Dramhaíl Tí a Mhúiríniú

Eolas

Is é is múiríniú ann ná ábhair orgánacha, amhail dramhaíl chistine nó ghairdín, a bheith á ndianscaoileadh ag neacha bídeacha a itheann an dramhaíl agus a dhéanann moirt di atá cosúil le cré. Is féidir an mhoirt chréúil seo (múirín) a úsáid chun ithir a leasú.

Sa bhliain 1998, mar chuid de pholasaí Rialtas na hÉireann maidir le bainistiú dramhaíola, socraíodh spriocanna áirithe chun laghdú ar mhéid na dramhaíola in-bhithdhíghrádaithe a chuirtear go láithreáin líonta talún in Éirinn thar thréimhse 15 bliain. I measc na spriocanna sin tá 50% de dhramhaíl tí na tíre a dhiúscairt ar bhealaí eile seachas líonadh talún le linn na tréimhse céanna. Bealach amháin chun an sprioc sin a bhaint amach is ea dramhaíl tí a athchúrsáil agus a mhúiríniú.

Is féidir an chuid is mó den dramhaíl a tháirgtear sa ghairdín a mhúiríniú, cuir i gcás an fuílleach a bhíonn fágtha tar éis an féar a lomadh nó fál a bhearradh, seanphlandaí, fiaile, seanduilliúr agus glasraí lofa. Is féidir dramhaíl chistine a mhúiríniú freisin, cuir i gcás ruainní de thorthaí nó de ghlasraí, málaí tae agus caife seanmheilte, blaoscanna uibhe, bláthanna, nuachtáin agus cairtchlár éadrom. Cuireann formhór na n-údarás áitiúil trealamh múirínithe ar fáil ar lascaine dóibh siúd ar mian leo múirín a dhéanamh dá ndramhaíl tí. Is féidir ábhair orgánacha a thabhairt go dtí ionaid phobail áirithe le haghaidh a múirínithe ansin.

Ní hé amháin go gcabhraíonn múiríniú leis an bpróiseas athchúrsála, ach is amhlaidh a laghdaíonn sé ar mhéid na dramhaíola tí a tháirgtear in aghaidh na seachtaine, ar shlí go laghdófar na táillí bailithe a bhíonn le híoc agat.

Múiríniú Baile

Tá bealaí éagsúla ann le dramhaíl a mhúiríniú sa bhaile - carn múirín a bheith agat ag bun an ghairdín, nó coimeádán múirín a cheannach. Is fiú meabhrú gurb iad an t-earrach, an samhradh nó an fómhar na séasúir is oiriúnaí chun tosú ar araid mhúirín a choimeád, nó tagann moill ar an bpróiseas dianscaoilte le linn an gheimhridh, nuair nach stopann sé ar fad.

Buntáiste amháin a bhaineann le coimeádán múirín ná go gcosnaíonn sé cibé ábhar atá ann ar shíon agus ar aimsir. Is féidir coimeádán múirín a cheannach ó ionaid gharraíodóireachta agus ó shiopaí crua-earraí. Tá scéimeanna i bhfeidhm ag roinnt údarás áitiúil in Éirinn a chuireann coimeádáin mhúirín ar fáil ar lascaine do theaghlaigh áitiúla.

Sula gceannaíonn tú coimeádán, ba chóir duit do mhachnamh a dhéanamh faoi mhéid an ghairdín agus líon na ndaoine sa teaghlach. Bheadh coimeádán le toilleadh 250 lítear oiriúnach do ghairdín beag nó do ghairdín meánmhéide, agus do theaghlach ina bhfuil 4-5 duine. Is fearr an coimeádán a bheith beagáinín rómhór ná ceann atá róbheag agus a bheidh ag cur thar maoil gan mórán moille.

Tá sé áisiúil coimeádán beag a bheith sa chistin, ina gcuirtear gach dramhaíl orgánach atá le múiríniú ar ball, sa chaoi is nach mbeidh ort a bheith isteach is amach i gcónaí ag triall ar an gcoimeádán mór sa ghairdín. Beidh sluasaid nó píce ag teastáil chun an múirín a thiontú agus a aistriú ó áit go háit. Is féidir gníomhachtóirí a chur san araid mhúirín le dlús a chur sa phróiseas dianscaoilte, ach níl a leithéid riachtanach le go mbeidh rath ar an obair.

Tá tuilleadh eolais ar fáil anseo faoi na hábhair is féidir a mhúiríniú. Tá tuilleadh ábhair léitheoireachta faoi ábhair dhramhaíola nár chóir a mhúiríniú agus na cúiseanna atá leis sin anseo.

Ní chaithfidh tú coimeádán múirín a bheith agat chun tosú ar dhramhaíl tí a athchúrsáil - d'fhéadfá carn múirín a bheith ag bun an ghairdín agat.