Acht um Bhainistiú Dramhaíola 1996 tá ar na húdaráis áitiúla dul i gcomhairle go foirimiúil leis an bpobal sula gcuirtear aon chóras dramhaíola i bhfeidhm. Ní mór do na hiarratais do cheadúnas bainistiú dramhaíola a bheith foilsithe agus ar fáil don phobal agus is féidir leis an bpobal, tríd an ECT, cur in aghaidh ceadú an cheadúnais.

Faoin Acht um Bhainistiú Dramhaíola 1996, tá ar na húdaráis áitiúla agus ar an ECT cuntas cruinn a choiméad ar réimhse leathan imeachtaí maidir le bainistiú dramhaíola de. Is féidir leis an bpobal na cuntais seo a scrúdú, soar in aisce, ag aon am.