Dramhaíl Tí

Eolas

Faoin Acht um Bhainistiú Dramhaíola, (1996), tá dualgas ar gach údarás áitiúil dramhaíl tí ina gceantar a bhailiú nó socrú a dhéanamh le go mbaileofar í. Ní mór dóibh soláthar a dhéanamh nó socrú a dhéanamh do sholáthar áiseanna le fáil réidh le dramhaíl tí agus len í a bhailiú. Go hiondúil bailítear dramhaíl tí go seachtainiúil, bíodh sé ina oibreoir príobháideach nó an t-údarás áitiúil féin a dhéanann é sin. Beidh bealach faoi leith leagtha síos acu le leanúint agus cuirfear seirbhís ar fáil i gceantair éagsúla ar laethanta éagsúla.

Faoi théarmaí an Achta um Bhainistiú Dramhaíola (1996) agus Rialacháin um Bhainistiú Dramhaíola (Pleanáil) (1997), ní mór do gach údarás áitiúil plean bainistithe dramhaíola a chur le chéile a thugann sonraí ar an mbealach ina bhfuil sé i gceist acu deileáil le dramhaíl ina gceantar. Is féidir fáil réidh le dramhaíl tí ar bhealaí éagsúla. Cuireann an chuid is mó údarás áitiúil seirbhísí bailiúcháin dramhaíola ar fáil. Ach, tá bailitheoirí príobháideacha dramhaíola ag feidhmiú níos mó agus níos mó anois. Má dhéanann tú cinneadh gan úsáid a bhaint as na seirbhísí bailiúcháin atá eagraithe is féidir leat féin fáil réidh le cuid mhaith den dramhaíl tí tríd athchúrsáil a dhéanamh, múirín a dhéanamh sa bhaile agus úsáid a bhaint as na láithreacha conláiste pobail.

Araidí Rothaí

Baineann go leor údarás agus bailitheoirí príobháideacha brúscair úsáid as araidí rothaí le dramhaíl tí a bhailiú. Is bealach fíor éifeachtach é seo le dramhaíl a bhailiú. Ní theastaíonn uaidh trucail brúite ag bailiú dramhaíola in araidí rothaí ach tiománaí agus beirt eile oibrithe in áit ceathrar a bhíonn ag teastáil de ghnáth. Bíonn foireann an údaráis áitiúil saor ansin le dualgais eile a chomhlíonadh agus is bealach luachmhar é seo le hairgead a shábháil do na hoibreoirí príobháideacha. Tá an araid rothaí níos sábháilte don úinéir tí agus do na hoibrithe dramhaíola mar gheall go bhfuil na haraidí níos éasca le bogadh agus ní tharlaíonn gortú droma chomh minic agus gortú de bharr gloine brise nó ábhar eile géar a bheith ag giobadh amach as málaí plaisteacha dramhaíola. Tá seans níos lú ann freisin go mbeidh araidí rothaí ina gcúis bhrúscair seachas málaí plaisteacha dramhaíola mar gheall nach féidir le ainmhithe ná sladaithe ná gaotha arda iad a scrios.

Lipéid araidí réamhíoctha

Tá an córas seo i bhfeidhm i gcuid den tír. Íocann tú as an dramhaíl a chuireann tú chuig an láthair dramhaíola agus ní ghearrtar aon táille ort as an dramhaíl a dhéanann tú athchúrsáil air. Is féidir lipéid a cheannach ó shiopaí áitiúla, garáistí & rl. (tá liosta iomlán na miondíoltóirí atá rannpháirteach sa scéim ar fáil ón té atá i mbun an bhailiúcháin dramhaíola i do cheantar). Nuair a fhágann tú an araid amach le bailiú ní mór duit a bheith cinnte go bhfuil an lipéad réamhíoctha cuí greamaithe uirthi, le d'ainm agus do sheoladh scríofa air. Bainfidh na bailitheoirí brúscair an lipéad agus déanfar an araid a fholamhú. Ní bhaileofar aon bhrúscar muna bhfuil lipéad greamaithe don araid. Gearrtar táillí níos lú ar araidí níos lú agus i gceantair nach bhfuil bailiúcháin ar thaobh na sráide don ábhar gur féidir a athchúrsáil.

Dramhaíl mhór

Má tá go leor dramhaíola le fáil réidh léi agat is féidir leat scipe brúscair a fháil ar chíos ó chomhlacht príobháideach bailiúcháin dramhaíola. Braitheann an costas ar an gcomhlacht atá i gceist. Is féidir tuilleadh eolais a fháil ach teagmháil a dhéanamh le comhlachtaí bailiúcháin dramhaíola i do cheantar. Is féidir fáil réidh le dramhaíl mhór a bhaineann le hobair déan féin é (DFÉ) ag na láithreacha conláiste pobail nó ag na láithreacha dramhaíola ar fud na tíre. Bíonn bailiúchán ó am go chéile ag cuid de na húdaráis áitiúla don dramhaíl mhór, cuirfear fógra amach maidir leis an tseirbhís seo má tá sé i gceist í a chur ar fáil. Ní ceart earraí móra, mar shampla cairpéid, troscán ná cuisneoirí a fhágáil amach ag am ar bith don ghnáth bhailitheoir dramhaíola i do cheantar.

Athchúrsáil

Is féidir céatadán ard den dramhaíl tí a athchúrsáil agus ní mór do gach údarás áitiúil déanamh cinnte go bhfuil dóthain áiseanna ar fáil don phobal le dramhaíl a athchúrsáil. Cé go mbíonn ábhar gur féidir a athchúrsáil bailithe ar thaobh na sráide i roinnt áiteanna, braitheann go leor áiteanna eile ar dhaoine iad féin a gcuid brúscar inathchúrsáilte a thabhairt chuig ionaid athchúrsála agus láithreacha conláiste pobail. Cabhraíonn sé na táillí atá le n-íoc ag an údarás áitiúil agus ag oibreoirí príobháideacha ag láithreacha dramhaíola a choinneáil íseal má dhéantar dramhaíl a athchúrsáil agus a mhúiríniú agus é a scaradh ón dramhaíl ghinearálta. Tá láithreacha conláiste pobail agus ionaid bhailiúcháin ar fáil sa chuid is mó áiteanna, atá dhá rith ag na húdaráis áitiúla nó ag comhlachtaí príobháideacha. Is féidir gnáthearraí tí, mar shampla gloine, cannaí alúmanaim, plaisteach agus nuachtáin, a athchúrsáil ag na hionaid seo. Cuireann na láithreacha conláiste pobail seirbhísí athchúrsála ar fáil do réimse níos leithne earraí, mar shampla, dramhaíl leictreach agus earraí leictreonacha (ríomhairí, teilifíseáin, fístaifeadáin, & rl), earraí bána (innill níocháin, cuisneoirí, tóstaeir & rl) agus earraí contúirteacha (batairí, tiúbáin soilse fluaraiseacha, & rl).

Múiríniú

Bealach éifeachtach eile le gearradh siar ar an dramhaíl tí múirín a dhéanamh agus is féidir aonaid mhúirínithe a cheannach ón údarás áitiúil ag ráta laghdaithe. Ní mar a chéile a bheidh an ráta seo i ngach ceantar, ba cheart an scéal a fhiosrú le d'údarás áitiúil féin le tuilleadh eolais a fháil. Bíonn áiseanna múirínithe ag an gcuid is mó láithreacha conláiste pobail freisin d'ábhar gáirdín (féar gearrtha, scotháin sceacha, duilleoga). Bíonn an múirín ó na láithreacha seo ar fáil saor in aisce don phobal.

Bailiúchán ar thaobh na sráide

Is féidir le hoibreoirí bailiúcháin bhrúscair go leor airgid a shábháil ar tháillí láithreacha dramhaíola má bhíonn dramhaíl gur féidir a athchúrsáil agus a mhúiríniú scartha ón ngnáthbhrúscar. Mar sin, ceaptar gur fiú dóibh bailiúcháin ar thaobh na sráide a eagrú, chomh maith le hionaid bhailiúcháin agus láithreacha conláiste pobail. Go dtí seo níor gearradh aon táille ar an úinéir tí as na seirbhísí seo. Go hiondúil is sna ceantair chathracha a bhíonn na bailiúcháin ar thaobh na sráide ach d'fhéadfadh sé go bhfuil cónaí ort i gceantar cathrach agus nach bhfuil fáil agat ar a leithéid de scéim. Tá sé i gceist ag an gcuid is mó údarás áitiúil agus bailitheoirí príobháideacha dramhaíola na scéimeanna seo a thabhairt isteach nó a leathnú amach chomh luath agus is féidir. Ach, tá go leor rudaí nach mór a chur san áireamh, an costas mar shampla. Sna háiteanna ina bhfuil na scéimeanna seo ag feidhmiú ní gá i gcónaí go bhfuil iachall ar dhaoine a bheith páirteach iontu. Ach, iarrtar ort comhoibriú ar mhaithe leis an timpeallacht a choinneáil glan. Is féidir tuilleadh eolais a fháil maidir le bailiúchán dramhaíola agus scéimeanna athchúrsála i do cheantar ón údarás áitiúil nó ó bhailitheoir príobháideach dramhaíola.

Láthair dramhaíola

Cuirtear formhór na dramhaíola sa tír seo chuig na láithreacha dramhaíola. Muna ndéanann tusa nó an bailitheoir dramhaíola an dramhaíl a scaradh agus na hearraí gur féidir a athchúrsáil a bhaint amach, cuirfear gach rud a chaitheann tú san araid chuig láthair dramhaíola. Tá sé ag fáil níos deacra i gcónaí agus míchuibhiúil láithreacha feiliúnacha a aimsiú don dramhaíl agus tá sé leagtha síos i dtreoracha an AE agus an Rialtais nach mór dúinn gearradh siar ar a bheith ag brath ar an mbealach seo le fáil réidh le dramhaíl. Tá sé mar aidhm ag an Rialtas líon na láithreacha dramhaíola a laghdú sa tír agus tuairim agus 20 áiseanna den chaighdeán is airde a bheith ar fáil le freastal ar an daonra ar fad. Iarradh ar údaráis áitiúla pleananna dramhaíola a chur le chéile agus bealaí leis an méid dramhaíola atá dhá tháirgeadh a laghdú a bheith mar chuid den phlean chomh maith le leibhéil athchúrsála ina gceantair a ardú. Ós rud é go bhfuil costais na láithreacha dramhaíola ag ardú agus go bhfuil táille de €20 dhá ghearradh ag an Rialtas ar gach tonna dramhaíola a chuirtear chuig na láithreacha dramhaíola, tá go leor bailitheoirí dramhaíola ag scaradh an ábhair gur féidir a athchúrsáil, cairtchlár, páipéar, gloine agus cannaí mar shampla ar mhaithe leis na costais atá orthu a laghdú.